របៀបវារៈចំនួន៤ ដែលទាក់ទងទៅនឹងវិធានការបន្សាបបញ្ហាប្រឈម ក្នុងដំណើរទប់ស្កាត់ និងបង្ក្រាបបទល្មើសព្រៃឈើ អភិរក្សតំបន់ការពារធម្មជាតិ ត្រូវបានលើកយកមកពិភាក្សានៅក្នុងកិច្ចប្រជុំរបស់គណៈកម្មាធិកាសម្របសម្រួលបច្ចេកទេស នៃក្រុមប្រឹក្សាខេត្តសៀមរាប។
នៅក្នុងកិច្ចប្រជុំរបស់គណៈកម្មាធិការសម្របសម្រួលបច្ចេកទេសនៃក្រុមប្រឹក្សាខេត្តសៀមរាប នាព្រឹកថ្ងៃទី២៣ ខែធ្នូ ឆ្នាំ២០២១នេះ ត្រូវបានកំណត់របៀបវារៈចំនួន៤ ជាសំខាន់ សំដៅទៅលើការប្រើប្រាស់វិធានការចាំបាច់នានា ដើម្បីពង្រឹងការគ្រប់គ្រងធនធានធម្មជាតិ ដែលក្នុងនោះ គឺសំដៅទៅលើការធានា លើកកម្ពស់ប្រសិទ្ធភាពបង្ក្រាបបទល្មើស ដើម្បីទប់ស្កាត់ការបាត់បង់ព្រៃឈើបន្តទៀត។
លោក ង៉ាន់ ភិរុណ អភិបាលរងខេត្ត និងជាអនុប្រធានគណៈកម្មាធិការសម្របសម្រួលបច្ចេកទេសនៃក្រុមប្រឹក្សាខេត្តសៀមរាប លើកឡើងថា៖ កិច្ចប្រជុំនេះ គឺជាវេទិកាប្រមូលធាតុចូលពង្រឹងកិច្ចសហការនៃបណ្តាមន្រ្តីជំនាញពាក់ព័ន្ធជាសមាជិក សមត្ថកិច្ច សហគមន៍ និងអាជ្ញាធរមូលដ្ឋាន ព្រោះវាជាភារកិច្ចពហុវិស័យ។
ផ្អែកលើនិយមន័យ វិធានការកាត់បន្ថយបញ្ហាប្រឈម កិច្ចប្រជុំបានធ្វើដំណើរលើកការត្រួតពិនិត្យ និងពិភាក្សាអំពីការដឹកជញ្ជូនឈើតាមរទេះ និងតាមគោយន្តកន្រ្តៃនៅក្នុងតំបន់ ឬឆ្លងកាត់តំបន់ការពារធម្មជាតិ ដែលនេះគឺជារៀបវារៈសំខាន់ទី១។ សម្រាប់របៀបវារៈទី២ គឺបញ្ហាការធ្វើឡរធ្យូងក្នុងតំបន់ដែនជម្រកសត្វព្រៃនៅក្នុងភូមិសាស្រ្តនៃស្រុកជីក្រែង។ ការពិក្សាគ្នានៅក្នុងកិច្ចប្រជុំនោះ សកម្មភាពនៃការធ្វើឡធ្យូងមិនត្រឹមតែជាតម្រូវការក្នុងសហគមន៍នោះទេ តែជាស្ថិតក្នុងរូបភាពធ្វើអាជីវកម្មនាំចេញទៅខេត្តកំពង់ធំផងដែរ ដែលត្រូវចាត់វិធានការកាត់បន្ថយ ប្រើវិធានការអប់រំ មុនមានការបង្រ្កាប លុបបំបាត់នោះ។ ដោយឡែករបៀបវារៈទី៣ គឺការពង្រឹងឲ្យអនុវត្តលិខិតជម្រាបរបស់រដ្ឋបាលខេត្តលេខ ១៤៣៧ សជណ ចុះថ្ងៃទី០៨ ខែធ្នូ ឆ្នាំ២០២១ ស្តីពីការចាត់វិធានការបញ្ឈប់ទីតាំងរោងម៉ាស៊ីន រោងសន្និធិ និងរោងសិប្បកម្មកែច្នៃឈើនៅក្នុង និងនៅជិតតំបន់ការពារធម្មជាតិ។ កិច្ចការនេះគឺទាមទារឲ្យអាជ្ញាធរក្រុង-ស្រុក មន្ទីរជំនាញ និងសមត្ថកិច្ចសហការអនុវត្ត។ បើយោងតាមតារាងបញ្ជីទន្នន័យទីតាំងកែច្នៃឈើទាំងនោះ នៅក្នុងឬនៅក្បែរតំបន់ការពារធម្មជាតិ និងរបៀងអភិរក្សជីវចម្រុះ ក្នុងភូមិសាស្ត្រខេត្តសៀមរាប គិតត្រឹមខែកញ្ញាឆ្នាំ២០២១ រកឃើញមានចំនួន១៤៦ទីតាំង ក្នុងនេះមានចំនួនតែ៣ទីតាំងប៉ុណ្ណោះ ដែលមានច្បាប់។
ក៏ជាការជម្រុញបន្ថែមផងដែរ នៅក្នុងរបៀបវារៈទី៤ គឺការចាត់វិធានការ ឲ្យបញ្ឈប់ជាបន្ទាន់ និងមោឃភាព នូវរាល់ការចុះហត្ថលេខា ឬការបញ្ជាក់ទទួលស្គាល់លើលិខិតផ្ទេរសិទ្ធិ ពាក្យស្នើសុំកាន់កាប់ប្រើប្រាស់ដីធ្លី លិខិតទិញលក់ដីរដ្ឋ និងការបញ្ជាក់លើប្លង់បង្ហាញទីតាំងដី ជាអាទិ៦ ដែលធ្វើឡើងនៅលើដីក្នុងតំបន់ការពារធម្មជាតិ និងក្នុងរបៀងអភិរក្សជីវៈចម្រុះ។ កិច្ចការទាំងនេះ បាននិយាយរួចហើយនៅក្នុងលិខិតលេខ ៦៤៨ សជណ ចុះថ្ងៃទី៣១ ខែឧសភា ឆ្នាំ២០២១ របស់រដ្ឋបាលខេត្តសៀមរាប។ កិច្ចការទាំងនេះ ក្រសួងបរិស្ថានក៏បានព្រមានផងដែរ ចំពោះរដ្ឋបាលឃុំ-សង្កាត់ណា ដែលនៅតែបន្តបំពានចុះហត្ថលេខា ផ្តល់ជាកម្មសិទ្ធិឯកជន ក្នុងតំបន់ការពារធម្មជាតិ និងរបៀងអភិរក្សាជីវៈចម្រុះនៃដែនសមត្ថកិច្ចរបស់ខ្លួន នឹងចាត់វិធានការយ៉ាងម៉ឺងម៉ាត់តាមផ្លូវច្បាប់៕
អត្ថបទ និង រូបភាព៖ លោក ងឹន គីមឡេង
