នៅថ្ងៃទី០៦ ខែមករា ឆ្នាំ២០២២ ក្រុមប្រឹក្សាខេត្តសៀមរាប អាណត្ដិទី៣ បានរៀបចំកិច្ចប្រជុំសាមញ្ញលើកទី៣២ របស់ខ្លូន ដើម្បីស្តាប់លើកឡើងពីបញ្ហាប្រឈម មួយចំនួននៅក្នុងខេត្ដ អនុម័តការងារប្រចាំឆ្នាំ២០២១ និងពិនិត្យលើរបាយការណ៍ រដ្ឋបាលខេត្តបានអនុវត្តក្នុងឆ្នាំ២០២១ និងទិសដៅអនុវត្តបន្ត អនុម័តនិងពិភាក្សាលើរបៀបវីរៈមួយចំនួនដែលបានគ្រោងទុក ។ កិច្ចប្រជុំនេះ ប្រព្រឹត្តិទៅនៅអាគារប្រជុំសាលាខេត្ត ក្រោមអធិបតីភាពឯកឧត្តម អ៊ាន ឃុន ប្រធានក្រុមប្រឹក្សាខេត្ត និង ឯកឧត្ត ទៀ សីហា អភិបាល នៃគណ:អភិបាលខេត្តសៀមរាប រួមជាមួយវត្តមាន ឯកឧត្តម លោកជំទាវសមាជិក សមាជិកាក្រុមប្រឹក្សាខេត្ត ព្រមទាំងមន្ត្រីរាជការ អាជ្ញាធរក្រុងស្រុក មេបញ្ជាការ មេបញ្ជាការងកងកម្លាំងកងរាជអាវុធហត្ថខេត្ត ស្នងការដ្ឋាននគរបាលខេត្ត នគរបាលបេតិកភ័ណ្ឌ ស្ថាប័នពាក់ព័ន្ធនានាជុំវិញខេត្តសរុបប្រមាណជា៩០រូបបានអញ្ជើញចូលរួមផងដែរ។
នៅក្នុងកិច្ចប្រជុំនេះ សមាជិក សមាជិកាក្រុមប្រឹក្សាខេត្តខ្លះលើកឡើងពីបញ្ហាប្រឈមមួយចំនួនរួមមាន៖ ការលក់ដូរនៅតាមដងផ្លូវសំខាន់ៗនាំឱ្យខ្វះសណ្តាប់ធ្នាប់របៀបរៀបរយ បញ្ហាអ្នកសុំទាននៅទីសក្ការៈព្រះអង្គចេកព្រះអង្គចម នៅរមណីយដ្ឋានភ្នំគូលេន ការខូចខាតជាអន្លើៗនៃផ្លូវជាតិលេខ៦៤ ផ្លូវជាតិលេខ៦៧និង៦៨ និងកំណាត់ផ្លូវមួយចំនួនក្នុងក្រុងមួយចំនួនដែលស្ថិតនៅក្រៅគម្រោងហេដ្ឋារចនាសម្ព័ន្ឋផ្លូវ ៣៨ខ្សែ ពាក់ព័ន្ឋនឹងបញ្ហានេះ ក៍ទទួលបាន ការឆ្លើយបំភ្លឺភ្លាមៗពីមន្រ្តីជំនាញជូនអង្គប្រជុំផងដែរ ។
ឯកឧត្ត ទៀ សីហា អភិបាលខេត្ត មានប្រសាសន៍ថា ការលើកយកបញ្ហាទាំងអស់នេះមកពិភាក្សាគឺជាយោបល់ល្អៗ ដើម្បីរួមគ្នាដោះស្រាយស្វែងរកការរីកចម្រើនសម្រាប់ខេត្តរបស់យើង។ ជាមួយគ្នានោះ ឯកឧត្តម ក៏បានលើកឡើងពីការ លក់ដូរខ្វះសណ្តាប់ធ្នាប់ របៀបរៀបរយសាធារណៈតាមដងផ្លូវសំខាន់ៗ ទាំងការងារអនាម័យបរិស្ថាន ក្នុងក្រុងសៀមរាបជាដើមផង។ឯកឧត្តម មានប្រសាសន៍ថា៖ ក្រោយពីរួចរាល់ជាស្ថាពរនូវការស្ថាបនាផ្លូវទាំង៣៨ខ្សែ អាជ្ញាធរខេត្តនឹងបន្តសហការជាមួយអង្គភាពមន្ទីរស្ថាប័នជំនាញរៀបចំនិងកំណត់ទីតាំងសម្រាប់ពួកគាត់លក់ដូរតាមដងផ្លូវដើម្បីចៀសវាងភាពអត់សណ្តាប់ធ្នាប់ និងនាំឱ្យប៉ះពាល់ដល់សោភ័ណ្ឌភាពក្នុងក្រុង។
