នៅថ្ងៃទី១៩ ខែធ្នូ ឆ្នាំ២០២១ម្សិលមិញនេះ ក្រុមរួមគ្នាដើម្បីការងារសង្គម បាននាំគ្នានាំយកនូវ អាវរងារ អង្ករ ភេសជ្ជៈមួយចំនួន ចែកជូនដល់គ្រួសារប្រជាពលរដ្ឋមានការលំបាកក្នុងជីវភាពប្រចាំថ្ងៃចំនួន ៥៥គ្រួសារ និងប្រជាការពារភូមិចំនួន ១៥នាក់ ក្នុងភូមិត្រពាំងថ្ម ឃុំឃុនរាម ស្រុកបន្ទាយស្រី ខេត្តសៀមរាប ដើម្បីជួយសម្រាលការលំបាកក្នុងជីវភាពរបស់ពួកគាត់បានមួយកម្រិត ដោយអំណោយក្នុង ១គ្រួសារទទួលបាន៖ អាវបាត់រងា១ ,អង្ករ ១0គីឡូក្រាម ,ទឹកសុទ្ធវីត្រា ១យួរ ,ភេសជ្ជៈថេនសៃយូឈិ ៤ដប និងគ្រឿងឧបភោគបរិភោគមួយចំនួន ចំនែកប្រជាការពារចំនួន ១៥នាក់ ក្នុងម្នាក់ទទួលបាន អាវបាត់រងា១, អង្ករ ១០គីឡូ ,ទឹកសុទ្ធវីត្រា ១យួរ។
លោក កាយ កុច មេឃុំឃុនរាម ស្រុកបន្ទាយស្រី បានសម្តែងនូវក្តីសោមនស្សរីករាយចំពោះការយកចិត្តទុកដាក់របស់យុវជននៃក្រុមរួមគ្នាដើម្បីការងារសង្គម ដែលជារឿយៗតែងតែឃើញពួកគាត់ចុះជួយនៅក្នុងឃុំឃុនរាមនេះ លើការងារសង្គម ការងារចុះជួយអប់រំប្រជាពលរដ្ឋអំពីការចាក់វ៉ាក់សាំង និងការងារមនុស្សធម៌មួយចំនួនទៀត ដែរនេះជាគំរូដ៍ប្រពៃសម្រាប់យុវជនផ្សេងៗគប្បីយកគំរូតាម។ លោកបន្តថា ក្នុងមូលដ្ឋានភូមិត្រពាំងថ្ម កន្លងមកក៍ធ្លាប់បានទទួលការឧបត្ថម្ភពីក្រុមការងារគាំទ្រសាលាជនបទ ជាសម្ភារគ្រឿងឧបភោគបរិភោគចំនួន ២លើកហើយ ដែលនេះជាសកម្មភាពដ៍ប្រពៃសម្រាប់ជួយសម្រាលបន្ទុកដល់ក្រុមគ្រួសារ ក៍ដូចជាអាជ្ញាធរមូលដ្ឋាន ជួយដល់ពួកគាត់រួចពីភាពខ្វះខាតបានមួយគ្រាៗដែរ។
ក្នុងឱកាសនោះលោក កាន់ ប្រសិទ្ឋិ ប្រធានក្រុមការងារយុវជនស្រុកចុះមូលដ្ឋានឃុំឃុនរាម បានសម្តែងការគាំទ្រចំពោះសកម្មភាពនៃក្រុមរួមគ្នាដើម្បីការងារសង្គម ដែលបានរួមគ្នាកៀងគរបានជាថវិកា ទិញសម្ភារគ្រឿងឧបភោគបរិភោគយកមកជូនបងប្អូនកំពុងជួបការលំបាកក្នុងជីវភាពនៃភូមិត្រពាំងថ្ម និងសូមឱ្យក្រុមការងារ បន្តការងារសប្បុរសធម៌ជួយទៅដល់ភូមិគោលដៅផ្សេងទៀតដែលជួបការខ្វះខាតតាមរយៈការចូលរួមរបស់សមាជិក សមាជិកាក្នុងក្រុម និងការអំពាវនាវដល់សប្បុរសជននានាឱ្យចូលរួម។ លោកក៍បានផ្តាំផ្ញើ និងអំពាវនាវដល់បងប្អូនប្រជាពលរដ្ឋ សូមបន្តរួមគ្នាអនុវត្តឱ្យបានខ្ជាប់ខ្ជួន នូវសេចក្តីណែនាំនានារបស់ក្រសួងសុខាភិបាល និងវិធានការ៣ការពារ និង៣កុំ របស់ប្រមុខរាជរដ្ឋាភិបាល ដើម្បីការពារ ទប់ស្កាត់ការឆ្លងជំងឺកូវីដ-១៩ កុំឱ្យឆ្លងដល់គ្រួសារ និងក្នុងសហគមន៍យើង។
បើតាមលោក ញាណ តុលា តំណាងក្រុមរួមគ្នាដើម្បីការងារសង្គមលើកឡើងថា ក្រុមនេះបង្កើតឡើងនៅឆ្នាំ២០១៦ ក្រោមគោលជំហរស្ម័គ្រចិត្តរួមគ្នា សហការគាំទ្រជួយគ្នាទៅវិញទៅមក ធ្វើការងារជាក្រុម ដូចជាដាំដើមឈើ ជួយផ្សព្វផ្សាយអប់រំដល់បងប្អូនប្រជាពលរដ្ឋតាមសហគមន៍អំពី អនាម័យ និងសុខភាព ចុះជួយអប់រំសិស្សតូចៗ អំពីការសំងាតអនាម័យ សុជីវធម៌ ចរិយាធម៌ សីលធម៌រស់នៅប្រចាំថ្ងៃគ្រប់សកម្មភាពការងារទាំងអស់ សុទ្ឋតែទទួលបានការឯកភាពសហការ និងចង្អុលបង្ហាញពីអាជ្ញាធរមូលដ្ឋាននិងធ្វើទៅតាមលទ្ឋភាពថវិកាដែលអាចធ្វើបាន។ ក្រុមរួមគ្នាដើម្បីការងារសង្គម កើតចេញពីការចូលរួមគ្នាដោយស្ម័គ្រចិត្តពីសំណាក់ក្រុមយុវជនគ្រប់ទិសទីដោយអ្នកខ្លះជានិស្សិត អ្នកខ្លះប្រកបកិច្ចការរកស៊ី ឆ្លៀតពេលទំនេរពីការងារ និងការសិក្សារបស់ខ្លួនបានស្ម័គ្រចិត្តមករួមចំណែកក្នុងសកម្មភាពសង្គមជាមួយគ្នា ហើយក៏បានបង្កើតចេញជារូបរាងនូវក្រុមការងារនេះឡើង ក្នុងគោលបំណងចូលរួមចំណែកជួយដល់កិច្ចការងារសង្គមលើការងារមួយចំនួនមានជាអាទិ៍ ការងារមនុស្សធម៌ ការជួយអប់រំសីលធម៌ ដល់សិស្សានុសិស្សនៅតាមសាលា និងតែងតែចូលរួមក្នុងការងារបរិស្ថានជានិច្ច៕
អត្ថបទ និង រូបភាព៖ លោគ យូ វង្ស
កែសម្រួល៖ អ៊ុន ណារាជ្យ
