កាលពីយប់ថ្ងៃទី២៥ ខែធ្នូ ឆ្នាំ២០២១ នៅក្នុងក្រុងសៀមរាប នៃរាត្រីបុណ្យណូអែល គឺមានបងប្អូនប្រជាពលរដ្ឋយ៉ាងច្រើនមកដើរលេងកំសាន្ត ខណ:ពេលដែលខេត្តនេះកំពុងត្រៀមលក្ខណ: សម្រាប់ពិធីឆ្លងឆ្នាំសកលនាពេលខាងមុខ ប្រកបដោយភាពស្រស់ស្អាត ដើមី្បលើកកម្ពស់សោភ័ណភាពក្រុងសៀមរាប ឱ្យកាន់តែស្រស់ត្រកាលឡើងវិញ ក្នុងការទាក់ទាញភ្ញៀវទេសចរជាតិ និងអន្តរជាតិ។ ក្នុងនោះមានបំពាក់ភ្លើងបំភ្លឺតាមដងផ្លូវសាធារណ: និងបំពាក់ភ្លើងសញ្ញាចរាចរណ៍ ព្រមទាំងរៀបចំតុបតែងសួនច្បារ និងស្ពានព្រះរាជដំណាក់ ក្នុងគោលបំណងចូលរួមអបអរឆ្នាំថ្មី ឆ្នាំសកល ឆ្នាំ២០២២ ស្របពេលដែលផ្លូវ ៣៨ខ្សែ គ្រោងនឹងបញ្ចប់តាមផែនការដែលបានគ្រោងទុកនោះ នៅចុងឆ្នាំនេះផងដែរ ។
នៅក្នុងបណ្ដាញសង្គមហ្វេសប៊ុករបស់ រដ្ឋបាលខេត្តសៀមរាប បានឱ្យដឹងថា ការងារការរៀបចំកែលម្អនេះ គឺជាការរំលេចចេញនូវសោភ័ណភាព បៃតងនៅតាមដងស្ទឹង តាមរុក្ខវិថីនានាក្នុងក្រុង និងបរិវេណព្រះអង្គចេក ព្រះអង្គចម ក៏ដូចជានៅតាមសួនច្បារ ដើម្បីរៀចំភ្លើងព័រណ៍ នាពេលរាត្រីឱ្យកាន់តែមានការទាក់ទាញចំណាប់អារម្មណ៍ពីសំណាក់បងប្អូនប្រជាពលរដ្ឋ ក៏ដូចជាភ្ញៀវទេសចរណ៍ជាតិ និងអន្តរជាតិ ឲ្យមកទស្សនាកម្សាន្តក្នុងឱកាសពិធីបុណ្យឆ្លងឆ្នាំថ្មី ឆ្នាំសកល ឆ្នាំ២០២២ នាពេលដ៏ខ្លីខាងមុខនេះផងដែរ។ ម្យ៉ាងទៀត ក៏ជាចំណែកមួយក្នុងការជួយជំរុញឲ្យការផ្សព្វផ្សាយពីសត្តានុពលរបស់ខេត្តសៀមរាប ក្នុងការស្តារឡើងវិញនូវរាល់វិស័យនានាក្នុងខេត្តសៀមរាប ឲ្យកាន់តែមានសន្ទុះខ្លាំងក្លាថែមទៀត។
ជាមួយគ្នានេះ រដ្ឋបាលខេត្តសៀមរាប ក៏សូមអំពាវនាវដល់បងប្អូនប្រជាពលរដ្ឋចូលរួមគោរពច្បាប់ចរាចរណ៍ ថែរក្សាបរិស្ថាន និងសណ្តាប់ធ្នាប់ឱ្យបានល្អប្រសើរឲ្យសក្តិសមជាខេត្តទេសចរណ៍វប្បធម៌ប្រវត្តិសាស្ត្រមួយនេះឆើតឆាយ តែ សូនចូលរួមអនុវត្តតាមការណែនាំរបស់ក្រសួងសុខាភិបាល និងវិធានការរបស់រាជរដ្ឋាភិបាល ៣.កុំ និង៣.ការពារ ទាំងអស់គ្នា ៕
អត្ថបទនិងរូបភាព: លោកស៊ាន សុផាត
កែសម្រួលដោយ លីវ សុខុន!!!
