ទេសចរណ៍គឺជាវិស័យមួយដ៏សំខាន់ ដែលត្រូវបានឈរលើខ្សែបន្ទាត់សេដ្ឋកិច្ចជាតិ និងសេដ្ឋកិច្ចមូលដ្ឋានផងដែរ។ វិស័យនេះ បានផ្តល់ឱកាសការងារធ្វើដល់ប្រជាពលរដ្ឋទាំងប្រយោលផង និងដោយផ្ទាល់ផងដែរ ក៏ប៉ុន្តែអ្វីដែលអាចធានាបាននូវនិរន្តរភាពចំណូលសេដ្ឋកិច្ចតាមរយៈនៃវិស័យនេះ គឺចំណេះជំនាញពិតប្រាកដ។
ឯកឧត្តម តុប សុភ័ក រដ្ឋលេខាធិការក្រសួងទេសចរណ៍ តំណាងខ្ពង់ខ្ពស់ឯកឧត្តមរដ្ឋមន្រ្តី ថោង ខុន បានលើកឡើងយ៉ាងដូច្នេះនារសៀលថ្ងៃទី២៥ ខែធ្នូ ឆ្នាំ២០២១ នៅភ្នំចង្រ្កានរយ ស្រុកវារិន នៃខេត្តសៀមរាប ក្នុងឱកាសបិទវគ្គបណ្តុះបណ្តាលជំនាញសហគ្រិនភាព ការគ្រប់គ្រងសហគមន៍ ជំនាញទេសចរណ៍ បដិសណ្ឋារកិច្ច និងជំនាញចម្អិនម្ហូបអាហារ។ វគ្គបណ្តុះបណ្តាលនេះមានរយៈពេល៥ថ្ងៃ រួមមានសិក្ខាកាម៦៥នាក់ មកពីសហគមន៍ទេសចរណ៍ជនបទចំនួន៥ ៖ សហគមន៍អេកូទេសចរណ៍-ចាន់សត្បូង ចាន់សជើង សហគមន៍អេកូទេសចរណ៍-ទឹកជប់ខ្នារពោធិ៍ នៃស្រុកសូទ្រនិគម សហគមន៍ទេសចរណ៍ធម្មជាតិ-ត្រាវកុដិ នៃស្រុកប្រាសាទបាគង និងសហគមន៍ទេសចរណ៍ធម្មជាតិ-ចង្ក្រានរយ នៃស្រុកវារិន្ទ។
ការផ្តាំផ្ញើរបស់គណៈអធិបតី គឺសំដៅឲ្យប្រជាសហគមន៍ដែលបានទទួលយកការបណ្តុះបណ្តាលនេះ យកចំណេះជំនាញទៅប្រើប្រាស់ ដើម្បីលើកកម្ពស់គុណភាពសេវាកម្ម គុណភាពផលិតផលទេសចរណ៍ បង្កើនទំនុកចិត្តដល់ភ្ញៀវ ស្របពេលដែលខេត្តសៀមរាប ទាញយកបានមកវិញ នូវចរន្តភ្ញៀវទេសចរផ្ទៃក្នុងជាបណ្តើរៗហើយនោះ។ ជោគជ័យនិងវឌ្ឍនភាពសហគមន៍ គឺអាស្រ័យទៅលើការងារគ្រប់គ្រង បដិសណ្ឋារកិច្ច សេវាល្អ ម្ហូបអាហារមានរសជាតិឆ្ងាញ់ មានអនាម័យ តម្លៃសមរម្យ ទាំងអស់នេះ រួមគ្នាបង្កើតបាននូវភាពទាក់ទាញ ហើយភ្ញៀវដែលបានមកម្តងហើយ គឺចង់មកម្តងទៀត ហើយតាមរយៈនៃសម្បទាសេវាល្អនេះ ការផ្សព្វផ្សាយនិងកើតមានដោយស្វ័យប្រវត្តិ ចេញពីការវាយម្លៃរបស់អតិថិជនជាភ្ញៀវ យ៉ាងពិតប្រាកដ។
បង្ហាញនូវក្តីសោមនស្ស កក់ក្តៅ ចំពោះការផ្តល់បណ្តុះបណ្តាលនេះ ដែលសមាជិកសហគមន៍ទែសចរណ៍នៅជនបទ ទើបបានទទួលជាលើកដំបូងនេះ តំណាងសិក្ខាកាម ( លោកស្រី ឈឿន សុឌី ) ប្រធានសហគមន៍ទេសចរណ៍ធម្មជាតិចង្ក្រានរយ បានលើកឡើងដោយក្តីរំភើបយ៉ាងដូច្នេះថា៖ គ្មានអ្វីក្រៅពីការដឹងគុណ និងយកចំណេះដឹងនេះ ទៅប្រើប្រាស់ឲ្យមានប្រយោជន៍ ចម្រើនលូតលាស់ក្នុងសហគមន៍ និងត្រៀមទទួលភ្ញៀវឲ្យបានល្អបំផុតនៅពេលខាងមុខនេះ។
ព័ត៌មានជាតិ ថ្មីៗ
វគ្គបណ្តុះបណ្តាលនេះ រៀបចំឡើងដោយក្រសួងទេសចរណ៍ សហការជាមួយរដ្ឋបាលខេត្ត ឧបត្ថម្ភថវិកាដោយក្រសួងសេដ្ឋកិច្ច និងហិរញ្ញវត្ថុ ជាមួយសហគ្រិនខ្មែរ។ សូមបញ្ជាក់ដែរថា៖ ក្រសួងទេសចរណ៍ បានចុះអនុស្សារណៈនៃការយោគយល់គ្នាជាមួយសហគ្រិនខ្មែរ នាចុងខែសីហាឆ្នាំ២០២១ ដោយផ្តោតទៅលើគម្រោងជម្រុញចលនាទេសចរណ៍ផ្ទៃក្នុង និងលើកកម្ពស់សកម្មភាពទេសចរណ៍សហគមន៍ ក្នុងបរិបទកូវីដ-១៩ ក្នុងនោះគឺការរុញច្រានចលនាទេសចរណ៍ ទៅកាន់តំបន់សហគមន៍សំខាន់ៗចំនួន៥ មាននៅសៀមរាប បាត់ដំបង និងពោធិសាត់។ វគ្គបណ្តុះបណ្តាលនេះ គឺជាសកម្មភាពសំខាន់របស់គម្រោង ជាមួយនិងការផ្សព្វផ្សាយអំពីតំបន់សហគមន៍ផងដែរ ក្រោមកិច្ចសហការជាមួយវិស័យឯកជន៕
អត្ថបទ និង រូបភាព ៖ លោក ងិន គឹមឡេង
