ក្នុងកាល:ទេស: ដែលពិភពលោកកំពុងជួបប្រទះនូវវិបត្តិជំងឺឆ្លងកូវីដ-១៩ ដែលអូសបន្លាយពេលជាង២ឆ្នាំមកនេះ រាជរដ្ឋាភិបាលកម្ពុជា បានបញ្ចេញថវិកាអន្តរាគមន៍ប្រមាណជាង២ពាន់លានដុលា្ល ហើយក៏គ្រោងបញ្ចេញថវិកាប្រមាណ១ពាន់លានដុល្លាបន្ថែមទៀតសម្រាប់ការងារប្រយុទ្ធប្រឆាំងជំងឺកូវីដ-១៩ ក្នុងឆ្នាំ២០២២នេះ ។
មានប្រសាសន៍នៅក្នុងពិធីសំណេះសំណាល ជាមួយសមាគមសម្ព័ន្ធសេដ្ឋកិច្ច និងរ៉ឺម៉កសន្តិភាពប្រចាំខេត្តសៀមរាប កាលពីរសៀលថ្ងៃទី០៦ ខែមករា ឆ្នាំ២០២២ ឯកឧត្ដម ទៀ សីហា សមាជិកគណ:កម្មាធិការកណ្តាល សមាជិកយុវជនថ្នាក់កណ្តាល នៃគណបក្សប្រជាជនកម្ពុជា និងជាប្រធានគណបក្សប្រជាជនកម្ពុជាខេត្តសៀមរាប បានលើកឡើងថា ក្នុងព្រឹត្តិការណ៍សហគមន៍ ២០ កុម្ភ: ប្រជាជនយើងទទួលរងការឆ្លងជំងឺកូវីដ-១៩ (Covid-19) ចំនួន ១២០,៤២៣នាក់ និងការបាត់បង់អាយុជីវិតចំនួន ៣,០០៥នាក់ ។ ក្នុងការប្រុទ្ធឆាំងជំងឺកូវីដ-១៩ (Covid-19) រដ្ឋាភិបាលបានប្រើប្រាស់ថវិកាចំណាយអន្តរាមគមន៍ចំនួន ៨២៩លានដុល្លារ ក្នុងឆ្នាំ២០២០ អាចឡើងដល់ ១,៤៥៤លានដុល្លារសម្រាប់ឆ្នាំ២០២១ ដោយរដ្ឋាភិបាលបានដាក់ឱ្យអនុវត្តកម្មវិធី និងវិធានការអន្តរាគមន៍ចំនួន ១០ជុំរួចមកហើយ ។ សម្រាប់ឆ្នាំ២០២២ រាជរដ្ឋាភិបាលក៏គ្រោងបញ្ចេញថវិកាអន្តរាគមន៍បន្ថែមក្នុងទំហំប្រមាណ ១,០១៤លានដុល្លារទៀត ។ ជារួមសម្រាប់រយ:ពេល ៣ឆ្នាំ (២០២០-២០២២) រាជរដ្ឋាភិបាលបានចំណាយធនធានថវិកាក្នុងទំហំ ៣,៤០០លានដុល្លារ ។ ជាលទ្ធផលកម្ពុជាអាចរក្សាបានល្អជាទូទៅ នូវលំនឹងជីវភាពប្រជាជនធានាបានស្ថិរភាពម៉ាក្រូសេដ្ឋកិច្ច និងហិរញ្ញវត្ថុ គ្រប់គ្រងបានអតិផរណា និងស្ថិរភាពអត្រាប្តូរប្រាក់ ។
ឯកឧត្តម ទៀ សីហា បន្តទៀតថា ថ្ងៃទី២១ ខែធ្នូ ឆ្នាំ២០២១ សម្តេចតេជោ ហ៊ុន សែន បានប្រកាសបិទបញ្ចប់ព្រឹត្តិការណ៍សហគមន៍ ២០ កុម្ភ: ដែលនេះជាជោគជ័យមួយដ៏ធំធេងក្នុងការប្រយុទ្ធប្រឆាំងជំងឺកូវីដ-១៩ (Covid-19) ។ មូលហេតុដោយសាររាជរដ្ឋាភិបាលបានដាក់ចេញនូវយុទ្ធសាស្រ្តគ្រប់ជ្រុងជ្រោយ បត់បែនរស់រវើកដែលក្នុងនោះមានវិធានការជាច្រើនត្រូវបានអនុវត្តដោយប្រសិទ្ធភាព។ ដំបូងបំផុតគឺយុទ្ធនាការជាតិចាក់វ៉ាក់សាំង ធ្វើឱ្យកម្ពុជាបានក្លាយទៅជាប្រទេសមួយក្នុងចំណោមប្រទេសតិចតួចបំផុតលើពិភពលោក ដែលទទួលបានជោគជ័យក្នុងការចាក់វ៉ាក់សាំងនេះ ។
