ក្នុងឱកាសអញ្ជើញចូលជួបសំដែងការគួរសម និងជម្រាបជូនពីវឌ្ឍនៈភាពការងារសំខាន់ៗ ដែលអនុវត្តន៍បាននាពេលកន្លងមករបស់ថ្នាក់ដឹកនាំ និងសមាជិកសមាជិកា សហភាពសហពន្ធ័យុវជនកម្ពុជាវិស័យព័ត៌មាន ដឹកនាំដោយ ឯកឧត្តម ងឿន ចន្ទ័លីនប៉ូឡែន អនុរដ្ឋលេខាធិការ ក្រសួងព័ត៌មាន ក៏បានធ្វើការគោរពថ្លែងនូវការអរគុណយ៉ាងជ្រាលជ្រៅចំពោះ ឯកឧត្តម ខៀវ កាញារីទ្ធ រដ្ឋមន្រ្តីក្រសួងព័ត៌មាន ដែលជានិច្ចកាលតែងបានគាំទ្រ ដល់សកម្មភាពការងារ របស់សហភាពសហពន្ធ័យុវជនកម្ពុជាវិស័យព័ត៌មាន ដើម្បីធ្វើយ៉ាងណាអោយដំណើរការប្រព្រឹត្តទៅបានល្អ។
នៅក្នុងឱកាសនោះដែរ ឯឧត្តម ងឿន ចន្ទ័លីនប៉ូឡែន បានជម្រាបជូនពីផែនការសកម្មភាពការងាររបស់ ស.ស.យ.ក វិស័យព័ត៌មាន ចង់រៀបចំកម្មវិធី បរិច្ចាកឈាមដោយស្មគ្រ័ចិត្ត ជូនដល់មជ្ឍមណ្ឌលជាតិផ្តល់ឈាម ដើម្បីទុកជួយដល់អ្នកដែលត្រូវការបន្ទាន់ ពិសេសអ្នករងគ្រោះដោយបញ្ញាចរាចរណ៏ ។
កម្មវិធីនេះគ្រោងធ្វើសម្រាប់មន្រ្តីក្រសួងព័ត៌មាន ជាយុវជនស្មគ្រ័ចិត្ត និងអ្នកសារព័ត៌មានតាមបណ្តាអង្គភាព ស្ថាប័នផ្សេងៗ ដែលមានបំណងចង់ធ្វើការ បរិច្ចាកឈាមដោយស្មគ្រ័ចិត្ត ធ្វើនៅក្រសួងព័ត៌មាននាពេលខាងមុខនេះ។
បើតាមការលើកឡើងរបស់ ប្រធាន ស.ស.យ.ក វិស័យព័ត៌មាន បានជម្រាបដែរថា កម្មវិធីបរិច្ចាកឈាមដោយស្មគ្រ័ចិត្តនេះ ក៏មានការជូនជា សន្លឹកឆ្នោតលើកទឹកចិត្តដល់អ្នក បានបរិច្ចាកឈាម ដើម្បីចាប់យករង្វាន់ មានជា ទូរទស្សន៏ និងរង្វាន់លើកទឹចិត្តជាច្រើនទៀតផងដែរ។ ឆ្លៀតក្នុងឱកាសនេះ ឯកឧត្តម ងឿន ចន្ទ័លីនប៉ូឡែន ក្នុងនាមថ្នាក់ដឹកនាំសមាជិកសមាជិកា ស.ស.យ.ក វិស័យព័ត៌មាន សូមគោរពប្រសិទ្ធពរជ័យជូនចំពោះ ឯកឧត្តម ខៀវ កាញារីទ្ធ និងលោកជំទាវ សូមមានសុខភាពល្អបរិបូណ៍ និងសូមទទួលបានជោគជ័យគ្រប់ភារកិច្ច ក្នុងឱកាសចូលឆ្នាំថ្មី ឆ្នាំសកល ២០២២ នេះ
ឯកឧត្តម រដ្ឋមន្រ្តី ខៀវ កាញារីទ្ធ បានគាំទ្រចំពោះគម្រោងការងាររបស់សហភាពសហពន្ធ័យុវជនកម្ពុជាវិស័យព័ត៌មាន ក្នុងការរៀបចំកម្មវិធីបរិច្ចាក ឈាមដោយស្មគ្រ័ចិត្ត ដើម្បីទុកជួយដល់អ្នករងគ្រោះដែលត្រូវការឈាមបន្ទាន់។ តាមរយ:សកម្មភាពនេះ ឯកឧត្តម រដ្ឋមន្រ្តី នឹងចូលរួមផ្តល់ជារង្វាន់នូវទូរទស្សន៏ ១គ្រឿងផងដែរ៕
#ទូរទស្សន៍ជាតិកម្ពុជា
