នៅថ្ងៃទី២៧ ខែធ្នូ ឆ្នាំ២០២១ ក្រសួងបរិស្ថាន តាមរយៈមន្ទីរបរិស្ថានខេត្តសៀមរាប បានផ្តល់បណ្ណសរសើរប្រតិបត្តិមេត្រីភាពបរិស្ថានប្រគេនដល់វត្តរាជបូណ៌ វត្តដំណាក់ និងវត្តបារាយមហានទីរតនារាម ហៅវត្តស្វាយរមៀត ស្ថិតក្នុងក្រុងសៀមរាប ខេត្តសៀមរាប បន្ទាប់ពីបានពិនិត្យនិងវាយតម្លៃឃើញថា វត្តអារាមទាំងបីនេះ បានចូលរួម និងប្រតិបត្តិមេត្រីភាពបរិស្ថានល្អ និងបានគិតគូរខ្ពស់ពីបញ្ហាបរិស្ថាន ទាំងការទុកដាក់វេចខ្ចប់ និងញែកដាច់ដោយឡែក រវាងសំណល់រឹង សំណល់រាវ និងសំណល់ផ្លាស្ទិកជាដើម។
លោក ស៊ុន គង់ ប្រធានមន្ទីរបរិស្ថានខេត្ត បានថ្លែងការកោតសរសើរចំពោះវត្តទាំង៣ ដែលកន្លងមកបានអនុវត្ត មេត្រីភាពបរិស្ថាន និងគោរពតាមបទដ្ឋាន នៃបរិស្ថានបានល្អ និងបានលើកឡើងពីការចូលរួម របស់ព្រះសង្ឃក្នុងសកម្មភាពសម្អាតអនាម័យបរិស្ថានក្នុងទីអារាមដូចជាការសំអាត់បរិស្ថានជុំវិញវត្តជាប្រចាំ និងការដាក់ពង្រាយធុងសំរាម នៅតាមទីសាធារណៈនានាក្នុងវត្ត ការញែកសំណល់នៃសំរាមដាច់ដោយឡែកពីគ្នា រួមទាំងការដាំកូនឈើ និងការបង្កើតជាសួនផ្កា និងសួនបន្លែផងដែរ ។
លោក ស៊ុន គង់ មានប្រសាសន៍ថា ចំពោះការវាយតម្លៃមេត្រីភាពបរិស្ថាននេះ ត្រូវបានកំណត់ចំពោះរូបវន្តបុគ្គល និងនីតិបុគ្គល។ ក្នុងឆ្នាំ២០២១នេះ ក្រសួងបរិស្ថានបានប្រគេន និងផ្តល់ជូននូវបណ្ណសរសើរមេត្រីភាពបរិស្ថានចំនួន ១២ប័ណ្ណ ដល់អាជ្ញាធរពាក់ព័ន្ឋ សាលារៀន និងវត្តទាំង៣នេះ។ ចំពោះវត្តទទួលបានបណ្ណសរសើរមេត្រីភាពបរិស្ថាននេះ បានបំពេញតាមលក្ខណៈវិនិច្ឆ័យ និងសូចនាករចំនួន ៦ចំណុចសំខាន់ៗគឺ ១.មានចក្ខុវិស័យបរិស្ថាន ២.ហេដ្ឋារចនាសម្ពន្ធ័ ៣.ប្រតិបត្តិមេត្រីភាពបរិស្ថាន ៤.លំហបៃតង ៥.ការបញ្ជ្រាបចំណេះដឹងបរិស្ថាន និង៦.ការអនុវត្តច្បាប់ និងលិខិតបទដ្ឋានគតិយុត្តបរិស្ថាន។
ព្រះតេជគុណព្រះសច្ចានុបាល ភទ្ទកោ នឿម វុទ្ធី ព្រះចៅអធិការវត្តស្វាយរមៀត មានសង្ឃដិកាថា មុននឹងក្រសួងបរិស្ថានបានប្រគេនជូនប័ណ្ណសរសើរប្រតិបត្តិមេត្រីភាពបរិស្ថានន គឺបន្ទាប់ពីរយៈពេលកន្លងមក ក្រសួងបានចុះធ្វើការវាយតម្លៃ និងដាក់ពិន្ទុទៅលើចំនុចមួយចំនួនដូចជា៖ បញ្ហាសំរាម ធុងសំរាម បញ្ហាអនាម័យ ជាពិសេសនោះ គឺការបង្កើត និងការថែទាំសួនផ្សេងៗ។ ក្នុងនោះព្រះសង្ឃនៅក្នុងវត្តស្វាយរមៀត ជាប្រចាំតែងតែយកចិត្តទុកដាក់ទៅបញ្ហាទាំងអស់នេះ ទើបវត្តមានឱកាសបានទទួលនូវប័ណ្ណសសើរ ប្រតិបត្តិមេត្រីភាពបរិស្ថាន ពីក្រសួងបរិស្ថាន៕
អត្ថបទ និង រូបភាព៖ លោក យូ វង្ស
កែសម្រួល៖ អ៊ុន ណារាជ្យ
