សេចក្ដីព្រាងផែនការមេចង្អុលផ្លូវ ដែលជាការសិក្សាមូលដ្ឋាន សម្រាប់បង្កើតទីក្រុងឆ្លាតវៃសៀមរាប បានមកដល់ដំណាក់កាលចុងក្រោយហើយ ទន្ទឹមនោះគ្រោងបន្ទាប់ដែលជាជំហានទី២ គ្រោងនឹងអនុវត្តន៍នៅខែមេសា ឆ្នាំ២០២២ នេះបើតាមកិច្ចប្រជុំពិភាក្សា និងអនុម័ត ក្រោមវត្តមានឯកឧត្តម ទៀ សីហា អភិបាលខេត្តសៀមរាប អ្នកតំណាងទីភ្នាក់ងារសហប្រតិបត្តិការអន្តរជាតិជប៉ុន ហៅកាត់ថា JICA និងទីប្រឹក្សា និងជាអ្នកតំណាងក្រសួងដែនដី ហេដ្ឋារចនាសម្ព័ន្ធ ដឹកជញ្ជូននិងទេសចរណ៍ ហៅកាត់ថា MLIT ព្រមទាំងមានការចូលរួមដោយក្រុមអ្នកជំនាញ និងមន្ទីរ អង្គភាពពាក់ព័ន្ធរបស់ភាគីទាំងពីរ តាមរយៈកិច្ចប្រជុំតាមប្រព័ន្ធវីដេអូ នៅព្រឹកថ្ងៃទី២៧ ខែធ្នូ ឆ្នាំ២០២១។
ថ្លែងក្នុងកិច្ចប្រជុំនេះ ឯកឧត្តម ទៀ សីហា លើកឡើងថា តាមរយៈកិច្ចសហប្រតិបត្តិការដ៏ល្អរវាងរដ្ឋបាលខេត្ត និងភាគីជប៉ុន រយៈពេលជិត២ឆ្នាំកន្លងមកនេះ ក្រុមការងារជំនាញរបស់ក្រសួងពាក់ព័ន្ធ រដ្ឋបាលខេត្ត របស់កម្ពុជា ក៏ដូចជាក្រុមការងាររបស់ JICA បានសិក្សាលើការងារបច្ចេកទេស និងប្រមូលទិន្នន័យ ដែលឈានសម្រេចបាននូវលទ្ធផលដ៏គួរជាទីមោទននេះ។ ទន្ទឹមនោះ ក្រោមការគាំទ្រ ពី MLIT របស់ប្រទេសជប៉ុន ក្រុមអ្នកជំនាញ បាននិងកំពុងសិក្សាលើគម្រោង SMART JAMP ដែលជាមជ្ឈមណ្ឌលរក្សាទិន្នន័យអំពីទីក្រុងឆ្លាតវៃ ដើម្បីធ្វើការបំពាក់ប្រព័ន្ធកាមេរ៉ាសុវត្ថិភាព រួមនិងគម្រោងឆ្លាតវៃដទៃទៀតផងដែរ។
លើកឡើងក្នុងឱកាសនោះ លោកស្រី អាសុកា សុកាបូអ៊ីគី (Asuka Suboike) អ្នកតំណាង JICA គូសបញ្ជាក់ថា កិច្ចប្រជុំនាពេលនេះ គឺជាកិច្ចប្រជុំរបស់គណៈកម្មាធិការទីក្រុងវៃឆ្លាតលើកទី៦ នៃគម្រោងទីក្រុងវៃឆ្លាតខេត្តសៀមរាប របស់JICA និងជាកិច្ចប្រជុំរួម លើកទី២ របស់គណៈកម្មាធិការ នៃគម្រោង SMART JAMP របស់ MLIT ប្រទេសជប៉ុន។ កិច្ចប្រជុំនេះដែរ នឹងសុំការអនុម័តពីឯកឧត្តមអភិបាលខេត្ត លើផែនទីចង្អុលផ្លូវទីក្រុងឆ្លាតវៃសៀមរាប ដែលបានមកដល់ដំណាក់កាលចុងក្រោយ ហើយគម្រោងសិក្សាជាមូលដ្ឋាននេះ ក៏នឹងត្រូវបញ្ចប់នៅក្នុងមីនា ឆ្នាំ២០២២ ដែលជំនួសមកវិញនូវគម្រោងទី២ ដែលជាកិច្ចសហប្រតិបត្តិការបច្ចេកទេស ដែលឯកឧត្តម បានចុះហត្ថលេខាបន្តគម្រោងជាមួយអ្នកតំណាង JICA កាលពីថ្ងៃទី៨ ខែធ្នូ ឆ្នាំ២០២១នេះ។
បន្ទាប់ពីស្ដាប់ការធ្វើបទបង្ហាញ របស់ក្រុមអ្ងកជំនាញ របស់JICA រួចមក ឯកឧត្តម ទៀ សីហា បានសាទរចំពោះកិច្ចខិតខំប្រឹងប្រែងរបស់ JICA និង MLIT ដែលតែងតែយកចិត្តទុកជំរុញឱ្យក្រុងសៀមរាបក្លាយជាទីក្រុងឆ្លាតវៃនាពេលអនាគត ជាមួយនោះគម្រោងហេដ្ឋារចនាសម្ព័ន្ធផ្លូវ ៣៨ខ្សែ ដែលជាអំណោយដ៏ថ្លៃថ្លា របស់សម្ដេចតេជោ ហ៊ុន សែន នាយករដ្ឋមន្ត្រីនៃកម្ពុជា សម្រាប់ខេត្តសៀមរាប នឹងជាសមិទ្ធផលជួយពន្លឿនការអភិវឌ្ឍ និងលើកកម្ពស់ជីវភាពប្រជាពលរដ្ឋក្នុងខេត្ត ឱ្យកាន់តែឆាប់រហ័សនាពេលអនាគត។
គួរជម្រាបថា គម្រោងទីក្រុងឆ្លាតវៃសៀមរាប មានទិសដៅឆ្ពោះទៅបង្កើតទីក្រុងប្រកបដោយចីរភាពមួយ ដែលមានផាសុខភាពខ្ពស់ សម្រាប់ប្រជាពលរដ្ឋ និងទីក្រុងដ៏ទាក់ទាញ ដែលទទួលបានការពេញចិត្តខ្លាំងពីភ្ញៀវទេសចរជាមួយនឹងមោទនភាពនៃទីក្រុងបេតិកភណ្ឌ និងទេសចរណ៍អន្តរជាតិ។
អត្ថបទ : សេង ផល្លី
រូបភាព : វី សុវត្ត
