រាជរដ្ឋាភិបាលជប៉ុន តាមរយៈទីភ្នាក់ងារសហប្រតិបត្តិការអន្តរជាតិ នៃប្រទេសជប៉ុន ដែលហៅកាត់ថា JICA ក្រោមគម្រោងអភិវឌ្ឍន៍ធ្វើឲ្យប្រសើរឡើងដល់មន្ទីរពេទ្យបង្អែកខេត្តសៀមរាប បានសម្រេចផ្ដល់នូវអគារព្យាបាលអ្នកជំងឺមួយខ្នង កម្ពស់៤ជាន់ មានតម្លៃប្រមាណ១៩លានដុល្លារអាម៉េរិក ជូនដល់មន្ទីរពេទ្យបង្អែកខេត្ដសៀមរាប ដែលមានគ្រែសម្រាប់អ្នកជំងឺជាង២០០គ្រែ ។
ថ្លែងក្នុងឱកាសប្រារព្ធពិធីបញ្ចុះបឋមសិលាសាងសង់ជាផ្លូវការ កាលពីព្រឹកថ្ងៃទី២៣ ខែធ្នូ ឆ្នាំ២០២១នេះ លោកវេជ្ជបណ្ឌិត ក្រុស សារ៉ាត់ ប្រធានមន្ទីរសុខាភិបាល នៃរដ្ឋបាលខេត្ដសៀមរាប បានឲ្យដឹងថា មន្ទីរពេទ្យបង្អែកខេត្តសៀមរាប ជាមន្ទីរពេទ្យសាធារណៈដែលផ្តល់សេវាសំណុំសកម្មភាពបង្រ្គប់កំរឹត៣ ដែលមានគ្រែអ្នកជំងឺសម្រាកព្យាបាលចំនួន៣៧០គ្រែ ដែលបានផ្តល់សេវាប្រកបដោយគុណភាព ប្រសិទ្ធិភាព ជូនបងប្អូនប្រជាពលរដ្ឋគ្រប់ទិសទីដោយមិនប្រកាន់ពូជសាសន៍ និន្នាការនយោបាយ ពិសេសបានពង្រីកហេដ្ឋារចនាសម្ព័ន្ធ និងសេវាបន្ថែមទៀតជាច្រើន ដែលសេវាទាំងនោះ មន្ទីរពេទ្យបង្អែកខេត្តដ៍ទែទៀតមិនអាចធ្វើបាន ប៉ុន្តែមន្ទីរពេទ្យនេះក៏នៅមានចំណុចសំខាន់ៗជាច្រើនទៀតដែលត្រូវធ្វើការពង្រឹង និងពង្រីកសេវាបន្ត ព្រមទាំងតម្រូវការគាំទ្រ ដើម្បីដំណើរការនៃការអភិវឌ្ឍន៍មន្ទីរពេទ្យនេះឱ្យកាន់តែប្រសើរឡើង ពិសេសតម្រូវការចាំបាច់បំពាក់នូវឧបករណ៍សម្ភារៈវេជ្ជសាស្រ្តទំនើបបន្ថែមនៅតាមផ្នែកនីមួយៗ និងការពង្រីកហេដ្ឋារចនាសម្ព័ន្ធ អគារថ្មីបន្ថែមជាដើម។
លោកបានបន្ដថា ក្រោមការខិតខំរបស់រាជរដ្ឋាភិបាលកម្ពុជា ក្នុងកិច្ចទំនាក់ទំនងជាមួយទីភ្នាក់ងារសហប្រតិបត្តិការអន្តរជាតិ នៃប្រទេសជប៉ុន គម្រោងអភិវឌ្ឍន៍មន្ទីរពេទ្យបង្អែកខេត្តសៀមរាបបានសម្រេចជាផ្លែផ្កា ដោយទទួលបាននូវជំនួយឧបត្ថមពីរដ្ឋាភិបាលជប៉ុននូវអគារមួយខ្នងមានផ្ទៃក្រឡាសំណង់ទំហំ ៧.២៦០ ម៉ែត្រការ៉េ កំពស់៤ជាន់ ប្រវែង២៥ ម៉ែត្រគុណនឹង ៦៩ ម៉ែត្រ ដែលនឹងត្រូវប្រើប្រាស់សម្រាប់សេវាឯកទេស វះកាត់ សេវាសង្រ្គោះបន្ទាន់ និងសេវាពាក់ព័ន្ធផ្សេងៗទៀត ពិសេសអគារមន្ទីរពេទ្យថ្មីនេះមានលក្ខណៈជាស្តង់ដារ ជាមន្ទីរពេទ្យដែលមានផាសុភាព មានកម្រឹតបង្កការ ចំលងរោគកម្រិតទាប មានបំពាក់ជណ្តើរយោង និងមានភាពងាយស្រួលក្នុងការប្រើប្រាស់ ដែលមានចំនួនគ្រែសរុបចំនួន២២០គ្រែ ដែលទទួលអ្នកជំងឺទៅតាមជាន់នីមួយៗ។
