លោក ពៅ ពិសិដ្ឋ អភិបាលរងខេត្តសៀមរាប បានមានប្រសាសន៍ថា បន្ទាប់ពីប្រមុខរាជរដ្ឋាភិបាលកម្ពុជា បានសម្រេចបើកដំណើរការប្រទេសឡើងវិញចាប់ពីខែវិច្ឆិកា ឆ្នាំ២០២១មកនោះ ពិសេសការបើកទទួលទេសចរអន្តរជាតិឡើងវិញ ក្រោមទម្រង់ជាទេសចរណ៍វ៉ាក់សាំងនោះ កាលពីថ្ងៃទី១៧ ខែធ្នូ ឆ្នាំ២០២១កន្លងមកនេះ មានអ្នកទេសចរចម្រុះជាតិសាសន៍ចំនួន៦៧នាក់ បានមកដល់ទឹកដីនៃខេត្តសៀមរាប តាមច្រកអាកាសយានដ្ឋានអន្តរជាតិសៀមរាប តាមជើងហោះហើរ នៃយន្តហោះរបស់ក្រុមហ៊ុន សាំងកាពួ អ៊ែរឡាញ ជាលើកដំបូងបន្ទាប់ពីអាក់ខានប្រមាណជា២ឆ្នាំដោយសារវិបត្តិជំងឺកូវីដ-១៩ ដែលនេះជាសញ្ញាល្អមួយក្នុងការជំរុញកំណើនសេដ្ឋកិច្ចរបស់កម្ពុជា ជាពិសេសខេត្តសៀមរាប ដូច្នេះបញ្ហាសំខាន់ក្នុងដំណាក់កាលនេះគឺ ត្រូវយកចិត្តទុកដាក់បំផុតចំពោះ សន្តិសុខ សុវត្ថិភាព និង សតិអារម្មណ៍សម្រាប់ពួកគាត់ ក្នុងពេលដែលពួកគាត់បានមកដល់ ពេលកំពុងស្នាក់នៅ និង ពេលត្រឡប់ទៅវិញ។
លោក ពៅ ពិសិដ្ឋ មានប្រសាសន៍បន្ថែមថា ក្រោយពីបានទទួលស្វាគមន៍ជើងហោះហើរដឹកជញ្ជូនភ្ញៀវទេសចរមកទស្សនាអង្គរ-សៀមរាប កន្លងមកនេះ មានបញ្ហាមួយចំនួនបានកើតឡើង គឺនៅថ្ងៃទី១៧ ,ថ្ងៃទី១៩ និងថ្ងៃទី២២ មានភ្ញៀវទេសចរបរទេសមួយចំនួនតូច ជួបប្រទះនឹងបញ្ហារាំងស្ទះដែលពុំបានឡើងយន្តហោះវិលត្រឡប់ទៅប្រទេសគោលដៅរបស់ខ្លួនវិញ ដោយសារតែបណ្តាភ្ញៀវទេសចរទាំងនោះ កាន់ប័ណ្ណសំគាល់លទ្ធផលធ្វើតេស្តកូវីដ-១៩ មិនផ្លូវការ ដែលចេញបញ្ជាក់ដោយគ្លីនិកឯកជន ដែលបញ្ហានេះបានធ្វើឲ្យប៉ះពាល់ដល់អារម្មណ៍ភ្ញៀវទេសចរ ដូច្នេះកិច្ចប្រជុំថ្ងៃនេះ គឺចង់បញ្ជាក់ប្រាប់ថា គ្លីនិកឯកជន ពុំមានសិទ្ធិក្នុងការចេញប័ណ្ណបញ្ជាក់លទ្ធផលធ្វើតេស្តកូវីដ-១៩ សម្រាប់ប្រើប្រាស់ចេញក្រៅប្រទេសឡើយ ហើយចាប់ពីពេលនេះតទៅ អាជ្ញាធរខេត្តនឹងចាត់វិធានការតាមផ្លូវច្បាប់ចំពោះគ្លីនិកឯកជនណា ដែលនៅបន្តចេញប័ណ្ណសម្គាល់លទ្ធផលតេស្តកូវីដ-១៩ជូនភ្ញៀវទេសចរបរទេស សម្រាប់ធ្វើដំណើរត្រឡប់ទៅប្រទេសខ្លួនវិញនោះ ព្រោះប័ណ្ណនោះមិនអាចមានតម្លៃជាផ្លូវការនោះឡើយ ។
លោក ពៅ ពិសិដ្ឋ មានប្រសាសន៍យ៉ាដូច្នេះ ក្នុងឱកាសអញ្ជើញជាអធិបតីក្នុងកិច្ចប្រជុំការងារមួយពាក់ព័ន្ធទៅនឹងសុវត្តិភាពភ្ញៀវទេសចរមកទស្សនា និងស្នាក់នៅខេត្តសៀមរាប នៅសាលប្រជុំសាលាខេត្តសៀមរាប នាព្រឹកថ្ងៃទី២៤ ខែធ្នូ ឆ្នាំ២០២១នេះ ដោយមានការចូលរួមពីមន្រ្តីជំនាញពាក់ព័ន្ធ ម្ចាស់ ឬតំណាងម្ចាស់គ្លីនិកឯកជននៅក្នុងក្រុងសៀមរាបជាច្រើនរូប ។
