នៅក្នុងកិច្ចប្រជុំរបស់សមាគមក្រុមប្រឹក្សាថ្នាក់មូលដ្ឋានខេត្តសៀមរាប អណត្តិទី៣ ឆ្នាំ២០២១ បានបញ្ចេញឲ្យដឹងថា ខេត្តសៀមរាបត្រូវបានជ្រើសរើសជាដៃគូ អនុវត្តគម្រោងដោយឡែកមួយ (២០២១-២០២៦) មានឈ្មោះថា ភាពជាដៃគូសម្រាប់គំនិតច្នៃប្រឌិត លើការដឹកនាំរបស់ស្រ្តី នៅមូលដ្ឋាន !
នាព្រឹកថ្ងៃទី២៧ ខែធ្នូ ឆ្នាំ២០២១ សមាគមក្រុមប្រឹក្សាថ្នាក់មូលដ្ឋានខេត្តសៀមរាប ដោយមានកិច្ចសហការពីរដ្ឋបាលខេត្ត និងមន្រ្តីពាក់ព័ន្ធ បានរៀបចំកិច្ចប្រជុំក្រុមប្រឹក្សា និងគណ:កម្មាធិការប្រតិបត្តិ របស់សមាគមក្រុមប្រឹក្សាក្រុង-ស្រុក ឃុំ-សង្កាត់ ខេត្តសៀមរាប អាណត្តិទី៣ ឆ្នាំ២០២១ ក្រោមការចូលរួមដោយប្រធានសាខាសមាគមថ្នាក់ក្រុង-ស្រុកទាំង១២។ លោក សាមឡន ប្រធានក្រុមប្រឹក្សាថ្នាក់មូលដ្ឋានខេត្តសៀមរាប បានបង្ហាញអំពីគោលបំណង នៃកិច្ចប្រជុំនេះថា គឺដើម្បីពិនិត្យអនុម័តលទ្ធផលការងារ និងរបាយការណ៍ហិរញវត្ថុឆ្នាំ២០២១ ក៏ត្រូវបានពិនិត្យអនុម័តផងដែរ ផែនការសកម្មភាព និងថវិកាឆ្នាំ២០២២ ព្រមទាំងស្វែងរកប្រសិទ្ធភាពនៃការគាំទ្រ និងលើកទិសដៅសកម្មភាព អនុវត្តបន្តឆ្នាំ២០២២ ខាងមុខ។
ក្នុងមតិចូលរួមរបស់លោក គៀង សេងគី អនុប្រធានសម្ព័ន្ធភាពជាតិក្រុមប្រឹក្សាថ្នាក់មូលដ្ឋាន នៃព្រះរាជាណាចក្រកម្ពុជា បានឲ្យដឹងថា៖ សម្ព័ន្ធភាពជាតិ បានទទួលការគាំទ្រថវិកាមកពីរដ្ឋាភិបាល ប្រទេសកាណាដា តាមរយ:សហព័ន្ធទីក្រុង នៃប្រទេសកាណាដា ដើម្បីអនុវត្តលើគម្រោងមួយ រយ:ពេល៦ឆ្នាំ ( ២០២១-២០២៦ ) ដែលមានឈ្មោះថា ( ភាពជាដៃគូសម្រាប់ គំនិតច្នៃប្រឌិតរបស់ទីក្រុង លើការដឹកនាំរបស់ស្រ្តី )។ ចុងខែតុលា ឆ្នាំ២០២១កន្លងទៅនេះ ខេត្តសៀមរាប កែប កំពត កំពង់ឆ្នាំង និងខេត្តព្រៃវែង ត្រូវបានជ្រើសរើសជាដៃគូ ក្នុងការអនុវត្តគម្រោងនេះនៅមូលដ្ឋាន។
លោកបានវាយតម្លៃខ្ពស់ផងដែរ ចំពោះការខិតខំប្រឹងប្រែង ជំនះរាល់ការលំបាករបស់ទីប្រឹក្សា និងថ្នាក់ដឹកនាំសមាគមក្រុមប្រឹក្សាថ្នាក់មូលដ្ឋានខេត្តសៀមរាប ក្នុងការអនុវត្តសកម្មភាពស្របតាមលក្ខន្តិក: ដែលបានតំកល់ទុកនៅក្រសួងមហាផ្ទៃ ដើម្បីបំរើសមាជិករបស់ខ្លួនក្នុងឆ្នាំ២០២១កន្លងមក បើទោះជាត្រូវបានជួបបញ្ហាវិបត្តិកូវីដ-១៩ យ៉ាងណាក៏ដោយ។
