វឌ្ឍនភាព ស្ដីពីគម្រោងស្ថាបនាហេដ្ឋារចនាសម្ព័ន្ធផ្លូវចំនួន ៣៨ខ្សែ នៅក្រុងសៀមរាប ខេត្តសៀមរាប ប្រចាំឆមាសទី២ ឆ្នាំ២០២១ គិតត្រឹមថ្ងៃទី២៩ ខែធ្នូ ឆ្នាំ២០២១ សម្រេចបាន១០០% តាមផែនការ ដែលបានគ្រោងទុក និងជាពេលវេលាស្របគ្នាទៅនឹងថ្ងៃនៃខួបលើកទី២៣ ដែលប្រទេសកម្ពុជា ទទួលបាននូវសុខសន្តិភាពពេញលេញ ក្រោមគោលនយោបាយឈ្នះ ឈ្នះ របស់សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា ។ នេះបើតាមប្រសាសន៍ ឯកឧត្តម ស៊ុន ចាន់ថុល ទេសរដ្ឋមន្ត្រី រដ្ឋមន្ត្រីក្រសួងសាធារណការ និងដឹកជញ្ជូន ក្នុងឱកាសដឹកនាំក្រុមការងារគ្រប់ផ្នែកពាក់ព័ន្ធចុះពិនិត្យវឌ្ឍនភាពការងារ នៃការស្ថាបនាហេដ្ឋារចនាសម្ព័ន្ធផ្លូវចំនួន ៣៨ខ្សែ នៅក្នុងក្រុងសៀមរាប ខេត្តសៀមរាប នារសៀលថ្ងៃទី០៩ ខែមករា ឆ្នាំ២០២២ ។សមិទ្ឋផលដ៏ធំធេងនេះ គ្រោងនឹងសម្ពោធដាក់ឱ្យប្រើប្រាស់ជាផ្លូវការក្នុងវេលាសមស្របណាមួយ តាមរយ:ការគោរពស្នើសុំការអនុញ្ញាតិដ៏ខ្ពង់ខ្ពស់ ពីសម្តេចអគ្គមហាសេនាបតីតេជោ ហ៊ុន សែននាយករដ្ឋមន្ត្រី។
ឯកឧត្តម បញ្ជាក់ថា៖ ដោយឡែកការងារបំពាក់កាមេរ៉ាសុវត្ថិភាពចំនួន២០០ទីតាំង, ការងារដំឡើងបង្គោលភ្លើងបំភ្លឺផ្លូវចំនួន ៥,០០៣ដើម, ការងារដំឡើងភ្លើងសញ្ញាចរាចរណ៍(ភ្លើងស្តុប)ចំនួន ២០ទីតាំង, ការងារដាំដើមឈើចំនួន ៣,១២៥ដើម និងការងារបំពាក់បរិក្ខារចរាចរណ៍ លើខ្សែផ្លូវដែលស្ថិតក្នុងគម្រោងស្ថាបនាហេដ្ឋារចនាសម្ព័ន្ធផ្លូវទាំង៣៨ សម្រេចបាន ៧២,៧៤% ។
ឯកឧត្តម មានបន្តថា៖ បន្ថែមពីសមិទ្ឋផលនៃហេដ្ឋារចនាសម្ព័ន្ឋផ្លូវទាំង៣៨ខ្សែ ដែលផ្តល់ដោយរាជរដ្ឋាភិបាលកម្ពុជា សម្រាប់ខេត្តសៀមរាបនេះ ក្រុមការងារបច្ចេកទេស នៃក្រសួងសាធារណ:ការក៏កំពុងរៀបចំសាងសង់រង្វង់មូលដ៏ធំមួយនៅចំណុចផ្សារស្វាយធំ ឃុំកណ្តែកស្រុកប្រាសាទបាគង ដែលជាចំណុចព្រំប្រទល់នៃស្រុកប្រាសាទបាគង និងក្រុងសៀមរាប និងជាចំណុចប្រសព្វ នៃផ្លូវវាងក្រុងដែលមានស្រាប់ផងដែរ ដើម្បីឱ្យមានសណ្តាប់ធ្នាប់របៀបរៀបរយ និងបញ្ចៀសការកកស្ទះចរាចរ ក្នុងការបើកបរ។ ជាមួយគ្នានេះ ក្រុមការងារបច្ចេកទេសក៏កំពុងសិក្សាចំណុចគោលដៅសម្រាប់បង្កើតផ្លូវវាងក្រុងថ្មីបន្ថែមទៀតផង។ឯកឧត្តម ទេសរដ្ឋមន្ត្រីបញ្ជាក់បន្ថែមថា៖ បច្ចុប្បន្នយើងកំពុងចាប់ផ្តើមសាងសង់រង្វង់មូលនេះ ដែលមានទំហំ២៥ម៉ែត្រ នឹងមានរចនាជារូបផ្ការំដួល ក្រៅពីនេះក្រុមការងារកំពុងសិក្សាធ្វើផ្លូវវាងក្រុងថ្មីមួយខ្សែទៀត