ជំនួសដោយអត្ថន័យដ៏ជ្រាលជ្រៅ នៃរូបភាពកុមារា ពាក់ប័ណ្ណចាក់វ៉ាកសាំងជាប់ដើមទ្រូង ដោយច្រកក្នុងថង់ផ្លាស្ទិក ទទួលបានលំនៅដ្ឋានដ៏កក់ក្តៅ ដែលជាអំណោយដ៏ថ្លៃថ្លា សម្តេចតេជោប្រមុខនៃរាជរដ្ឋាភិបាលកម្ពុជា និងសម្តេចកិត្តិព្រឹទ្ធបណ្ឌិត បានកាត់ខ្សែបូរ ប្រគល់ជូនកុមារា គង់ សីហា ម្ចាស់ប័ណ្ណវ៉ាក់សាំងនោះ និងក្រុមគ្រួសារ !
រូបថតមួយសន្លឹកនៅលើទំព័របណ្តាញសង្គមហ្វេសប៊ុក ដែលបានទាញយកការចាប់អារម្មណ៍ដ៏ស៊ីជម្រៅ នៃសម្តេចតេជោនាយករដ្ឋមន្រ្តី នៃព្រះរាជាណាចក្រកម្ពុជា លើខ្លឹមសារដែលមិនអាចកាត់ថ្លៃបានចំពោះការគាំទ្រទទួលយកការចាក់វ៉ាក់សាំងបង្ការជម្ងឺកូវីដ-១៩ ទៅលើប្រជាពលរដ្ឋកម្ពុជាគ្រប់មជ្ឈដ្ឋាន គ្រប់វ័យកំណត់ និងគ្រប់ទីកន្លែង តាំងពីទីក្រុងរហូតដល់ជនបទដាច់ស្រយាល គឺរូបថតពាក់ប័ណ្ណចាក់វ៉ាក់សាំងរបស់កុមារា គង់ សីហា។ នេះគឺជាប្រសាសន៍របស់ឯកឧត្តម ទៀ សីហា អភិបាលខេត្តសៀមរាប រំលឹកឡើងវិញ នារសៀលថ្ងៃទី២២ ខែធ្នូ ឆ្នាំ២០២១នេះ ក្នុងឱកាស នៃពិធីប្រគល់ផ្ទះ២ខ្នង អំណោយដ៏ថ្លៃថ្លា របស់សម្តេចតេជោ ហ៊ុន សែន និងសម្តេចកិត្តិព្រឺទ្ធបណ្ឌិត ប៊ុនរ៉ានី-ហ៊ុនសែន នៅភូមិត្មាតពង ឃុំរុនតាឯក ស្រុកបន្ទាយស្រី។ ក្នុងនោះ១ខ្នង ជូនដល់កុមារា គង់ សីហា អាយុ៧ឆ្នាំ រៀនថ្នាក់ទី២ សាលាបឋមសិក្សាជ័យ និងឪពុកម្តាយផងដែរ ដែលអំណោយនេះ គឺជាការឆ្លើយតបចំពោះចេតនាដ៏មានន័យ លើរូបភាពពាក់ប័ណ្ណចាក់វ៉ាក់សាំង ស្របគ្នាដែលអាជ្ញាធរមូលដ្ឋានបានចុះស្រាវជ្រាវឃើញថា គ្រួសារកុមារា គង់ សីហា ស្ថិតក្នុងជីភាពខ្វះខាតដោយសារតែវិបត្តិកូវីដ-១៩ ផងដែរ។
ជាមួយគ្នានេះ ផ្ទះ១ខ្នងទៀត ត្រូវបានប្រគល់ជូនដល់ឪពុកម្តាយធំរបស់កុមារស គង់ សីហា ដែលកំពុងប្រឈមនឹងវិបត្តិជីវភាពខ្វះខាត ដូចគ្រួសារ គង់ សីហា ផងដែរ ដែល ២គ្រួសារនេះ រស់នៅជិតខាងគ្នា។
