អាជ្ញាធរជាតិអប្សរា បានឱ្យដឹងថា រដ្ឋមន្ដ្រីការបរទេសម៉ាឡេស៊ី គ្រោងនឹងធ្វើទស្សនកិច្ចសិក្សា ស្វែងយល់ពីការអភិរក្ស និងអភិវឌ្ឍន៍ប្រកបដោយចីរភាពក្នុងរមណីយដ្ឋានអង្គរ តាមការគ្រោងទុកនៅក្នុងខែមករា ឆ្នាំ២០២២នេះ។ ការលើកបែបនេះ ធ្វើឡើងក្នុងពេល ឯកឧត្តម ELDEEN HUSAINI MOHD HASHIM ឯកអគ្គរាជទូតប្រទេសម៉ាស៊ីប្រចាំប្រទេសកម្ពុជា បានចូលជួបសម្ដែងការគួរសមជាមួយឯកឧត្តម ឡុង កុសល អគ្គនាយករង នារសៀលថ្ងៃទី០៥ ខែមករា ឆ្នាំ២០២២ នេះ។
ឯកឧត្ដម ឡុង កុសល អគ្គនាយករង និងជាអ្នកនាំពាក្យ តំណាងឯកឧត្តម ហង់ ពៅ អគ្គនាយកអាជ្ញាធរជាតិអប្សរា បានឱ្យដឹងថា គោលបំណងទស្សនកិច្ចរបស់រដ្ឋមន្រ្តីការបរទេសម៉ាឡេស៊ីមកកាន់ខេត្តសៀមរាប នាពេលខាងមុខនេះ ដើម្បីសិក្សាស្វែងយល់ពីការអភិរក្ស និងអភិវឌ្ឍន៍ប្រកបដោយចីរភាពក្នុងរមណីយដ្ឋានអង្គរនាពេលកន្លងមក។
ឯកឧត្ដម ឡុង កុសល មានប្រសាសន៍បន្តថា តាមរយ:ឯកឧត្តមឯកអគ្គរាជទូតម៉ាឡេស៊ី ថារដ្ឋមន្រ្តីការបរទេសម៉ាឡេស៊ី នឹងមកចូលរួមកិច្ចប្រជុំរដ្ឋមន្រ្តីការបរទេសអាស៊ាន នៅអំឡុងខែមករានេះ ហើយឆ្លៀតឱកាសបំពេញការងារនេះ មានបំណង ដើម្បីចង់ស្វែងយល់ការងារអភិរក្សប្រាសាទនិងអភិវឌ្ឍន៍ប្រកបដោយចីរភាពក្នុងរមណីយដ្ឋានអង្គរផងដែរ។ ឯកឧត្តមបន្ថែមថា ការគ្រប់គ្រងរមណីយដ្ឋានអង្គរ ដោយអាជ្ញាធរជាតិអប្សរា ទទួលបានការកោតសរសើរ និងល្បីល្បាញជាខ្លាំង ដែលធ្វើឱ្យប្រទេសដទៃទៀត ក្នុងនោះមានម៉ាឡេស៊ីផងដែរ ទើបចង់ស្វែងយល់ និងរៀនសូត្រ។
តាមការបញ្ជាក់ពីឯកឧត្តម ELDEEN HUSAINI MOHD HASHIM ថា រដ្ឋមន្រ្តីការបរទេសម៉ាឡេស៊ី គ្រោងចុះស្វែងយល់ពីការងារមួយចំនួន នៅតាមការដ្ឋានការងារខ្លះ ក្នុងរមណីយដ្ឋានអង្គរ អំឡុងពេលមកបំពេញការងារផ្លូវការនៅខេត្តសៀមរាប នាពេលឆាប់ៗនេះផងដែរ។
ជាកិច្ចឆ្លើយតប ឯកឧត្តម ឡុង កុសល បានបង្ហាញការស្វាគមន៍យ៉ាងកក់ក្ដៅចំពោះគម្រោងដំណើរទស្សនកិច្ចនេះ និងបញ្ជាក់ថា អាជ្ញាធរជាតិអប្សរារង់ចាំស្វាគមន៍ ក៏ដូចជាចែករំលែកនូវបទពិសោធន៍ទៅភាគីម៉ាឡេស៊ីគ្រប់ពេលវេលា៕
អត្ថបទ និងរូបភាព៖ លោកបូ សាវី
កែសម្រួល៖ លីវ សុខុន
