នាព្រឹកថ្ងៃទី១០ ខែមករា ឆ្នាំ២០២២នេះ សម្ដេចពិជ័យសេនា ទៀ បាញ់ ឧបនាយករដ្ឋមន្ត្រី រដ្ឋមន្ត្រីក្រសួងការពារជាតិ និង ជាប្រធានក្រុមការងាររាជរដ្ឋាភិបាលចុះមូលដ្ឋានខេត្តសៀមរាប បានប្រកាសជាផ្លូវការបើកយុទ្ធនាការចាក់វ៉ាក់សាំងបង្ការមេរោគកូវីដ-១៩ ដូសទី៣ ជូនប្រជាពលរដ្ឋក្នុងក្របខណ្ឌទូទាំងខេត្តសៀមរាប ដើម្បីជាសក្ខីភាព ក្នុងការឆ្លើយតបទៅលើអ្វីដែលជា បំណងប្រាថ្នាចង់បានរបស់ប្រជាពលរដ្ឋកម្ពុជា គឺការផ្តល់សិទ្ធិរស់រានមានជីវិត តាមរយៈនៃការផ្តល់វ៉ាក់សាំងបង្កា រារាំងកាត់បន្ថយហានីភ័យ លើស្ថានភាពរាតត្បាតនៃកូវីដ-១៩ ដែលកំពុងបន្តយាយី នៅលើពិភពលោក។
មានប្រសាសន៍ក្នុងឱកាសនោះ សម្តេចពិជ័យសេនា ទៀ បាញ់ វាយតម្លៃខ្ពស់ចំពោះស្មារតីចូលរួមនៃប្រជាពលរដ្ឋដែលបានទទួលយកការចាក់វ៉ាក់សាំង ដែលផ្តល់ជូនដោយឥតគិតថ្លៃពីរាជរដ្ឋាភិបាល ថាជាចលនាប្រជាជាតិ ពង្រឹងសមត្ថភាព រើបំរះចេញពីវិបត្តិកូវីដ-១៩ ដែលបានបិទបញ្ចប់ព្រឹត្តិការណ៍សហគមន៍២០កុម្ភៈ និងបានបើកប្រទេសឡើងវិញ នោះ គឺពិតជាត្រូវនិយាយដោយខានមិនបាននោះឡើយ អំពីផែនការចាក់ស្រោចវ៉ាក់សាំង ដែលជានយោបាយយុទ្ធសាស្រ្តគន្លឹះដ៏ខ្ពង់ខ្ពស់ នៃសម្តេចតេជោ ហ៊ុន សែន ប្រមុខនៃរាជរដ្ឋាភិបាល ដើម្បីបង្ហូរចរន្តសេដ្ឋកិច្ចសង្គមលើគ្រប់វិស័យ ជួសជុលសសៃឈាមសេដ្ឋកិច្ចកម្ពុជាឡើងវិញ។
សម្តេចពិជ័យ បានបញ្ជាក់ដែរថា នៅក្នុងយុទ្ធនាការនេះ ចំពោះប្រជាពលរដ្ឋដែលមិនទាន់បានទទួលការចាក់វ៉ាក់សាំងបង្កានៅឡើយនេះ ក៏អាចមកទទួលការចាក់វ៉ាក់សាំងដូសទី១ បានផងដែរ តែប្រការដែលសំខាន់នោះ គឺវិធានការ ៣ការពារ និង៣កុំ នៅតែជារូបមន្តដ៏មានប្រសិទ្ធភាព ដែលបងប្អូនកប្រជាជនទាំងអស់ត្រូវតែអនុវត្តឲ្យបានខ្ជាប់ខ្ជួន ដើម្បីចលនារៀនរស់ ជាមួយកូវីដ-១៩ ។
គួររំលឹកថា យោងតាមផែនការដែលបានគ្រោងទុក បេសកកម្មនៅក្នុងយុទ្ធនាការចាក់វ៉ាក់សាំងបង្ការជំងឺកូវីដ-១៩ សម្រាប់ពលរដ្ឋខេត្តសៀមរាប មានចំនួន៦៤ទីតាំង ក្នុងនោះចាប់ពីអាយុ១៨ឆ្នាំឡើង និងចាប់ពីអាយុ១២ឆ្នាំដល់ក្រោម១៨ឆ្នាំ អនុវត្តដោយក្រុមគ្រូពេទ្យស៊ីវិល មានរយៈពេល១៤ថៃ្ង នៅតាមបណ្តាទីតាំងចំនួន២២កន្លែងទូទាំងខេត្ត ដូចជាមាននៅតាមមន្ទីរពេទ្យបង្អែកខេត្ត មន្ទីរពេទ្យបង្អែកស្រុកប្រតិបត្តិ និងតាមបណ្តាមណ្ឌលសុខភាពនានា និងចាប់ពីអាយុ១៨ឆ្នាំឡើង ដោយក្រុមគ្រូពេទ្យយោធា មានរយៈពេល១០ថ្ងៃ នៅបណ្តាទីតាំចំនួន៤២កន្លែង រួមមានតាមទីវត្តអារាម សាលារៀន និងសាលាឃុំ ហើយប្រជាពលរដ្ឋដែលត្រូវទទួលការចាក់វ៉ាក់សាំងដូសទី៣ ត្រូវយកប័ណ្ណចាក់វ៉ាក់សាំងលើកទី២ទៅជាមួយផងដែរ ដើម្បីពិនិត្យផ្ទៀងផ្ទាត់ និងត្រូវមានគម្លាតពេលវេលា ពីការចាក់លើកទី២ មកដល់ការទទួលចាក់លើកទី៣នេះ ពី៤ខែ ទៅ៦ខែ។
សូមជម្រាបថា នៅក្នុងវិបត្តិជំងឺឆ្លងកូវីដ-១៩ ខេត្តសៀមរាបបានទទួលរងការឆ្លងជំងឺកូវីដ-១៩ ចំនួន ២០.៦៣៤នាក់ ក្នុងនោះបានព្យាបាលជាសះស្បើយចំនួន ២០.២៤៨នាក់ និងស្លាប់ចំនួន ៣១៦នាក់ ។
ដើម្បីប្រយុទ្ធនឹងការរីករាលដាលនេះ ក្រោមការដឹកនាំរបស់សម្ដេចតេជោ ហ៊ុន សែន ប្រមុខរាជរដ្ឋាភិបាលកម្ពុជា រយៈកាលកន្លងមក រដ្ឋបាលខេត្តសៀមរាប បានបើកយុទ្ធនាការចាក់វ៉ាក់សាំងការពារជំងឺកូវីដ-១៩ សម្រេចបានលទ្ធផល អាយុ១៨ ឆ្នាំឡើងបានចំនួន ៦២៨.៤៧៤នាក់ , អាយុ១២ ឆ្នាំដល់ ១៧ឆ្នាំបានចំនួន ១២៨.៨៣១នាក់ , កុមារ អាយុ៦ ឆ្នាំដល់ក្រោម ១២ឆ្នាំបានចំនួន ១៣៣.៨១៦នាក់ និងកុមារអាយុ៥ឆ្នាំ មានចំនួន ១៤.៥១៤នាក់ ៕
អត្ថបទ និង រូបថត ៖ លោក ងិន គឹមឡេង
កែសម្រួលអត្ថបទ ៖ លោក លីវ សាន្ត
