សមាសភាពអនុគណៈកម្មការសាងសង់ស្តូបអនុស្សាវរីយ៍នយោបាយឈ្នះឈ្នះ នៅក្នុងស្រុកអន្លង់វែង ខេត្តឧត្តរមានជ័យ បានប្រកាសជាផ្លូវការហើយ នាព្រឹកថ្ងៃទី១០ ខែមករា ឆ្នាំ២០២២ នៅសាលប្រជុំសាលាខេត្តសៀមរាប ក្រោមអធិបតីភាពដ៏ខ្ពង់ខ្ពស់សម្តេចពិជ័យសេនា ទៀ បាញ់ ឧបនាយករដ្ឋមន្ត្រី រដ្ឋមន្ត្រីក្រសួងការពារជាតិ និងជាប្រធានគណៈកម្មការសាងសង់ស្ថូបអនុស្សាវរីយ៍ ឈ្នះ ឈ្នះ ។
មានប្រសាសន៍ក្នុងឱកាសនោះ សម្តេចពិជ័យសេនា បានសម្តែងនូវការកោតសរសើរ និងវាយតម្លៃខ្ពស់ចំពោះឯកឧត្តម ទេសរដ្ឋមន្ត្រី គន់ គីម ដែលបានខិតខំប្រឹងប្រែងយកចិត្តទុកដាក់ ប្រកបដោយស្មារតីទទួលខុសត្រូវខ្ពស់ ដោយបានធ្វើការណែនាំដល់ក្រុមការងារសាងសង់វិមានឈ្នះ ឈ្នះ សហការជាមួយអាជ្ញាធរមូលដ្ឋាន និងស្ថាប័នពាក់ព័ន្ធរខេត្ត មានគំនិតផ្តួចផ្តើមសាងសង់ស្តូបអនុស្សាវរីយ៍ ឈ្នះ ឈ្នះ នៅខេត្តឧត្តរមានជ័យនេះ ក្នុងនោះបានស្នើដល់ឯកឧត្តម គន់ គីម និងសមាជិកនៃអនុគណៈកម្មការទាំងអស់ សូមបន្តយកចិត្តទុកដាក់អនុវត្តការងារឱ្យមានតម្លាភាព ប្រសិទ្ធភាព គណនេយ្យភាពទាំងកិច្ចការរដ្ឋបាល ខ្លឹមសារបច្ចេកទេស និងធានាតាមនីតិវិធីបានកំណត់ ។
សម្តេចពិជ័យសេនា ទៀ បាញ់ មានប្រសាសន៍ទៀតថា កម្ពុជាបានជួបប្រទះក្នុងការឆ្លងកាត់ភ្នក់ភ្លើងសង្គ្រាមដែលបង្កការឈឺចាប់ខ្លោចផ្សាចំពោះប្រជាជនកម្ពុជាទាំងមូលក្នុងនោះ ក៏មានខេត្តឧត្តរមានជ័យ បានបន្សល់ស្លាកស្នាមមិនទាន់រលុបអស់ឡើយ មកដល់ពេលបច្ចុប្បន្ននេះ ដូច្នេះការសាងសង់វិមានឈ្នះ ឈ្នះ នេះ គោលបំណងបង្ហាញពីវប្បធម៌កត្តញ្ញូ សម្ដែងការដឹងគុណ និងការចងចាំរំឭកដល់វីរភាព ស្នាដៃ និងភាពឈ្លាសវៃរបស់ថ្នាក់ ដឹកនាំក្នុងការស្វែងរកសន្តិភាព ដែលបានចំណាយសាច់ស្រស់ ឈាមស្រស់ ដើម្បីបុព្វហេតុសន្តិភាព, បង្ហាញពីព្រឹត្តិការណ៍ ប្រវត្តិសាស្រ្តជាតិ, បញ្ជាក់ពីសច្ចភាពប្រវត្តិសាស្រ្តពិត ដែលបានកើតចេញលើកដំបូងនោះ គឺដំណើរឆ្ពោះទៅកាផ្ដួលរំលំ របបប្រល័យពូជសាសន៍ ប៉ុល ពត ២០ មិថុនា ១៩៧៧ ទើបមានព្រឹត្តិការណ៍ប្រវត្តិសាស្រ្តជាបន្តបន្ទាប់ និងជាទីកន្លែង សម្រាប់មនុស្សជំនាន់ក្រោយសិក្សាស្វែងយលរប្រវត្តិសាស្ត្រពិតរបស់ខេត្តឧត្តមានជ័យ បញ្ជាក់ពីភាពពិតរបស់កូនខ្មែរ សម័យនេះ និងអំពីសមត្ថភាពចំណេះដឹងតម្លៃពិតប្រាកដនៃមគ្គុទេសក៍អ្នកដឹកនាំកម្ពុជា។