ជាមួយគ្នានេះ សម្តេចអគ្គមហាសេនាបតីតេជោ ហ៊ុន សែន បានសម្រេចបានអនុម័តឱ្យចាក់វ៉ាក់សាំងបង្ការជំងឺកូវីដ-១៩ (Covid-19) ដូសទី៣ ឬដូសជំរុញដល់កុមារ និងយុវវ័យអាយុ១២ ទៅ១៨ឆ្នាំ ដោយចាប់ផ្តើមយុទ្ធនាការនៅខែមករា ឆ្នាំ២០២២ និងអនុវត្តតាមអភិក្រម “ ផ្ការីក ” ដូចដែលបានអនុវត្តកាលពីពេលកន្លងមក ។
ស្ថិតក្នុងស្ថានភាពដ៏លំបាកនេះ ខេត្តសៀមរាប ដោយមានការចង្អុលពីដឹកនាំដោយផ្ទាល់គឺសម្តេចពិជ័យសេនា ទៀ បាញ់ អនុប្រធានគណបក្សប្រជាជនកម្ពុជា និងជាប្រធានក្រុមការងារចុះមូលដ្ឋានខេត្តសៀមរាប ខេត្តបានពុះពារដោះស្រាយបញ្ហាប្រឈម ជម្នះបានគ្រប់ឧបសគ្គ រក្សាបាននូវប្រក្រតីភាព ជីវភាពរស់នៅរបស់ប្រជាពលរដ្ឋ ព្រមជាមួយនឹងការដឹកនាំដ៏ឈ្លាសវៃរបស់សម្តេចតេជោ ហ៊ុន សែន បានផ្តល់ថវិកា ១៥០លានដុល្លារ សម្រាប់ជួសជុលសាងសង់ផ្លូវ ៣៨ខ្សែ ដែលបានលេចចេញជារូបរាងសម្រេចបានស្ទើរមួយរយភាគរយដែលគ្រោងបើកពិធីសម្ពោធក្នុងពេលឆាប់ៗខាងមុខនេះ ។
សូមជម្រាបថា សមាគមសម្ព័ន្ធសេដ្ឋកិច្ច និងរ៉ឺម៉ក សន្តិភាពប្រចាំខេត្តសៀមរាប មានឫសគល់ចេញមកពីអង្គការចាត់តាំងមួយរបស់អតីតគណបក្សសង្គ្រោះជាតិ។ ក្រោយគណបក្សនេះត្រូវបានរំលាយ សមាជិក នៃអង្គការខាងលើ បានសុំចុះបញ្ជីជាផ្លូវការនៅក្រសួងមហាផ្ទៃ និងបានប្រកាសអំពីការគាំទ្ររបស់ខ្លួនចំពោះគណបក្សប្រជាជនកម្ពុជាវិញ។
ឯកឧត្តម ទៀ សីហា ចាត់ទុកថា នេះជាការបង្ហាញនូវការគាំទ្រចំពោះកម្មវិធីនយោបាយរបស់គណបក្សប្រជាជនកម្ពុជា យ៉ាងពិតប្រាកដ ជាកម្លាំងថ្មីមិនអាចខ្វះបាន ដើម្បីបង្រួបបង្រួមកម្លាំងមហាសាមគ្គីជាតិទាំងមូល រក្សាការពារនូវសុខសន្តិភាព សមតាមពាក្យស្លោក “ មានសន្តិភាព ទើបធានាការអភិវឌ្ឍប្រទេសជាតិ និងលទ្ធិប្រជាធិបតេយ្យ ” និងពាក្យស្លោកមួយឃ្លាទៀតថា “ លើកម្ពស់ស្មារតីស្នេហាជាតិ ពង្រឹងធ្លុងសាមគ្គីភាព ការពារឯករាជ្យជាតិ អធិបតេយ្យ និងបូរណភាពទឺកដីកម្ពុជា ” ៕
អត្ថបទ និងរូបភាព: លោកជា ស្រស់ និងលោកស៊ាន សុផាត កែសម្រួលដោយ លីវ សុខុន!!!
