អាជ្ញាធរជាតិអប្សរា គូសបញ្ចាក់ថា ការជួសជុលព្រះវិហារបូរាណ គឺស្ថិតក្នុងតួនាទីនៃការអភិរក្ស និងមានគុណប្រយោជន៍ភ្ជាប់ទៅនឹងការថែរក្សាអត្តសញ្ញាណតំបន់ផងដែរ ហើយការទាក់ទាញ គឺទីអារាម បាននាំយកការចាប់អារម្មណ៍នៃភ្ញៀវទេសចរ ឲ្យចូលចិត្តសិក្សាស្វែងយល់ អំពីវប្បធម៌ និងប្រពៃណី រស់នៅរបស់ខ្មែរ៕
ព្រះវិហារវត្តព្រះឥន្ទកោសីយ៍ ហៅវត្តលើ ស្ថិតនៅក្នុងភូមិទ្រាំង សង្កាត់ស្លក្រាម ក្រុងសៀមរាប ព្រឹកថ្ងៃទី០៧ ខែមករា ឆ្នាំ២០២២ ស្របគ្នានឹងខួបអនុស្សាវរីយ៍លើកទី៤៣ ទិវាជ័យជម្នះ៧មករា ១៩៧៩-២០២២ បានរៀបចំពិធីក្រុងពាលី បួងសួងសុំសេចក្តីសុខ ដើម្បីដំណើរការជួសជុលឡើងវិញ ក្រោមការផ្តួចផ្តើមគាំទ្រថវិកាដោយ នាងវិសាខា អគ្គមហាឧបាសិកាពុទ្ធសាសនូបត្ថម្ភ សៀង ចាន់ហេង និងគាំទ្រលើការសិក្សាបច្ចេកទេសដោយអាជ្ញាធរជាតិអប្សរា។
បើតាមព្រះយសសិរីធម្ម ចន្ទ សុវណ្ណ ព្រះរាជាគណៈថ្នាក់កិត្តិយស និងជាព្រះចៅអធិការវត្តព្រះឥន្ទកោសីយ៍ មានថេរដីកាថា គិតត្រឹមឆ្នាំ២០២២នេះ ព្រះវិហារវត្តព្រះឥន្ទកោសីយ៍ មានអាយុកាលប្រហែលជាក្នុងខ្ទង់ ១៦០ឆ្នាំ និងបានឆ្លងកាត់ការដឹកនាំគ្រប់គ្រងនៃចៅអធិការចំនួន៧ជំនាន់កន្លងមកហើយដែរ។ ពេលវេលា អាយុកាល និងធម្មជាតិ បានបណ្តាឲ្យព្រះវិហារទាំងមូល ទទួលរងនូវភាពជរាទ្រុឌទ្រោម។ គ្រប់ជំនាន់នៃចៅអធិការ តែងតែមានការជួសជុលជាហូរហែរ ក៏ប៉ុន្តែប្រហែលជាពុំមានទ្រង់ទ្រាយធំដូចលើកនេះឡើយ គឺមានការជួយជ្រោមជ្រែងទាំងអ្នកជំនាញបច្ចេកទេស និងទាំងខាងសប្បុរសជនគាំទ្រផ្នែកធនធានថវិកាផងដែរ។
ឯកឧត្តម ហង់ ពៅ អគ្គនាយកអាជ្ញាធរជាតិអប្សរា ដែលមានវត្តមានចូលរួមក្នុងពិធីបួងសួងនោះ មានប្រសាសន៍ថា ព្រះវិហារដែលមានអាយុកាលលើសពី៥០ឆ្នាំ គឺត្រូវបានរាប់បញ្ចូលថាជា សំណង់បេតិកភ័ណ្ឌរបស់ជាតិ។ សារាចរណ៍ណែនាំរបស់រាជរដ្ឋាភិបាល បានចែងច្បាស់ថា សំណង់បូរាណត្រូវតែទទួលបាននូវការថែរក្សាអភិរក្សឲ្យបានគង់វង្ស ហើយរាល់ការជួសជុលទាំងឡាយ ត្រូវតែបានរក្សាទម្រង់ដើមទាំងស្រុង សោភណ្ឌភាព គុណភាព និងសុវត្តិភាព។ ការជួសជុលគឺជាផ្នែកមួយនៃតួនាទីសម្រាប់ជំនាញអភិរក្ស ។
ឯកឧត្តម គូសបញ្ជាក់ថា និយាយអំពីវត្តអារាម គឺមានបង្កប់អត្តសញ្ញាណនៅតាមតំបន់នីមួយៗ ដូចជានៅតាមដងស្ទឹងសៀមរាប ដែលមានវត្តព្រះឥន្ទកោសីយ៍ ហៅវត្តលើ វត្តព្រះឥន្ទកោសា និងវត្តរាជបូណ៌ជាដើម គឺមានបង្ហាញរចនាបថប្លែកៗពីគ្នា ក៏ប៉ុន្តែយ៉ាងណាក៏ដោយ នៅក្នុងចង្កោមរចនាបថទាំងនោះ បានបង្កប់នូវអត្តសញ្ញាណ អ្នកសៀមរាបយ៉ាងប្រាកដ ហេតុដូចនេះហើយ ទើបការជួសជុសព្រះវិហារនេះ ចាំបាច់ណាស់ដែលអ្នកជំនាញត្រូវការពេលវេលា ដើម្បីសិក្សាលម្អិតនោះ។ ពិតណាស់ វត្តអារាមគឺជាគោលដៅនៃការទាក់ទាញភ្ញៀវទេសចរ ដើម្បីស្វែងយល់អំពីវប្បធម៌ ប្រពៃណី និងការរស់នៅពីអតីតកាលនៃប្រជាពុទ្ធបរិស័ទ។ សម្លឹងឃើញកាន់តែជ្រៅជាងនេះ ការអភិរក្សទីអារាម សំខាន់គឺភា្ជប់រវាងវប្បធម៌រស់នៅនៃប្រជាជនខ្មែរ ទៅនឹងអត្តសញ្ញាណបេតិកភណ្ឌពិភពលោក-អង្គរ៕
អត្ថបទ និង រូបភាព៖ លោក ងិន គីមឡេង