ចំពោះអ្នកសុំទាននិងជនអាណាថា ដែលតែងតែបង្កការរំខានដល់អ្នកទេសចរនោះ អាជ្ញាធរខេត្តសហការជាមួយសមត្ថកិច្ចជំនាញ បានកំណត់មុខសញ្ញារួចហើយ និងកំពុងត្រៀមជួយពួកគាត់ដោយបានជ្រើសរើសយកទីតាំងនៅក្បែរសហគមន៍ព្រៃឈើចង្ក្រានរយក្នុងស្រុកវ៉ារិន រៀបចំជាមជ្ឈមណ្ឌលដើម្បីស្តារនិតិសម្បទាឡើងវិញ ជាទីកន្លែងសម្រាប់ពួកគាត់សំចតនិងរស់នៅទៀតផង ហើយទីនោះផ្តល់ឱកាសនិងលទ្ឋភាពឱ្យគាត់ដាំដំណាំ ចិញ្ចឹមសត្វនិងប្រកបមុខរបរបន្ទាប់បន្សំផ្សេងៗទៀត ឱ្យតែពួកគាត់មានឆន្ទៈទទួលយកនិងលះបង់ឈប់បន្តដើរជាជនអាណាថាលះបង់ការដើរសុំទានបាន លើសពីនេះអាជ្ញាធរខេត្តក៍មានផែនការទប់ស្កាត់ផងដែរដើម្បីឱ្យក្រុងសៀមរាបសមជាទីក្រុងវប្បធម៌អាស៊ាននិងសមជាខេត្តវប្បធម៌ប្រវត្តិសាស្ត្រសម្បូរទៅដោយរមណិយដ្ឋាន ប្រាង្គប្រាសាទ នានាបាននឹងកំពុងទាក់ទាញអ្នកទេសចរគ្រប់ទីតំបន់ក្នុងពិភពលោក។ឯកឧត្តម អភិបាលខេត្តក៍បានជម្រុញដល់មន្ត្រីជំនាញនិងអាជ្ញាធរពាក់ព័ន្ឋឱ្យពិនិត្យតាមដានការដឹកជញ្ជូនលើសទម្ងន់តាមផ្លូវជាតិមួយចំនួន បង្កការខូចខាតផ្លូវ ផងដែរ។
មានប្រសាសន៍បូកសរុបកិច្ចប្រជុំ ឯកឧត្ដម អ៊ាន ឃុន បានមានប្រសាសន៍កោតសរសើរដល់អាជ្ញាធរខេត្ត រដ្ឋបាលខេត្ត ក្រុងស្រុកទាំងអស់ថា៖ក្នុងរយៈពេលពេញមួយឆ្នាំ២០២១ខេត្តយើងជួបវិបត្តិជំងឺកូវីដ-១៩ ក្នុងនោះរដ្ឋបាលខេត្តក្រោមការដឹកនាំរបស់ ឯកឧត្តម អភិបាលខេត្ត និងជាប្រធានគណៈបញ្ជាការឯកភាពរដ្ឋបាលខេត្ត បានខិតខំពុះពារគ្រប់ឧបសគ្គក្នុងការដាក់វិធានការ ការពារ ទប់ស្កាត់ យ៉ាងហ្នឹងម៉ាត់បំផុត ដែលធ្វើឲ្យមេរោគកូវីដ-១៩ ដូចជាមេរោគកូវីដ-១៩ បំប្លែងថ្មី ប្រភេទដែលតា និងអូមីក្រុង ឆ្លងចូលមកខេត្តយ៉ាងតិចតួចបំផុត។ ការរៀនរស់ និងការបំពេញការងារ តាមបែបគន្លងប្រក្រតីភាពថ្មីជាមួយជំងឺកូវីដ-១៩ ត្រូវបានប្រជាពលរដ្ឋ និងមន្ត្រីរាជការយល់ច្បាស់ ព្រមទាំងការពារខ្លួនដោយខ្លួនឯង តាមគោលការណ៍ (៣ ការពារ និង ៣ កុំ)។ឯកឧត្តម បញ្ជាក់ថា៖ ជាទូទៅការងារសំខាន់ៗ និងការបើកព្រឹត្តិការណ៍នានាក្នុងខេត្តឆ្នាំ២០២១ ប្រព្រឹត្តិទៅប្រកបដោយជោគជ័យមិនមានកត្តារាំងស្ទះ ដោយបញ្ហាជំងឺកូវីដ-១៩ ឬកត្តាអ្វីផ្សេងឡើយ ទាំងការបំពេញការងារការពារ សន្តិសុខ សណ្ដាប់ធ្នាប់សាធារណៈ ទាំងការងាររដ្ឋបាលក្នុងការបម្រើសេវាជូនប្រជាពលរដ្ឋ និងការអភិវឌ្ឍផ្លូវទាំង ៣៨ខ្សែ ក្នុងក្រុង ព្រមទាំងសោភ័ណភាពក្នុងក្រុងសៀមរាប ក៍បានប្រព្រឹត្តិនិងដំណើរការទៅយ៉ាងរលូន។
ឯកឧត្តម អ៊ាន ឃុនបន្ថែមថា៖លទ្ធផលទាំងនេះ គឺបានពីការខិតខំប្រឹងប្រែង និងភាពឈ្លាសវៃរបស់ ឯកឧត្តម ជាអភិបាលខេត្ត រួមទាំង អភិបាលនៃគណៈអភិបាលខេត្ត មន្ត្រីរាជការ កងកម្លាំង ប្រដាប់អាវុធគ្រប់ជាន់ថ្នាក់បំពេញការងារយ៉ាងសកម្ម ព្រមៗគ្នាក្នុងរយៈពេលមួយឆ្នាំនេះ។
អត្ថបទ និងរូបភាព យូ វង្ស
