នៅរសៀលថ្ងៃទី២៣ ខែធ្នូ ឆ្នាំ២០២១ម្សិលមិញនេះ ប្រជាពលរដ្ឋខ្វះខាតក្នុងជីវភាពប្រចាំថ្ងៃចំនួន ១០គ្រួសារ ក្នុងភូមិវត្តដំណាក់ សង្កាត់សាលាកំរើក ក្រុងសៀមរាប ដែលក្នុងនោះគ្រួសារខ្លះប្រភេទក្រ១ និងក្រ២ និងគ្រួសារខ្លះជាចាស់ជរា ស្ត្រីម៉េម៉ាយកូនច្រើន បានទទួលអំណោយជាថវិកា និងសម្ភារប្រើប្រាស់ផ្ទះបាយ រួមនឹងស្បៀងអាហារមួយចំនួន ដើមម្បីយកទៅដោះស្រាយក្នុងជីវភាពប្រចាំថ្ងៃ។ ដោយអំណោយទាំងអស់នេះដែរ បានមកពីការផ្ដួចផ្ដើមពីព្រះគ្រូធម្មវិសុទ្ឋិរង្សី ឡាច ចន្ថា ចៅអធិការវត្តដំណាក់ ក្រុងសៀមរាប ព្រះតេជគុណ ពេជ្រ តារា គ្រូសូត្រស្តាំ គណៈកម្មការវត្ត ព្រះសមុហ៍គណខេត្ត ព្រះវិន័យធរគណខេត្ត ព្រះរាជាគណៈ និងព្រះចៅអធិការវត្តមួយចំនួនក្នុងក្រុងសៀមរាប រួមនឹងលោក សាម ឡន ចៅសង្កាត់សាលាកំរើក និងសប្បុរសជនជាច្រើននាក់ផង។
ព្រះគ្រូធម្មវិសុទ្ឋិរង្សី ឡាច ចន្ថា មានសង្ឃដីកាថា សម្ភារដែលយកមកចែកជូននេះ គឺទទួលបានពីសប្បុរសជន និងញាតិញោមជិតឆ្ងាយយកមកប្រគេន ហើយព្រះសង្ឃ និងគណៈកម្មការវត្តបានបែងចែកទុកជូនពួកគាត់ ដោយក្នុងមួយគ្រួសារទទួលបាន ថវិកាចំនួន ៨ម៉ឹនរៀល អង្ករ ៥០គីឡូក្រាម ,ទឹកសុទ្ឋ ១យួរ ,មី ១កេស ,ទឹកស៊ីអ៊ីវ ,ទឹកត្រី និងសម្ភារប្រើប្រាស់សម្រាប់ផ្ទះបាយមួយចំនួនទៀត។
បើតាមព្រះគ្រូមុនីបញ្ញាញាណ ស៊ុម ពិសិទ្ធិ ព្រះរាជាគណៈថ្នាក់កិត្តិយស ព្រះសមុហ៍គណខេត្ត និងជាព្រះចៅអធិការវត្តប្រាសាទចន្ទរង្សី ហៅវត្តគោកចាន់ ឃុំអំពិល ស្រុកប្រាសាទបាគង បានបង្ហាញនូវព្រះទ័យគិតគូពីសុខទុក្ខ និងការលំបាករបស់បងប្អូនពុទ្ឋបរិស័ទដែលមានជីវភាពខ្វះខាត ដោយសាររងនូវផលប៉ះពាល់នៃជំងឺកូវីដ-១៩ បណ្តាលឱ្យកូនចៅ និងសមាជិកគ្រួសារមួយចំនួនបាត់បង់ការងារ បាត់បង់ប្រាក់ចំណូលក្នុងគ្រួសារជាដើម។ ព្រះអង្គបានចាត់ទុក ក្តីលំបាកលំបាកទាំងអម្បាលមាណរបស់ប្រជាពុទ្ឋបរិស័ទក៍ជាទុក្ខ និងក្តីលំបាកលំបាករបស់ព្រះសង្ឃដែរ ព្រោះថា ព្រះសង្ឃអាស្រ័យភោជន និងចតុបច្ច័យពីប្រជាពុទ្ឋបរិស័ទៗជាអ្នកមានគុណចំពោះភិក្ខុសង្ឃ បើពួកគាត់ជួបទុក្ខលំបាកហើយព្រះសង្ឃក៍មិនអាចនៅស្ងៀមបាន គឺតែងតែប្រមូលគៀរគរសម្ភារស្បៀងអាហារយកមកចែកជូនទៅតាមលទ្ឋភាពដែលក្រុមព្រះសង្ឃមាន។
ក្នុងឱកាសនោះដែរ លោក សាម ឡន ចៅសង្កាត់សាលាកំរើក ក្រុងសៀមរាប បានមានប្រសាសន៍ថ្លែងអំណរព្រះគុណនូវការយកព្រះទ័យទុកដាក់របស់ព្រះសង្ឃ និងគណៈកម្មការវត្តដំណាក់ សម្រាប់ជួយសម្រួលដោះស្រាយការលំបាកដល់បងប្អូនប្រជាពលរដ្ឋក្នុងមូលដ្ឋានជាច្រើនលើកច្រើនគ្រាមកហើយ ស្របពេលបងប្អូនប្រជាពលរដ្ឋក្នុងសង្កាត់នេះមួយចំនួន ពួកគាត់ពិតជាជួបការលំបាកក្នុងជីវភាពមែន ទាំងការងារ និងកិច្ចការជួញដូររបស់ពួកគាត់ខ្លះត្រូវបានផ្អាក ឬមិនដំណើរការ ចំណូលគ្រួសារតិចជាដើម។ បើទោះជារាជរដ្ឋាភិបាលបើកដំណើរការប្រទេសឡើងវិញ ជាមួយនឹងយុទ្ឋសាស្ត្ររៀនរស់តាមគន្លងថ្មីជាមួយកូវីដ-១៩ក្តី ក៍គ្រួសារខ្លះនៅជួបផលប៉ះពាល់ទៅនឹងអាជីវកម្មរបស់ពួកគាត់ផងដែរ។ តែយ៉ាងណាក៍អាជ្ញាធរសង្កាត់តែងតែខ្វល់ខ្វាយ និងគិតគូរគៀងគរការចូលរួម ពីសប្បុរសជននានាទោះតិចក្តីច្រើនក្តី យកមកឧបត្ថម្ភជូនដល់ពួកគាត់ដែរជាបន្តបន្ទាប់។
លោក សាម ឡន ក៏បានអំពាវនាវឱ្យប្រជាពលរដ្ឋ ត្រូវចូលរួមក្នុងការរៀនរស់តាមបែបគន្លងថ្មីជាមួយកូវីដ-១៩ ទាំងអស់ ជាពិសេស កុំភ្លេចបន្តរួមគ្នាអនុវត្តឱ្យបានខ្ជាប់ខ្ជួន នូវសេចក្តីណែនាំរបស់រដ្ឋបាលខេត្ត សេចក្តីអំពាវនាវនានា របស់ក្រសួងសុខាភិបាល និងវិធានការរបស់រាជរដ្ឋាភិបាល ៣ការពារ និង៣កុំ ក្នុងការទប់ស្កាត់ដល់ការឆ្លងជំងឺកូវីដ-១៩ ត្រូវប្រកាន់ខ្ជាប់នូវការរក្សា សំអាតអនាម័យស្អាត ត្រូវពាក់ម៉ាស់ឱ្យបានត្រឹមត្រូវ លាងដៃជាមួយសាប៊ូ អាល់កុល ឬជែល និងត្រូវរក្សាគម្លាតសុវត្ថិភាពសង្គមជាដើម៕
អត្ថបទ និង រូបភាព៖ លោក យូ វង្ស
កែសម្រួល៖ អ៊ុន ណារាជ្យ
