នៅព្រឹកថ្ងៃទី២១ ខែធ្នូ ឆ្នាំ២០២១នេះ អាជ្ញាធរខេត្តសៀមរាប បានរៀបចំពិធីបួងសួងនៅខាងមុខប្រាសាទអង្គរវត្ដ ព្រះអង្គរគោលធ្លក ព្រះអង្គងោក និងព្រះអង្គចេក ព្រះអង្គចម ដើម្បីសុំឱ្យបាមរីវត្ថុសក្ដិជួយថែរក្សា និងជួយផ្ដល់សេចក្ដីសុខដល់ប្រជាពលរដ្ឋខ្មែរទូទាំងប្រទេសកម្ពុជា ជាពិសេសប្រជាជននៅក្នុងខេត្ដសៀមរាប។
ពិធីនេះប្រារព្ធឡើងក្រោមអធីបតីភាព ឯកឧត្តម អ៊ាន ឃុន ប្រធានក្រុមប្រឹក្សាខេត្ត ឯកឧត្តម ទៀ សីហា អភិបាលខេត្ត និងលោកជំទាវ ដោយមានការអញ្ជើញចូលរួមពីសំណាក់ ឯកឧត្តមលោកជំទាវជាសមាជិកក្រុមប្រឹក្សាខេត្ត អភិបាលរងខេត្ត ថ្នាក់ដឹកនាំអាជ្ញាធរជាតិអប្សារា មន្តី្ររាជការ រួមនឹងប្រធានមន្ទីរ-អង្គភាពជុំវិញខេត្តជាច្រើនរូបទៀត។
ក្នុងពិធិនេះដែរ ឯកឧត្តមជាថ្នាក់ដឹកនាំបានធ្វើការអុចធូបបួងសួងសូមការប្រោសព្រំពីវត្ថុស័ក្តិសិទ្ធិនៅតំបន់អង្គរ ក៏ដូចជាដួងព្រះវិញ្ញាណក្ខន្ធអតីតព្រះមហាក្សត្រខ្មែរ ក៏ដូចជាដួងវិញ្ញាណក្ខន្ធរបស់បុព្វបុរសខ្មែរ ផ្តល់នូវពរជ័យសិរីមង្គល វិបុលសុខគ្រប់ប្រការដល់ប្រជាពលរដ្ឋនៅខេត្ដសៀមរាប ក៏ដូចជាការរក្សាបាននូវសុខសន្តិភាពសម្រាប់ជាតិ និងប្រជាជនកម្ពុជាលើដែនដីអច្ឆរិយរបស់ខ្មែរ បានរួចចាកផុតពីជំងឺផ្សេងៗ ជាពិសេសជំងឺកូវីដ១៩ ហើយពិធីនេះដែរត្រូវបានប្រព្រឹទ្ធទៅតាមលំអានប្រពៃណី ទំនៀបទម្លាប់សាសនាខ្មែរ ខណៈដែលគ្រឿងរណ្តាប់ ផ្លែឈើជាច្រើនមុខត្រូវបានរៀបចំឡើងដើម្បី ជាដង្វាយដល់វត្ថុស័ក្តិសិទ្ធផងដែរ។
ជាមួយគ្នានោះឯកឧត្តមជាថ្នាក់ដឹកនាំ ក៍បានរំលឹកគុណដល់បារមីគ្រប់ទិសទីដែលជួយតាមថែរក្សាប្រជាពលរដ្ឋខ្មែរ មានសេចក្ដីសុខមកដល់ថ្ងៃនេះ ក្នុងពេលវិបត្ដិជំងឺកូវីដ-១៩ ក្នុងរយៈពេលជិត២ឆ្នាំកន្លងមក ហើយខេត្ដសៀមរាប នឹងវិលត្រឡប់ទៅសភាពដើមវិញ ដូចមុនឆ្នាំ២០២០កន្លងមក។ ជាមួយគ្នានោះលោកតាអាចារ្យ បានសូត្របួងសួងដល់វត្ថុស័ក្តិសិទ្ធ ដួងព្រះវិញ្ញាណក្ខន្ធអតីតព្រះមហាក្សត្រខ្មែរ និងដួងវិញ្ញាណក្ខន្ធបុព្វបុរសខ្មែរ ឲ្យតាមជួយឃុំគ្រងបីបាច់ថែរក្សាជាតិកម្ពុជា ឲ្យបន្តមានសុខសន្តិភាព រក្សាបានការអភិវឌ្ឍ និងភាពរីកចម្រើនតរៀងទៅ ចៀសផុតពីគ្រោះកាចទាំងឡាយ។ ហើយក៏បានអំពាវនាវដល់បារមីវត្ថុសក្តិសិទ្ធ តាមបីបាច់ថែរក្សាថ្នាក់ដឹកនាំកំពូលៗនៅកម្ពុជា និងអាជ្ញាធរខេត្ត មន្ត្រីរាជការ ប្រជាពលរដ្ឋទូទាំងប្រទេសកម្ពុជា ជាពិសេសប្រជាពលរដ្ឋខេត្តសៀមរាប និងបងប្អូនដែលបានអញ្ជើញមកកម្សាន្ត នៅលើទឹកដីអង្គរ។
ក្នុងពិធីបួងសួងនោះផងដែរ ក៍មានប្រជាពលរដ្ឋបានចូលរួមជាច្រើនកុះករផងដែរ ពួកគេសុទ្ធតែបានបង្ហាញក្តីរីករាយជាមួយពិធីបួងសួងនេះ និងចាត់ទុកជាពិធីដ៏ល្អមួយសម្រាប់សូមសេចក្តីសុខសេចក្តីចម្រើនជូនប្រជាពលរដ្ឋ និងជាតិកម្ពុជា។ បងប្អូនប្រជាពលរដ្ឋ ដែលចូលរួមសុទ្ធតែបានផ្តល់ និងតម្កល់តម្លៃខ្ពស់បំផុតចំពោះសុខសន្តិភាពកំពុងមាននៅកម្ពុជានាពេលបច្ចុប្បន្ន ដែលទាមទាររក្សាឲ្យបាន។ ពួកគាត់បានយល់ឃើញថា បើគ្មានសន្តិភាព នឹងមិនអាចឲ្យកម្ពុជាអភិវឌ្ឍន៍រីកចម្រើនលូតលាស់ទៅមុខបាននោះឡើយ។
សូមជម្រាបថាពិធីបួងសួងនេះ ធ្វើឡើងចំនួន៤ទីតាំង ក្នុងថ្ងៃតែមួយ រួមមាននៅចំណុចលោកតារាជ ខាងមុខប្រាសាទអង្គរវត្ត នៅព្រះអង្គគោកធ្លក និងព្រះអង្គងោគ នៅព្រះអង្គចេក ព្រះអង្គចម ស្ថិតក្នុងក្រុងសៀមរាប ដែលធ្វើឡើងបន្ទាប់ពីសម្តេចតេជោ ហ៊ុន សែន នាយករដ្ឋមន្ត្រីនៃប្រទេសកម្ពុជា បានប្រកាសបិទបញ្ចប់ព្រឹត្តិការណ៍សហគមន៏ ២០កុម្ភៈ កាលពីថ្ងទី២០ ខែធ្នូ ឆ្នាំ២០២១នេះ៕
អត្ថបទ និង រូបភាព៖ លោក ឈិត សាវី ,ស៊ាន សុផាត
កែសម្រួល៖ អ៊ុន ណារាជ្យ