សម្តេពិជ័យសេនា ទៀ បាញ់ មានប្រសាសន៍ទៀតថា៖ ជាច្រើនជំនាន់មកហើយ ព្រះរាជាណាចក្រកម្ពុជាយើង ពុំធ្លាប់ទទួលបានសន្តិភាពពេញលេញ ដូច សម័យសព្វថ្ងៃនេះទេ ជួនកាលមានការបែកបាក់ទៅជា២ ជា៣ភាគី ដែលនាំឱ្យប្រទេសជាតិមានជម្លោះនឹងគ្នាឥតឈប់ឈរ នាពេលកន្លងមក។ នៅក្នុងដំណាក់កាលចុងក្រោយ គឺដោយសារបបប្រល័យពូជសាសន៍ ប៉ុល ពត អៀង សារី ដែលបាន ធ្វើឱ្យប្រទេសកម្ពុជាមានមហន្តរាយនោះ ទើបមានព្រឹត្តិការណ៍ថ្ងៃ២០ មិថុនា ១៩៧៧ ថ្ងៃ២ ធ្នូ ១៩៧៨ និងថ្ងៃ៧ មករា ១៩៧៩ រហូតដល់១៩៩៨ ដែលមានការអនុវត្តនយោបាយឈ្នះ ឈ្នះ និងការបញ្ចប់សង្គ្រាមស៊ីវិលនៅកម្ពុជា ក្រោមការដឹកនាំប្រកបដោយគតិបណ្ឌិតសម្តេចតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា ។
សម្តេចពិជ័យសេនា មានប្រសាសន៍បន្ថែមទៀតថា សមិទ្ធផលនយោបាយឈ្នះ ឈ្នះ នាំឱ្យប្រទេសជាតិទទួលបានសន្តិភាពពេញលេញ ដែលជាកត្តាចម្បងសម្រាប់ជំរុញការ អភិវឌ្ឍប្រទេសជាតិលើគ្រប់វិស័យ និងការធ្វើសមាហរណកម្មកម្ពុជា ទៅក្នុងកិច្ចការតំបន់ និងអន្តរជាតិដោយជោគជ័យ និង បានប្រែក្លាយជីវភាពរស់នៅរបស់ប្រជាជនពីជីវភាពក្រីក្រ មកជាប្រជាជនមានចំណូលកម្រិតមធ្យម ហើយបទពិសោធន៍ជាប្រវត្តិសាស្រ្តជាច្រើនជំនាន់ក្នុងអតីតកាល និងសមិទ្ធផលសង្គមជាតិកន្លងមកថ្មីៗនេះ គឺជាមូលដ្ឋានដ៏សំខាន់សម្រាប់យើងរួមសាមគ្គីគ្នា ការសាងសង់វិមាន ឈ្នះ ឈ្នះ នៅរាជធានីភ្នំពេញ បានកើតឡើងក្រោមគំនិតផ្តួចផ្តើមដ៏ខ្ពង់ខ្ពស់របស់សម្តេចតេជោ ហ៊ុន សែន និងស្តូបឈ្នះ ឈ្នះ នៅខេត្តកោះកុង ដើម្បីបង្ហាញ និងរំលឹកដល់វីរភាព និង ស្នាដៃរបស់វីរជន ដែលបានចំណាយសាច់ស្រស់ ឈាមស្រស់ និងភាពឈ្លាសវៃរបស់ថ្នាក់ដឹកនាំក្នុងការស្វែងរកសន្តិភាព។
គួររំលឹកថា តាមផែនការគ្រោងទុក គម្រោងប្លង់មេនៅលើទីតាំងអភិវឌ្ឍសាងសង់ស្ថូបឈ្នះ ឈ្នះ និងមានសាងសង់តំបន់ផ្សេងៗថែមទៀត បង្ហាញពីសាសនា វប្បធម៌ ប្រវត្តិសាស្ត្រខ្មែរនៅខេត្តឧត្តរមានជ័យ ដែលជាតំបន់ទេសចរណ៍ ប្រវត្តិសាស្ត្រ សម្រាប់ទាក់ទាញភ្ញៀវជាតិ អន្តរជាតិ មកលំហែកាយ និងស្វែងយល់ពីតម្លៃសន្តិភាពនៅទិសឧត្តរកំពុងមានសព្វថ្ងៃ បាន កើតឡើងក្នុងពេលប្រទេសជាតិមានសន្តិភាពពេញលេញ តាមរយៈនយោបាយឈ្នះ ឈ្នះ ចាប់តាំងពីឆ្នាំ១៩៩៨ រហូតដល់បច្ចុប្បន្ន ក្រោមការចូលរួមពីគ្រប់មជ្ឈដ្ឋានទាំងធនធានថវិកា គំនិត ប្រាជ្ញា របស់មន្រ្តីរាជការ កងកម្លាំងប្រដាប់អាវុធ ព្រះសង្ឃ ប្រជាជន មហាជន បញ្ញវន្ត និស្សិត សិស្ស ដោយមិនគិតនិន្នាការនយោបាយឡើយ ហើយសំណង់ និងតំបន់អភិវឌ្ឍនេះនឹងក្លាយទៅជាសំណង់ប្រវត្តិ សាស្រ្តជាដើរាប់រយឆ្នាំ ជាកេរមរតកក្នុងសម័យតេជោសែន សម្រាប់មនុស្សជាតិគ្រប់ជំនាន់នៅលើទឹកដីព្រះរាជាណាចក្រកម្ពុជា នាទិសឧត្តរ ៕
អត្ថបទ និង រូបថត ៖ លោក យូ វង្ស
កែសម្រួលអត្ថបទ ៖ លោក លីវ សាន្ត
