យោងតាមសេចក្ដីប្រកាសព័ត៌មានរបស់រដ្ឋបាលខេត្តសៀមរាប នៅថ្ងៃទី៦ ខែមករា ឆ្នាំ២០២២នេះ បានជម្រាបឲ្យដឹងថា អាជ្ញាធរខេត្តនឹងចាប់ផ្ដើមបើកយុទ្ធនាការចាក់វ៉ាក់សាំងបង្ការជំងឺកូវីដ-១៩ ដូសទី៣ ឬដូសជំរុញជូនប្រជាពលរដ្ឋអាយុ១៨ឆ្នាំឡើង និងអាយុចាប់ពី១២ ដល់ក្រោមអាយុ១៨ឆ្នាំ ក្នុងក្របខណ្ឌទូទាំងខេត្ត ដោយចាប់ផ្តើមពីថ្ងៃទី១០ ខែមករា ឆ្នាំ២០២២ នៅតាមទីតាំងដែលបានកំណត់ទុក។
សេចក្តីប្រកាសព័ត៌មានដដែលបានឲ្យដឹងទៀតថា ការចាក់វ៉ាក់សាំងនេះនឹងត្រូវបានធ្វើឡើងដោយ ២ផ្នែកគឺ មួយផ្នែកអនុវត្តដោយក្រុមគ្រូពេទ្យស៊ីវិល មានរយៈពេល១៤ថ្ងៃ ចាប់ពីថ្ងៃទី១០ ដល់ថ្ងៃទី២៤ ខែមករា ទៅលើពលរដ្ឋដែលពួកគាត់បានចាក់វ៉ាក់សាំងទាំង២លើក ជាមួយគ្រូពេទ្យស៊ីវិល។ ចំណែកមួយផ្នែកទៀត ធ្វើឡើងដោយគ្រូពេទ្យយោធា មានរយៈពេល១០ថ្ងៃ គិតចាប់ពីថ្ងៃទី១០ ដល់ថ្ងៃទី២០ ខែមករា ឆ្នាំ២០២២ ទៅលើប្រជាពលរដ្ឋដែលចាក់វ៉ាក់សាំងទាំង២លើក ជាមួយគ្រូពេទ្យយោធា។
សូមជម្រាបថា ក្រោមការដឹកនាំរបស់ប្រមុខរាជរដ្ឋាភិបាលកម្ពុជា រដ្ឋបាលខេត្តសៀមរាប បានបើកយុទ្ធនាការចាក់វ៉ាក់សាំងការពារជំងឺកូវីដ-១៩ សម្រេចបានលទ្ធផលមានប្រជាពលរដ្ឋបានទទួលការវ៉ាក់សាំង ក្នុងប្រជាពលរដ្ឋអាយុ ១៨ឆ្នាំឡើង មានចំនួន ៦២៨.៤៧៤នាក់, អាយុ១២ ឆ្នាំដល់ ១៧ឆ្នាំ មានចំនួន ១២៨.៨៣១នាក់ និងកុមារ អាយុ៦ឆ្នាំដល់ក្រោម ១២ឆ្នាំ មានចំនួន ១៣៣.៨១៦នាក់ និងកុមារអាយុ៥ឆ្នាំ មានចំនួន ១៤.៥១៤នាក់៕
អត្ថបទ៖ លោក ជា ស្រស់
កែសម្រួល៖ អ៊ុន ណារាជ្យ