ជាប្រាក់កម្ចីពីប្រទេសកូរ៉េ និងរៀបចំជំរុញឱ្យមានការដឹកជញ្ជូនដោយរថយន្តBusដើរដោយប្រព័ន្ឋអគ្គិសនី ដើម្បីកាត់បន្ថយការបំពុលបរិយាកាសបរិស្ថាន ព្រមទាំងកាត់បន្ថយចរាចរកកស្ទះ ដោយសារខេត្តនេះជាខេត្តសម្បូរទៅដោយរមណីយដ្ឋានវប្បធម៌ប្រវត្តិសាស្ត្រ និងប្រាង្គប្រាសាទជាច្រើនផង ។ ចំពោះផ្លូវវាងក្រុងថ្មីនេះ ក្រុមការងារក៏កំពុងសិក្សាលំអិតមុននឹងជ្រើសរើសថាគួរយកពីចំណុចណាកាត់តាមច្រកណា ដើម្បីបញ្ចៀសផលប៉ះពាល់ជាមួយនឹងប្រជាពលរដ្ឋ រួចហើយនឹងរៀបចំជានិតិវិធីដាក់ឱ្យដេញថ្លៃ ដើម្បីចាប់ផ្តើមសាងសង់ផ្លូវនោះ។
គួររម្លឹកផងដែរថា៖ គម្រោងកែលម្អហេដ្ឋារចនាសម្ព័ន្ធផ្លូវក្នុងក្រុងសៀមរាប ចំនួន៣៨ខ្សែ នេះ មានប្រវែងសរុប ១០៦,៤២ គីឡូម៉ែត្រ ដោយប្រើប្រាស់ថវិកាជាតិសរុបប្រមាណជាង ១៥០លានដុល្លារអាមេរិក ដោយក្នុងនោះចំនួន ៩លានដុល្លារអាមេរិកចំណាយលើការងារចាំបាច់ក្នុងការរៀបចំ ស្ថាបនាប្រព័ន្ធបង្ហូរទឹកភ្លៀង និងទឹកកខ្វក់ ស្ថិតក្រៅគម្រោងសាងសង់ខ្សែផ្លូវទាំង៣៨នេះ ដោយប្រើប្រាស់រយ:ពេល ១៣ខែក្នុងការសាងសង់។ ពិធីសម្ពោធបើកការដ្ឋានសាងសង់កាលពីថ្ងៃទី៣០ ខែវិច្ឆិកា ឆ្នាំ២០២០ ក្រោមអធិបតីភាពដ៏ខ្ពង់ខ្ពស់របស់សម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា។
ឯកឧត្តម ស៊ុន ចាន់ថុល បាបឱ្យដឹងដែរថា ការសាងសង់ត្រូវបានបែងចែកជាបួនប្រភេទរួមមាន៖ ១) ផ្លូវជួសជុលដោយអ៊ុតបេតុងកៅស៊ូ (AC) បន្ថែមពីលើ កម្រាស់៥សង់ទីម៉ែត្រ ប្រវែងសរុប៣១,៧៧គីឡូម៉ែត្រ ២) ផ្លូវស្ថាបនាដោយក្រាលបេតុង សរសៃដែក កម្រាស់២០សង់ទីម៉ែត្រ រួចអ៊ុតក្រាលបេតុងកៅស៊ូ(AC)ពីលើ កម្រាស់ ៥ ទៅ ៧ សង់ទីម៉ែត្រ ប្រវែងសរុប ៧,៨៦ គីឡូម៉ែត្រ ៣) ផ្លូវជួសជុលដោយក្រាលថ្មម៉ិច រួចអ៊ុតបេតុងកៅស៊ូ(AC) ពីលើ កម្រាស់៥ ទៅ ៧ សង់ទីម៉ែត្រ ប្រវែងសរុប១៣,៧៣ គីឡូម៉ែត្រ ៤) ផ្លូវស្ថាបនាដោយក្រាលបេតុង សរសៃដែក កម្រាស់ ២០ ទៅ ២៥ សង់ទីម៉ែត្រ ប្រវែងសរុប៥០,៨៦ គីឡូម៉ែត្រ និងការរៀបចំចិញ្ចើមផ្លូវ EN-០៣ ប្រវែង២,១៩គីឡូម៉ែត្រផងដែរ។ដោយឡែក ការងារសាងសង់ប្រព័ន្ធបណ្ដាញបង្ហូរទឹកមានប្រវែងសរុប២៤៨,៧២ គីឡូម៉ែត្រ ការងារ សាងសង់ប្រព័ន្ធបណ្ដាញលូទឹកភ្លៀងប្រវែងសរុប១៤៧,០០ គីឡូម៉ែត្រ និងការងារសាងសង់ប្រព័ន្ធ បណ្ដាញលូទឹកកខ្វក់មានប្រវែង១០១,៧១គីឡូម៉ែត្រ និងការងារដំឡើងបរិក្ខារផ្លូវថ្នល់មួយចំនួនទៀត៕
អត្ថបទ និងរូបភាព: លោកយូ វង្ស កែសម្រួលដោយ លីវ សុខុន!!!
