មនុស្សយ៉ាងតិច ៣៧៥នាក់ឥឡូវនេះ ត្រូវបានគេដឹងថាស្លាប់ បន្ទាប់ពីព្យុះដ៏ខ្លាំងមួយ វាយប្រហារប្រទេសហ្វីលីពីន ចាប់តាំងពីថ្ងៃព្រហស្បតិ៍សប្តាហ៍មុនមក។ នេះបើតាមការចេញផ្សាយដោយ ទីភ្នាក់ងារសារព័ត៌មាន BBC នាព្រឹកថ្ងៃអង្គារ ទី២១ ខែធ្នូ ឆ្នាំ២០២១។
កំពូលព្យុះទីហ្វុង Rai ដែលមានខ្យល់បក់ល្បឿនប្រហែល ១៩៥គីឡូម៉ែត្រក្នុងមួយម៉ោង បានបង្ខំមនុស្សប្រហែល ៤សែន នាក់ រត់រកសុវត្ថិភាពនៅពេលវាវាយប្រហារ ប្រជុំកោះភាគអាគ្នេយ៍របស់ប្រទេស។
ស្របពេលជាមួយគ្នានោះដែរ មនុស្សប្រមាណ៥០០នាក់បានរងរបួស និង៥៦នាក់ទៀតត្រូវបានរាយការណ៍ថា បាត់ខ្លួន។
ទាហាន ឆ្មាំឆ្នេរសមុទ្រ និងអ្នកពន្លត់អគ្គិភ័យរាប់ពាន់នាក់ ត្រូវបានដាក់ពង្រាយនៅក្នុងតំបន់ដែលរងផលប៉ះពាល់ខ្លាំងបំផុតរបស់ប្រទេសនេះ ដើម្បីជួយដល់កិច្ចខិតខំប្រឹងប្រែងស្វែងរក និងជួយសង្គ្រោះ។
យន្តហោះយោធា និងនាវាកងទ័ពជើងទឹក ក៏កំពុងនាំយកជំនួយទៅកាន់តំបន់ដែលរងគ្រោះខ្លាំងជាងគេផងដែរ៕