លោក ថាដាសិ អូហ្គាសាវ៉ារ៉ា (Tadashi Ogasawara) ទីប្រឹក្សាគម្រោង (Project Formulation Advisor) មានប្រសាសន៍ថា ការផ្ដល់អគារនៃមន្ទីរពេទ្យបង្អែកនេះ មានគោលបំណងធ្វើឱ្យប្រសើរឡើងនូវគុណភាពនៃសេវាសុខភាព និងការពង្រីកការគ្របដណ្តប់សេវាសុខភាពនៅក្នុងតំបន់នេះ តាមរយៈការសាងសង់អគារ បំពាក់សម្ភារៈបរិក្ខារទំនើបៗ ក៏ដូចជាការផ្តល់ឧបករណ៍វេជ្ជសាស្ត្រផងដែរ ហើយលោកសង្ឃឹមថា គម្រោងនេះ នឹងក្លាយជាផ្នែកមួយក្នុងការបំពេញតម្រូវការរបស់មន្ទីរពេទ្យនេះ។
មានប្រសាសន៍ក្នុងឱកាសនោះលោក ពិន ប្រាកដ អភិបាលរងខេត្តសៀមរាប បានថ្លែងអំណរគុណយ៉ាងជ្រាលជ្រៅបំផុត ចំពោះរាជរដ្ឋាភិបាលជប៉ុន ដែលបានផ្តល់ជំនួយ តាមរយៈ JICA សម្រាប់ការសាងសង់អគារមន្ទីរពេទ្យបង្អែកថ្មីខេត្តសៀមរាបនាពេលនេះ ហើយនេះគឺជាការចូលរួមចំណែកយ៉ាងធំធេង ជាមួយរាជរដ្ឋាភិបាលកម្ពុជា ពិសេសជាមួយខេត្ត ក្នុងការលើកកម្ពស់វិស័យសុខាភិបាលខេត្តមួយនេះ ឱ្យកាន់មានភាពទំនើបស៊ីវីល័យ។
សូមជម្រាបថា អគារទំនើបនេះ គឺ ៖
នៅជាន់ផ្ទាល់ដី មានផ្នែកទទួលជំងឺ និងពិគ្រោះជំងឺក្រៅ , ផ្នែកសង្រ្គោះបន្ទាន់ (Emergency) , ផ្នែករូបភាពវេជ្ជសាស្រ្ត (ថតដោយកាំរស្មីអ៊ិច ឆ្លុះអេកូសាស្រ្ត ថតដោយម៉ាស៊ីនស៊ីធីស្កេន) , ផ្តល់ឱសថ និងបញ្ជរបង់ប្រាក់។ ជាន់ទី១ ជាផ្នែកសល្យាសាស្រ្ត និងដាក់ថ្នាំសណ្តំដែលមានបន្ទប់វះកាត់សរុប ៦ បន្ទប់ មានផ្នែកថែទាំក្រោយវះកាត់ ផ្នែកប្រពោធនកម្មវះកាត់ និងមជ្ឈមណ្ឌលស្តេរីលរួម។ ជាន់ទី២ និងទី៣ ខាងលើជាផ្នែកសម្រាកពេទ្យនៃជំងឺវះកាត់ដែលមានបែងចែកតាមឯកទេស ដែលក្នុងនោះផ្នែកវះកាត់ឆ្អឺងសន្លាក់និងរបួសគ្រាំគ្រា (Trauma and Orthopedic surgery) , ផ្នែកវះកាត់ប្រព័ន្ធប្រសាទ(Neurology Surgery) , ផ្នែកវះកាត់សរីរាង្គពោះនិងទ្រូង(Abdominal and thoracic surgery) , ផ្នែកវះកាត់ម៉ូត្រសាស្រ្ត (Urology Surgery) និងផ្នែកត្រចៀក ច្រមុះ បំពង់ក ៕
អត្ថបទ និង រូបភាព ៖ លោក ឈិត សាវី
កែសម្រួលអត្ថបទ ៖ លោក លីវ សាន្ត