គួរបញ្ជាក់ដែរថា នៅក្នុងពិធីកាត់ខ្សែបូរ ប្រគល់ផ្ទះ២ខ្នង ជូនដល់គ្រួសារ និងក្រុមញាតិរបស់កុមារា គង់ សីហា នេះ ក៏មានផ្សារភ្ជាប់ជាមួយផងដែរ ពិធីចែកអំណោយកាកបាទក្រហមកម្ពុជា ជូនដល់ប្រជាពលរដ្ឋក្រីក្រ ដោយសារតែវិបត្តិកូវីដ-១៩ ចំនួន៣៥០គ្រួសារ ក្នុងឃុំរុនតាឯក ដែលពិធីចែកអំណោយនេះ ក៏មានវត្តមានចូលរួមផងដែរ លោកជំទាវ ទាងអេង-ទៀសីហា អនុប្រធានគណៈកម្មាធិការសាខាកាកបាទក្រហមកម្ពុជាខេត្តសៀមរាប។
យ៉ាងណាក៏ដោយនៅក្នុងពិធីនោះ ឯកឧត្តមអភិបាលខេត្តសៀមរាប បានថ្លែងនូវការកោតសរសើរចំពោះរដ្ឋបាលស្រុកបន្ទាយស្រី ដែលបានយកចិត្តទុកដាក់ ដោះស្រាយសម្របសម្រួលការងារជាច្រើនទៅលើគ្រួសារកុមារាពាក់ប័ណ្ណវ៉ាក់សាំងនេះ ទាំងការគិតគូរ ការពារសុវត្ថិភាពប្រាក់អំណោយដែលទទួលបានកន្លងមក សម្រួលរៀបចំឯកសារកាន់កាប់ដីធ្លី និងលំនៅដ្ឋាន សម្របសម្រួលជាមួយសាលារៀន តាមដានលទ្ធផលសិក្សារបស់សីហាផងដែរ។ តែអ្វីជាសំខាន់គឺជួយជ្រោមជ្រែងបង្កើតការងារមុខរបរតាមឆន្ទ:របស់អាណាព្យាបាលកុមារា សីហា ដែលចង់បញ្ឈប់ជីវភាពចំណាកស្រុក ទៅជួលដីស្រែចំការគេធ្វើ វិលមកប្រើប្រាស់ប្រាក់អំណោយ ដែលអាចប្រកបមុខរបរចិញ្ចឹមសត្វ និងដាំដំណាំបន្លែជិតៗផ្ទះ បានថែរក្សាកូនវិញ ដោយមានអង្គការជាដៃគូ ជួយបណ្តុះបណ្តាលជំនាញផងដែរ ។
ក៏ជាការផ្តាំផ្ញើផងដែរ សូមឲ្យអាជ្ញាធរស្រុក និងមូលដ្ឋានផ្ទាល់ បន្តការសម្របសម្រួល និងតាមដានវឌ្ឍនភាពនៃជីវភាពក្រុមគ្រួសារមួយនេះ ឆ្ពោះទៅរកជោគវាសនាអនាគតល្អប្រសើរ។ ដោយឡែកអំណោយកាកបាទក្រហមកម្ពុជា សម្រាប់៣៥០គ្រួសារ ក្នុងមួយគ្រួសារទទួលបាន អង្ករ ៣០គីឡូក្រាម, មី១កេស, ត្រីខ ១យួរ, ទឹកត្រី១យួរ, អាយឺត២ ឃីតមួយកញ្ចប់ មានភួយ មុង សារុង ក្រមា អមដោយថវិកា ៤ម៉ឺនរៀល៕
អត្ថបទ និងរូបភាព: លោកងិន គឹមឡេង និងលោកស៊ាន សុផាត កែសម្រួលដោយ លីវ សុខុន!!!
