នៅថ្ងៃទី២៨ ខែធ្នូ ឆ្នាំ២០២១ គម្រោងពិពិធកម្មកសិកម្មកម្ពុជានៃក្រសួងកសិកម្មរុក្ខាប្រមាញ់ និងនេសាទ សហការជាមួយមន្ទីរកសិកម្មរុក្ខាប្រមាញ់ និងនេសាទខេត្ត រដ្ឋបាលស្រុកជីក្រែង ក្រោមការគាំទ្រមូលនិធិពីធនាគារពិភពលោក បានរៀបចំសិក្ខាសាលានេះ ឡើងនៅក្នុងសាលប្រជុំសាលាស្រុកជីក្រែងខេត្តសៀមរាប ក្រោមវត្តមានរបស់លោក ព្រំ វិច ប្រធានការិយាល័យផលិតកម្មនិងបសុព្យាបាល តំណាង លោក ទា គឹមសុទ្ឋ ប្រធានមន្ទីរកសិកម្មរុក្ខាប្រមាញ់និងនេសាទខេត្ត និងវត្តមានសិក្ខាកាមចូលរួមសរុបចំនួន៤៧រូប ក្នុងនោះជាតំណាងមកពីសហគមន៍ចំនួន១១ ម្ចាស់កសិដ្ឋានចិញ្ចឹមសត្វ វារីវប្បកម្មកសិដ្ឋានដាំបន្លែ សត្តឃាតដ្ឋាន កសិពាណិជ្ជករខ្នាតតូចនិងមធ្យម អ្នកប្រមូលទិញនិងអ្នកកែច្នៃកសិផល អាជ្ញាធរមូលដ្ឋាន អង្គការដៃគូ មន្ត្រីសម្របសម្រួលនៃក្រសួងកសិកម្មរុក្ខាប្រមាញ់និងនេសាទ ក្រសួងសេដ្ឋកិច្ចនិងហិរញ្ញវត្ថុ មន្ត្រីនៃមន្ទីរកសិកម្មខេត្ត មន្ទីរអភិវឌ្ឍជនបទខេត្ត មន្ទីរធនធានទឹកនិងឧត្តុនិយមខេត្តនិងក្រុមការងារផ្តល់សេវាបច្ចេកទេសរបស់ក្រុមហ៊ុន SBK (SBK Research and Development).។
សិក្ខាសាលារបស់គម្រោងនេះមានគោលបំណងសំខាន់ៗដូចជា៖ផ្សព្វផ្សាយព័ត៌មានគម្រោងទៅសហគមន៍កសិកម្ម ក្រុមផលិត កសិពាណិជ្ជករខ្នាតតូចនិងមធ្យម អ្នកប្រមូលទិញផលិតផលកសិកម្ម ម្ចាស់កសិដ្ឋានចិញ្ចឹមសត្វ សត្តឃតដ្ឋាន កសិដ្ឋានចិញ្ចឹមត្រី អាជ្ញាធរមូលដ្ឋាន និងអ្នកពាក់ព័ន្ឋនៅក្នុងតំបន់គោលដៅ។ ផ្សព្វផ្សាយព័ត៌មាននៃការគាំទ្រហិរញ្ញប្បទានរបស់គម្រោងទាំងហិរញ្ញប្បទានឥតសំណងបំពេញបន្ថែមទុនវិនិយោគ និងឥណទានពីគ្រឺះស្ថានហិរញ្ញវត្ថុឯកជនដល់អ្នកពាក់ព័ន្ឋទាំងអស់។ កំណត់អត្តសញ្ញាណរបស់សហគមន៍កសិកម្ម ក្រុមផលិត កសិពាណិជ្ជករខ្នាតតូច និងមធ្យមនិងអ្នកពាក់ព័ន្ឋដើម្បីបង្កើតសំណើរធ្វើពិពិធកម្ម សំណើរអាជីវកម្ម និងទទួលបានហិរញ្ញប្បទានទាំងពីរប្រភេទ។ បន្ថែមពីនេះផ្សព្វផ្សាយព័ត៌មានគាំពារបរិស្ថាន និងសង្គមរួមទាំងលើកកម្ពស់យេនឌ័រផងដែរ។
