នៅព្រឹកថ្ងៃទី៥ ខែមករា ឆ្នាំ២០២២ ឯកឧត្តមបណ្ឌិត សុខ ប្រសិទ្ធិ រដ្ឋលេខាធិការ និងជាប្រធានអនុគណៈកម្មការទី៥ សារព័ត៌មាន និងផ្សព្វផ្សាយ បានដឹកនាំកិច្ចប្រជុំផ្ទៃក្នុង អនុគណៈកម្មការទី៥ ដើម្បីរៀបចំផែនការសកម្មភាព និងគម្រោងថវិកាចំណាយសម្រាប់ត្រៀមរៀបចំកិច្ចប្រជុំកំពូលអាស៊ាន និងកិច្ចប្រជុំ ពាក់ព័ន្ធនៅឆ្នាំ២០២២។ កិច្ចប្រជុំនេះធ្វើឡើងដោយមានការចូលរួមពី ឯកឧត្តមលោកជំទាវជាថ្នាក់ដឹកនាំ នៃអគ្គនាយកទាំង៥ រួមជាមួយមន្រ្តីជំនាញសំខាន់ៗពាក់ពន្ធ័ក្នុងផ្នែកការងារទំនាក់ទំនងអន្តរជាតិនៃក្រសួងព័ត៌មាន។
កិច្ចប្រជុំបានធ្វើការពិនិត្យ និងពិភាក្សាលើ របៀបវារៈសំខាន់ៗរួមមាន៖ ១.ការពិនិត្យលើសេចក្តីព្រាង ការរៀបចំ រដ្ឋបាល និងផ្នែកការរៀបចំការងារ ប្រពន្ធ័ផ្សព្ធផ្សាយ, ២.ការរៀបចំ មណ្ឌលព័ត៌មាន Media Center និងការចុះឈ្មោះ អ្នកសារព័ត៌មានជាតិ និងអន្តរជាតិ, ៣ការរៀបចំ និងគ្រប់គ្រង Local Journalists, ផែនសកម្មភាពផ្សព្វផ្សាយ ពីភាពជាប្រធានអាស៊ានរបស់កម្ពុជា នាឆ្នាំ២០២២ និង៥.ការរៀបចំគម្រោងថវិកាចំណាយ និងបញ្ហាផ្សេងៗ ។ នៅក្នុងឱកាសនៃកិច្ចប្រជុំបានពិនិត្យ និងពិភាក្សាលើរបៀបវារៈ និងលើកឡើងអំពីបទពិសោធន៍ព្រមទាំងបញ្ហាប្រឈមនានា ដែលកើតមានឡើងនៅក្នុង ការរៀបចំកិច្ចប្រជុំកំពូលអាស៊ាន ដែលកម្ពុជាធ្លាប់ធ្វើជាប្រធានកាលពីឆ្នាំ២០១២ កន្លងមកនេះ។
ឯកឧត្តម បណ្ឌិត សុខ ប្រសិទ្ធិ វាយតំលៃខ្ពស់ចំពោះលទ្ធផលល្អនៃកិច្ចប្រជុំ ដែលមានការចូលរួមជាមតិយោបល់សំខាន់ៗនានាជាច្រើន ពីសំណាក់ឯកឧត្តម លោកជំទាវ លោកលោកស្រី សមាជិកសមាជិកា នៃអនុគណៈកម្មការទី៥ ដើម្បីជាទុនក្នុងការត្រៀមចូលរួមការរៀបចំផែនការសកម្មភាពសម្រាប់អនុវត្ត ផ្នែកសារព័ត៌មាន និងផ្សព្វផ្សាយ ដែលក្រសួងព័ត៌មានទទួលបន្ទុកនៅក្នុងការរៀបចំកិច្ចប្រជុំកំពូលអាស៊ាន និងកិច្ចប្រជុំពាក់ព័ន្ធនៅឆ្នាំ២០២២ នេះ។ ឯកឧត្តម បានថ្លែងអំណរគុណ និងវាយតម្លៃខ្ពស់ ចំពោះក្រុមការងារទាំងអស់ដែលបានខិតខំបំពេញកិច្ចការនាពេលកន្លងមក ក៏ដូចជាការត្រៀមខ្លួនសម្រាប់ការរៀបចំកិច្ចប្រជុំនានា របស់អាស៊ាន ដែលកម្ពុជាទទួលធ្វើជាប្រធានប្តូរវេននៅឆ្នាំ២០២២ នេះ។
ក្នុងឱកាសនោះឯកឧត្តមបណ្ឌិត ក៏បានទទួលយកនូវសំណូមពរនានា និងបានចូលរួមសម្រាប់អនុគណៈកម្មការទី៥ សារព័ត៌មាន និងផ្សព្វផ្សាយ ក្នុងការបន្តរៀបចំ ផែនការសកម្មភាព និងគម្រោងថវិកាចំណាយឱ្យបានឆាប់ស្របតាមតួនាទីភារកិច្ច របស់អនុគណៈកម្មការទី៥ ហើយនឹងបន្តសហការគ្នាល្អ ដើម្បីចូលរួមរៀបចំកិច្ចប្រជុំកំពូលអាស៊ាន និងកិច្ចប្រជុំពាក់ព័ន្ធ នៅឆ្នាំ២០២២នេះឱ្យបានលទ្ធផល ជាទីមោទនៈដើម្បីកិត្តិយសរបស់ប្រទេសកម្ពុជា ក្នុងនាមជាប្រធានប្តូរវេនអាស៊ានលើឆាកអន្តរជាតិ៕
#ទូរទស្សន៍ជាតិកម្ពុជា
