កិច្ចប្រជុំសាមញ្ញលើកទី៣២ របស់ក្រុមប្រឹក្សាខេត្តសៀមរាប អាណត្តិទី៣ បានបង្ហាញមួយជ្រុងសំខាន់ថា គោលដៅអនុវត្គគម្រោងទីក្រុងឆ្លាត គឺជាការបំពាក់សម្បទាសម្រាប់ទីក្រុងទេសចរណ៍សៀមរាប-អង្គរ !
ការពិនិត្យ ពិភាក្សា និងអនុម័តលើសេចក្តីព្រាងរបាយការណ៍ប្រចាំឆ្នាំ២០២១ ស្តីពីការអនុវត្តការងារ របស់រដ្ឋបាលខេត្តសៀមរាប គឺជារបៀបវារៈដ៏សំខាន់មួយ នៅលើរបៀបវារៈសំខាន់ចំនួន៦ផ្សេងទៀត របស់កិច្ចប្រជុំសាមញ្ញលើកទី៣២ របស់ក្រុមប្រឹក្សាខេត្តសៀមរាប អាណត្តិទី៣ ដែលបានដំណើរការនាព្រឹកថ្ងៃទី០៦ ខែមករា ឆ្នាំ២០២២ ក្រោមការដឹកនាំកិច្ចប្រជុំដោយ ឯកឧត្តម អ៊ាន ឃុន ប្រធានក្រុមប្រឹក្សាខេត្ត និងមានវត្តមានផងដែរ ឯកឧត្តម ទៀ សីហា អភិបាលខេត្តសៀមរាប រួមជាមួយនឹងវត្តមានសមាជិក សមាជិកា ក្រុមប្រឹក្សាខេត្ត និងសមាជិក សមាជិកានៃរដ្ឋបាលខេត្តជាច្រើនរូបទៀត។
នៅលើរបាយការណ៍ជាង១៦០ទំព័រ បានរំលេចនៅលើទំព័រទី២១ បាននិយាយអំពីគម្រោងទីក្រុងឆ្លាតវៃ។ របាយការណ៍នោះបានបញ្ជាក់ថា ក្រុមសិក្សាបានរៀបចំការប្រជុំ របស់គណៈកម្មាធិការដឹកនាំទីក្រុងស្អាតសៀមរាប លើកទី៥ កាលពីពេលកន្លងទៅថ្មីៗនេះ ដែលកិច្ចប្រជុំនោះបានសង្កត់ធ្ងន់ទៅលើចក្ខុវិស័យ និងសេចក្តីព្រៀងផែនទីចង្អុលផ្លូវទីក្រុងឆ្លាតសៀមរាប។ ជាមួយគ្នានេះ ក្រុមសិក្សា JACA បានដាក់ស្នើឲ្យមានការបង្កើតអង្គភាព ឬការិយាល័យទីក្រុងឆ្លាត ដែលមានតួនាទីជាលេខាធិការដ្ឋាន នៃគណៈកម្មាធិការដឹកនាំទីក្រុងឆ្លាតសៀមរាប។ ការិយាល័យថ្មីនេះ នឹងផ្តោតសំខាន់ទៅលើការលើកស្ទួយ និងគាំទ្រដល់អាជីវកម្មឯកជន ដែលមានលក្ខណៈឆ្លាតវៃក្នុងក្រុងសៀមរាប។
ក្រុមសិក្សា JICA និងសាលាខេត្តសៀមរាប បានរៀបចំសិក្ខាសាលាចំនួន២ ទី១សម្រាប់ទីក្រុងតូក្យូ ទី២សម្រាប់ទីក្រុងសៀមរាប ហើយគោលបំណងនៃអង្គសិក្ខាសាលាទាំង២ គឺមានទិសដៅផ្តោតទៅលើការផ្សព្វផ្សាយ អំពីសកម្មភាពទីក្រុងឆ្លាតសៀមរាប ដល់ភាគីពាក់ព័ន្ធក្នុងជួររដ្ឋាភិបាល ប្រជាពលរដ្ឋ ជាពិសេសេសក្រុមហ៊ុនឯកជន ទាំងនៅក្នុងប្រទេសកម្ពុជា និងនៅប្រទេសជប៉ុន។ ក្រុមហ៊ុនឯកជន JPT ដែលបានឈ្នះក្នុងកម្មវិធី ប្រកួតប្រជែងគំនិតអាជីវកម្មបែបឆ្លាតវៃខេត្តសៀមរាប បាននិងកំពុងពិភាក្សាលើការអនុវត្តគម្រោងសាកល្បងរបស់ខ្លួន ក្នុងទីក្រុងសៀមរាបជាមួយភាគីពាក់ព័ន្ធនានាក្នុងខេត្ត ផងដែរ។
យ៉ាងណាក៏ដោយ កិច្ចប្រជុំបានវាយតម្លៃខ្ពស់បំផុត ចំពោះជោគជ័យនៃការអនុវត្តគម្រោងសាងសង់ហេដ្ឋារចនាសម្ព័ន្ធផ្លូវ៣៨ខែ្ស សម្រាប់អភិវឌ្ឍន៍ក្រុងទេសចរណ៍សៀមរាប-អង្គរ ដែលជាចំណងដៃដ៏ពិសិដ្ឋនៃសម្តេចតេជោ ប្រមុខនៃរាជរដ្ឋាភិបាលកម្ពុជា ទាំងការតស៊ូប្តូរផ្តាច់ ឆ្លងកាត់វិបត្តិកូវីដ-១៩ ដើម្បីអនាគតដែលត្រូវរង់ចាំ ដោយការប្រើប្រាស់ឱកាស ជាដំណោះស្រាយ ទម្លុះទម្លាយបញ្ហាប្រឈម ប្រកបដោយប្រសិទ្ធភាព។ ក៏អាចនិយាយបានដែរថា សំណង់ហេដ្ឋារចនាសម្ព័ន្ធផ្លូវ៣៨ខែ្សនៃក្រុងសៀមរាប គឺជាឆ្អឹងខ្នងនៃការអភិវឌ្ឍន៍ក្រុងទេសចរណ៍ វប្បធម៌ ប្រវត្តិសាស្រ្ត និងធម្មជាតិ ដែលមានតម្រូវការបំពាក់សម្បទាផ្សេងៗទៀត ឲ្យមានទំនើបកម្ម ទាន់សម័យ នៅក្នុងរង្វង់់នៃការរក្សាតម្លៃអត្តសញ្ញាណជាតិ៕
អត្ថបទ និងរូបភាព ងឹន គីមឡេង