ថ្លែងបើកអង្គសិក្ខាសាលានាឱកាសនោះ លោក ព្រំ វិច មានប្រសាសន៍ថា គម្រោងពិពិធកម្មកសិកម្មកម្ពុជា បានបង្កើតឡើងក្នុងគោលដៅ ដើម្បីធ្វើការសម្របសម្រួលខ្សែច្រវ៉ាក់តម្លៃពិពិធកម្មកសិកម្ម នៅក្នុងភូមិសាស្ត្រដែលបានជ្រើសរើសនៅកម្ពុជា និងផ្តល់អន្តរាគមន៍ឆ្លើយតបបន្ទាន់ និងប្រកបដោយប្រសិទ្ឋភាពក្នុងករណីមានវិបត្តិនិងសង្គ្រោះបន្ទាន់។ គម្រោងនេះត្រូវបានគាំទ្រហិរញ្ញប្បទានពីធនាគារពិភពលោកចំនួន៩១,៦៧លានដុល្លារ និងថវិកាបដិភាគរបស់រាជរដ្ឋាភិបាលកម្ពុជាចំនួន១០លានដុល្លារ សម្រាប់អនុវត្តសកម្មភាពក្នុងខេត្តគោលដៅចំនួន១២ រួមមាន៖ខេត្តបាត់ដំបង សៀមរាប ព្រះវិហារ ស្ទឹងត្រែង រតនគិរី មណ្ឌលគិរី ក្រចេះ ត្បូងឃ្មុំ កំបង់ចាម កំពង់ឆ្នាំង កំពង់ស្ពឺខេត្តកណ្តាល និងរាជធានីភ្នំពេញ ហើយក្រសួងកសិកម្មរុក្ខាប្រមាញ់និងនេសាទជាទីភ្នាក់ងារប្រតិបត្តិ រីឯក្រសួងអភិវឌ្ឍវត្តជនបទក្រសួងធនធានទឹក និងឧត្តុនិយម ក្រសួងសេដ្ឋកិច្ចនិងហិរញ្ញវត្ថុជាទីភ្នាក់ងារអនុវត្តដោយសហការជាមួយក្រុមហ៊ុន SBK និងអង្គការARD ជាអ្នកផ្តល់សេវាកម្មបច្ចេកទេស។
លោក ព្រំ វិច បន្ថែមទៀតថា ក្រុមអ្នកដែលនឹងទទួលផលពីគម្រោង រួមមានសហគមន៍កសិកម្ម ក្រុមផលិតនិងកសិពាណិជ្ជករខ្នាតតូច និងមធ្យម ដែលស្ថិតក្នុងតំបន់គោលដៅ និងមានលក្ខណៈសម្បត្តិស្របតាមលក្ខ័ខ័ណ្ឌតម្រូវរបស់គម្រោងហើយចងសម្ព័ន្ឋធុរកិច្ចក្នុងខ្សែច្រវ៉ាក់តម្លៃពិពិធកម្មកសិកម្មរួមគ្នា។ គម្រោងនេះដែរមាន៥សមាសភាគ៖ ការជួយគាំទ្រដល់ការធ្វើពិពិធកម្មកសិកម្ម ,ការគាំទ្រហេដ្ឋារចនាសម្ព័ន្ឋសាធារណៈ ,ការធ្វើឱ្យប្រសើរនូវប្រព័ន្ឋព័ត៌មានកសិកម្ម និងការគ្រប់គ្រងត្រួតពិនិត្យគុណភាព ,ការគ្រប់គ្រង សម្របសម្រួល ការតាមដាននិងវាយតម្លៃគម្រោង ,ការត្រៀមឆ្លើយតបចំពោះស្ថានភាពអាសន្ន។
សូមបញ្ជាក់ថា៖សិក្ខាសាលាផ្សព្វផ្សាយជុំទី២ គម្រោងពិពិធកម្មកសិកម្មកម្ពុជា បានប្រព្រឹត្តទៅមួយថ្ងៃពេញ ដោយបានលើកយកប្រធានបទសំខាន់ៗ មកបង្ហាញជូនដល់សិក្ខាកាម ដូចជា៖សាវតានៃគម្រោងពិពិធកម្មកសិកម្មកម្ពុជា ហិរញ្ញប្បទានបំពេញបន្ថែមទុនវិនិយោគ ការទទួលសេវាឥណទានពីធនាគារ ពីគ្រឺះស្ថានហិរញ្ញវត្ថុឯកជន ការប្រើប្រាស់ហិរញ្ញប្បទាន លក្ខណៈវិនិច្ឆ័យនិងល័ក្ខខ័ណ្ឌតម្រូវនៃការទទួលបានហិរញ្ញប្បទាន ផែនការកសិធុរកិច្ច។ល៕
អត្ថបទ និង រូបភាព៖ លោក យូ វង្ស