នាព្រឹកថ្ងៃទី២៧ ខែធ្នូ ឆ្នាំ២០២១នេះ នៅសាលាខេត្តសៀមរាបមរាប បានទទួលអំណោយពីសមាគមសហព័ន្ធអភិវឌ្ឍន៍ដីធ្លី និងសំណង់កម្ពុជា ក្រោមអធិបតីភាពដ៏ខ្ពង់ខ្ពស់ ឯកឧត្តម ទៀ សីហា អភិបាលខេត្តសៀមរាប និងមន្ត្រីសាលាខេត្ត។ ម្ចាស់អំណោយមាន ឯកឧត្តម សួន រិនឌី អ្នកតំណាងរាស្ត្រមណ្ឌលរាជធានីភ្នំពេញ និងជាប្រធានក្រុមប្រឹក្សាភិបាលសមាគមសហព័ន្ធវិនិយោគិនកម្ពុជា និងឯកឧត្តមសមូហកបណ្ឌិត ឡី សុភាព ប្រធានសមាគមសហព័ន្ធវិនិយោគកម្ពុជា និងជាប្រធានសមាគមសហព័ន្ធអភវឌ្ឍន៍ដីធ្លី និងសំណង់កម្ពុជា បានចាត់តំណាងរបស់ឯកឧត្តម នាំយកមកប្រគល់ជូនដល់រដ្ឋបាលខេត្តសៀមរាប ក្នុងគោលបំណងបន្តចូលរួមប្រយុទ្ធប្រឆាំង និងទប់ស្កាត់ជំងឺកូវិដ-១៩ និងចែកជូនប្រជាពលរដ្ឋខ្វះខាត និងរងគ្រោះផ្សេងៗ ជាមួយរដ្ឋបាលខេត្តសៀមរាប ក៏ដូចជារាជរដ្ឋាភិបាលកម្ពុជាផងដែរ។
ក្នុងប្រសាសន៍ឯកឧត្តម ទៀ សីហា អភិបាលខេត្តសៀមរាប លើកឡើងថា បន្ទាប់ពីរាជរដ្ឋាភិបាល បានសម្រេចបើកប្រទេសឡើងវិញ ខេត្តសៀមរាប បានបង្ហាញនូវសកម្មភាពសេដ្ឋកិច្ច និងវិស័យទេសចរណ៍របស់ខ្លួនរស់ឡើងវិញជាបណ្ដើរៗ។ ទន្ទឹមនោះ រដ្ឋបាលខេត្ត ក៏នៅតែបន្តណែនាំដល់មន្ទីរ អង្គភាពពាក់ព័ន្ធ ព្រមទាំងក្រុមហ៊ុនឯកជននានាក្នុងខេត្ត ត្រូវបន្តយកចិត្តទុកដាក់ អនុវត្តសេចក្តីណែនាំរបស់ក្រសួងសុខាភិបាល និងវិធានការរបស់រដ្ឋាភិបាល គឺ៣ការពារ និង៣កុំ ជានិច្ច ព្រោះជំងឺកូវីដ-១៩ នៅតែបន្តគម្រាមគំហែងដល់ពិភពលោក និងប្រទេសកម្ពុជានៅឡើយទេ ដូចនេះរដ្ឋបាលខេត្តនៅតែបន្តយុទ្ធនាការប្រយុទ្ធប្រឆាំងជំងឺនេះយ៉ាងសកម្មដដែល ។
តាមរបាយការណ៍របស់រដ្ឋបាលខេត្ត បង្ហាញថា អំណោយ ដែលទទួលបាននេះ នឹងបន្តយកទៅដាក់សម្រាប់ប្រើប្រាស់ នៅតាមមណ្ឌលចត្តាឡីស័ក និង ប្រជាពលរដ្ឋខ្វះខាតជីវភាព ដោយសារគ្រោះហន្តរាយផ្សេងក្នុងខេត្ត ជាពិសេសនៅតាមក្រុង ស្រុក ។
ឯកឧត្តមអភិបាលខេត្ត ក៏បានថ្លែងអំណរគុណដល់ ឯកឧត្តម សួន រិនឌី អ្នកតំណាងរាស្ត្រមណ្ឌលរាជធានីភ្នំពេញ និងឯកឧត្តមសមូហកបណ្ឌិត ឡី សុភាព ប្រធានសមាគម ដែលបានបរិច្ចាគធនធានផ្ទាល់ខ្លួន និងសមាគម ជាការបង្ហាញពីវប្បធម៌ចែករំលែកជូនប្រជាពលរដ្ឋខ្វះខាត និងរងគ្រោះ ដែលជាកាយវិការមនុស្សធម៌ សម្រាប់សង្គមជាតិ។
គួរជម្រាបថា អំណោយដែលរដ្ឋបាលខេត្តទទួលបាននាពេលនេះរួមមាន អង្ករ ៥០០គ.ក, មីជាតិ៥០កេស, ទឹកស៊ីអុីវ និងទឹកត្រី ៣០០យូរ, ត្រីខ ៥០០កំប៉ុង, ទឹកបរិសុទ្ធ ៥០កេស, ជែលលាងសម្អាតដៃ ៩កេស និងទឹកថ្នាំសម្លាប់មេរោគ ព្រមទាំងម៉ាស៊ីនបាញ់សម្លាប់មេរោគចំនួន ១គ្រឿង៕
អត្ថបទ និងរូបភាព៖ លោកសេង ផល្លី
កែសម្រួលដោយ លីវ សុខុន!!!