ឯកឧត្តម អ៊ាន ឃុន ប្រធានក្រុមប្រឹក្សាខេត្តសៀមរាប បញ្ជាក់ថា៖ តាមរយ:នៃកិច្ចប្រជុំនេះ បានឆ្លុះបញ្ជាំងឲ្យឃើញអំពីការអនុវត្តយ៉ាងត្រឹមត្រូវនូវលក្ខន្តិក:របស់សមាគម ដែលជានីតិបុគ្គល តំណាងឲ្យសម្លេង និងជាអ្នកការពារផលប្រយោជន៍ក្រុមប្រឹក្សាក្រុង-ស្រុក ឃុំ-សង្កាត់ ក្នុងខេត្តសៀមរាប ព្រមទាំងជាអ្នកអភិវឌ្ឍសមត្ថភាព និងបង្កើនប្រសិទ្ធភាព នៃការផ្តល់សេវាសាធារណ:ជូនប្រជាពលរដ្ឋ ប្រកបដោយប្រសិទ្ធភាព តម្លាភាព គណនេយ្យភាព បរិយាប័ន្ន និងសមធម៌សង្គម ដែលនេះគឺជាចំណែកនៃការលើកកម្ពស់ជីវភាពរស់នៅ និងសុខុមាលភាពរបស់ប្រជាជន លើអភិបាលកិច្ច តាមបែបប្រជាធិបតេយ្យនៅមូលដ្ឋាន។
រាជរដ្ឋាភិបាលកម្ពុជា ទទួលស្គាល់ថា សមាគមក្រុមប្រឹក្សារដ្ឋបាលថ្នាក់ក្រោមជាតិ គឺជាដៃគូដ៏មានសារសំខាន់ ក្នុងដំណើរការរៀបចំ និងអនុវត្តគោលនយោបាយវិមជ្ឈការ និងវិសហមជ្ឈការកន្លងមក និងត្រូវបន្តចូលរួមកាន់តែសកម្មថែមទៀត ក្នុងដំណើរការរៀបចំ និងអនុវត្តកម្មវិធីជាតិ ដំណាក់កាលទី២ រយ:ពេល១០ឆ្នាំ ( ២០២១-២០៣០ ) ជម្រុញបន្ថែមការអភិវឌ្ឍតាមបែបប្រជាធិបតេយ្យនៅថ្នាក់ក្រោមជាតិ ដែលជាដំណាក់កាលធ្វើទំនើបកម្មប្រព័ន្ធ រចនាសម្ព័ន្ធ និងមុខងាររបស់រដ្ឋបាលថ្នាក់ក្រោមជាតិ។
តាមរយ:នៃកិច្ចប្រជុំនេះ ក៏បានឲ្យដឹងដែរថា៖ បច្ចុប្បន្ននេះ សមាគមអាជ្ញាធរមូលដ្ឋានពិភពលោកមានបណ្តាប្រទេសចំនួន១១៥ ជាសមាជិក ក្នុងនោះសម្ព័ន្ធភាពជាតិក្រុមប្រឹក្សាថ្នាក់មូលដ្ឋាននៃព្រះរាជាណាចក្រកម្ពុជា បានស្ថិតនៅជាសមាជិករបស់សមាគមពិភពលោកនេះដែរ។ ក៏ជាការកត់សម្គាល់ផងដែរ គឺនៅក្នុងបណ្តាប្រទេសជាសមាជិកអាស៊ានទាំង១០ មានតែប្រទេសចំនួន៥ ប៉ុណ្ណោះ ដែលមានសមាគមអាជ្ញាធរមូលដ្ឋាន ក្នុងនោះរួមមាន ឥណ្ឌូនេស៊ី ថៃ ហ្វីលីពីន វៀតណាម និងប្រទេសកម្ពុជា៕
អត្ថបទ និងរូបភាព: លោកងិន គីមឡេង កែសម្រួលដោយ លីវ សុខុន!!!
