ក្រុមអ្នកជំនាញនៃអាជ្ញាធរជាតិអប្សរា បាននឹងកំពុងជួសជុលសសរចំនួន២៣ ក្នុងចំណោមសសរចំនួន៨៣ នៅថែវព្រះពាន់នៃប្រាសាទអង្គរវត្ត ដែលប្រឈមនឹងការពុកផុយខូចខាតខ្លាំងដោយសារធម្មជាតិ និងអាយុកាល ដែលការជួសជុលនេះ គ្រោងនឹងបញ្ចប់នាចុងឆ្នាំ២០២១ខាងមុខ។
បើតាមលោក សយ សុភារិន្ទ មន្រ្តីបច្ចេកទេសនាយកដ្ឋានអភិរក្សប្រាសាទក្នុងឧទ្យានអង្គរ និងបុរាណវិទ្យាបង្ការនៃអាជ្ញាធរជាតិអប្សរា ឱ្យដឹងនៅថ្ងៃទី២៣ ខែធ្នូនេះថា ការជួសជុលសសរទាំង២៣នេះ បានបែងចែកជា ២ដំណាក់កាល គឺដំណាក់កាលទី១ បានជួសជុលចំនួន ១២សសរ ដោយចាប់ផ្តើមកាលពីពាក់កណ្តាលខែឧសភា ដល់ពាក់កណ្តាលខែធ្នូ ឆ្នាំ២០២១ និងដំណាក់កាលទី២ បានជួសជុលចំនួន ១១សសរទៀត ដោយចាប់ផ្តើមពីពាក់កណ្តាលខែតុលា ដល់ពាក់កណ្តាលខែធ្នូ ឆ្នាំ២០២១។ ចំពោះសសរចំនួន២៣ នៅថែវព្រះពាន់នៃប្រាសាទអង្គរវត្ត មានសភាពពុកផុយ គឺបណ្ដាលមកពីស្លែល្អិតៗ ដែលបង្កើតបានទៅជាបាក់តេរី និងកត្តាបង្កដោយសារធាតុគីមីហើយបំលែងទៅជាអាស៊ីដ រួមជាមួយកម្តៅ និងសំណើមផ្សេងៗទៀតផងដែរ។
លោក សយ សុភារិន្ទ បញ្ជាក់ថា មុនពេលចាប់ផ្តើមជួសជុល គឺក្រុមអ្នកជំនាញតែងតែប្រើឧបករណ៍ធ្វើតេស្តរកជាតិអំបិល ដែលជាប្រភពនៃការបំផ្លាញសសរ បន្ទាប់មកក្រុមអ្នកជំនាញបានប្រើប្រាស់ឧបករណ៍ ទែកម៉ូក្រាហ្វី (The rmography) ដើម្បីថតស្កេនលើសសរទាំងឡាយ ដើម្បរកមើលកម្រិតសំណើមក្នុងសសរនីមួយៗ ហើយក៏ប្រើឧបករណ៍ អ៊ុលត្រាសោន (Ultrasound) ដើម្បីថតផ្ទៃខាងក្នុងរបស់ថ្មដើម្បី ចង់ដឹងពីភាពពុកផុយរបស់វាកំរិតណាដែរ។
ព័ត៌មានជាតិ ថ្មីៗ
សូមបញ្ជាក់ថា ជារឿយអាជ្ញាធរជាតិអប្សរាតែយកចិត្ដទុកដាក់លើការជួសជុល ប្រាង្គប្រាសាទនានា ក្នុងរមណីយដ្ឋានអង្គរប្រកបដោយចីរភាព។ ជាមួយនោះរាល់ការជួសជុលនីមួយៗ ក្រុមអ្នកជំនាញតែសិក្សាស្វែងយល់យ៉ាងច្បាស់លាស់ ដើម្បីអភិរក្ស និងអភិវឌ្ឍន៍ប្រាសាទបុរាណ ឱ្យមានភាពស្រស់ស្អាតឡើងវិញ ហើយក្រុមអ្នកជំនាញបច្ចេកទេសជួសជុល គឺជាអ្នកជំនាញជាកូនខ្មែរសុទ្ធសាធ៕
អត្ថបទ និង រូបភាព៖ លោក បូ សាវី
កែសម្រួល៖ អ៊ុន ណារាជ្យ
