ប៉ូលិសចរាចរណ៍ និងសម្ព័ន្ធមកពីសង្កាត់ Binh Chanh ជាយទីក្រុងហូជីមិញបានសហការជាមួយអ្នកស្រុកដើម្បីប្រមូលដែកគោល និងវត្ថុដែកស្រួចៗដែលបោះចោលនៅលើផ្លូវជាតិដើម្បីត្រៀមចូលឆ្នាំថ្មីដែលត្រូវធ្វើនៅចុងខែមករាដល់ដើមខែកុម្ភៈ ។នេះបើតាមការចេញផ្សាយដោយ ទីភ្នាក់ងារសារព័ត៌មាន(ទុយ ទ្រី) Tuoi Tre នាព្រឹកថ្ងៃពុធ ទី០៥ ខែមករា ឆ្នាំ២០២២។
លោក(ងៀន ក្វាង ទូន) Nguyen Quang Tuan លេខាសម្ព័ន្ធយុវជនស្រុក បិញ ចាន់ Binh Chanh បាននិយាយថា “បេសកកម្មប្រមូលដែកគោលត្រូវបានផ្តួចផ្តើមឡើងនៅក្នុងតំបន់នេះកាលពីប៉ុន្មានឆ្នាំមុន នៅពេលដែលអ្នករត់ម៉ូតូឌុបក្នុងសង្កាត់ Dinh Minh Canh (ឌិញ មិញ កាញ) ស្ម័គ្រចិត្តប្រមូលដែកគោលដែលមុតសំបកកង់នៅលើផ្លូវ” ។
លោក Tuan បញ្ជាក់ថា “ចាប់តាំងពីដែកគោលមុតសំបកកង់រថយន្តនៅតែជាបញ្ហាចរាចរណ៍សម្រាប់ទីក្រុង និងបង្កគ្រោះថ្នាក់ខ្លាំងដល់អ្នកជិះម៉ូតូតាមផ្លូវធំៗ អាជ្ញាធរ និងអ្នកស្រុកបានគាំទ្រយ៉ាងខ្លាំងដល់ប្រតិបត្តិការរបស់ក្រុមនេះ” ។
លោក Canh ដែលជាអ្នកប្រមូលដែកគោលបាននិយាយថា គាត់បានរកឃើញដែកគោលរាប់សិបនៅលើកំណាត់ផ្លូវប្រវែង ១០០ ម៉ែត្រតាមបណ្តោយផ្លូវហាយវេនៅថ្ងៃចូលឆ្នាំសកល ។
លោក Canh បាននិយាយនៅថ្ងៃដំបូងនៃយុទ្ធនាការនេះថា “បើធៀបនឹងពេលដូចគ្នាកាលពីឆ្នាំមុន ចំនួនដែកគោលដែលប្រមូលបានមានការថយចុះគួរឲ្យកត់សម្គាល់ ។ ខ្ញុំនឹងឈប់ប្រមូលដែកគោល លុះត្រាតែរកមិនឃើញដែកគោលនៅលើផ្លូវ ។ ខ្ញុំសង្ឃឹមថា ដែកគោលនឹងបាត់ពីផ្លូវជារៀងរហូត ដែលនាំសុវត្ថិភាពដល់អ្នកធ្វើដំណើរ” ។
ដែកគោល និងវត្ថុដែកមុតស្រួចបែបនេះត្រូវបានគេជឿថាបង្កឡើងដោយម្ចាស់ហាងជួសជុលនៅតាមដងផ្លូវ ដើម្បីដាក់ឲ្យមុតសំបកកង់រថយន្តរបស់អ្នកធ្វើដំណើរ ៕