លោកវេជ្ជបណ្ឌិត ក្រុស សារ៉ាត់ ប្រធានមន្ទីរសុខាភិបាលនៃរដ្ឋបាលខេត្តសៀមរាប បានបញ្ជាក់ច្បាស់ដែរថា៖ មកដល់ពេលនេះ ពុំទាន់មានលិខិតបញ្ជាក់ ឬសេចក្តីណែនាំណាមួយ ចេញពីក្រសួងសុខាភិបាល អនុញ្ញាតឲ្យគ្លីនិកឯកជន មានសិទ្ធិអាចចេញលិខិតបញ្ជាក់ការធ្វើតេស្តកូវីដ-១៩ សម្រាប់ប្រើប្រាស់ធ្វើដំណើរចេញក្រៅប្រទេសនោះឡើយ បើទោះជាគ្លីនិកឯកជនទាំងនោះ មានសិទ្ធិព្យាបាលជំងឺកូវីដ-១៩ អនុញ្ញាតដោយក្រសួងសុខាភិបាលក៏ដោយ។
លោកបញ្ជាក់ទៀតថា៖ ជាផ្លូវការ រដ្ឋបាលខេត្តបានរៀបចំកំណត់រួចហើយ មណ្ឌលធ្វើតេស្តកូវីដ-១៩ ជូនអតិថិជនជាជនជាតិខ្មែរក្តីដែលមានតម្រូវការចេញក្រៅប្រទេស ឬសម្រាប់ភ្ញៀវបរទេសក្តី គឺនៅផ្លូវ៦០ ក្លឹបកីឡាសហភាពសហព័ន្ធយុវជនកម្ពុជាខេត្ត ហើយវាមិនមែនជាបញ្ហាសាមញ្ញនោះទេ ចំពោះលិខិតបញ្ជាក់លទ្ធផលធ្វើតេស្តកូវីដ-១៩ សម្រាប់ការប្រើប្រាស់ធ្វើដំណើរឆ្លងប្រទេសនេះ ដែលតាមនីតិវិធីស្តង់ដារប្រតិបត្តិវិធានសុវត្តិភាព SOP នៅកម្ពុជា គឺតម្រូវឲ្យភ្ញៀវមកពីបរទេសមានប័ណ្ណបញ្ជាក់លទ្ធផលតេស្តកូវីដ-១៩ PCR រយៈពេល៧២ម៉ោងមុនមកដល់គោលដៅ ពិសេសនោះ ភ្ញៀវបរទេសក៏ដូចជាភ្ញៀវខ្មែរដែរ ដែលត្រូធ្វើដំណើរចេញពីកម្ពុជា ឬក៏ជាដំណើរវិលត្រឡប់របស់ភ្ញៀវ ក៏តម្រូវឲ្យមានការប្រើប័ណ្ណសម្គាល់នេះដូចគ្នា វិភាគដោយម៉ាស៊ីនតេស្ត PCR ក្នុងតម្លៃរយៈពេល៧២ម៉ោងមុនទៅដល់គោលដៅ លើកលែងតែប្រទេសសឹង្ហបូរី មានតម្រូវការតម្លៃរយៈពេល៤៨ម៉ោងប៉ុណ្ណោះ។
លោកប្រធានមន្ទីរសុខាភិបាលនៃរដ្ឋបាលខេត្តសៀមរាប បញ្ជាក់បន្ថែមថា៖ ប័ណ្ណសម្គាល់លទ្ធផលតេស្តនេះ វាមានតម្លៃដ៏លើសលុប សម្រាប់ការចូលរួមបង្ការការឆ្លងនិងចម្លងកូវីដ-១៩ក្នុងតំបន់និងលើពិភពលោក តាមរយៈនៃការអនុវត្តនីតិវិធីស្តង់ដារប្រតិបត្តិវិធានសុវត្តិភាព SOP ហើយវាក៏ជារលកឥទ្ធិលពលនៃកតិត្តិយសជាតិផងដែរ បើសិនជាកម្ពុជា អនុវត្តបានល្អ ផ្តល់ទំនុកចិត្តជូនភ្ញៀវទេសចរ ទាំងការមកដល់ និងការវិលត្រឡប់ទៅវិញ ប្រកបដោយសុវត្ថិភាពនោះ។
គួររំលឹកថា ចាប់ពីថ្ងៃទី១៧ រហូតមកដល់ថ្ងៃទី២៣ ខែធ្នូ ឆ្នាំ២០២១នេះ មានអ្នកទេសចរចម្រុះជាតិសាសន៍ប្រមាណ ៤០០នាក់ បានមកដល់ទឹកដីនៃខេត្តសៀមរាប តាមច្រកអាកាសយានដ្ឋានអន្តរជាតិសៀមរាប ៕
អត្ថបទ និង រូបភាព ៖ លោក ងិន គឹមឡេង
កែសម្រួលអត្ថបទ ៖ លោក លីវ សាន្ត