នាព្រឹកថ្ងៃទី១៦ ខែមករា ឆ្នាំ២០២២
ឯកឧត្តម ឧត្តមសេនីយ៍ឯក គង់ ប៊ុនលី មេបញ្ជាការរង នៃបញ្ជាការដ្ឋានអង្គរក្សបាននាំយកអង្ករចំនួន ២០តោន ដែលជាអំណោយរបស់
ឯកឧត្តម នាយឧត្តមសេនីយ៍កិត្តិបណ្ឌិត ហ៊ីង ប៊ុនហៀង អគ្គមេបញ្ជាការរង នៃកងយោធពលខេមរភូមិន្ទ និងជាមេបញ្ជាការ នៃបញ្ជាការដ្ឋានអង្គរក្ស ប្រគល់ជូនសម្ដេចពិជ័យសេនា ទៀ បាញ់ ឧបនាយករដ្ឋមន្ត្រី រដ្ឋមន្ត្រីក្រសួងការពារជាតិ និងជាប្រធានក្រុមការងាររាជរដ្ឋាភិបាលចុះជួយខេត្តសៀមរាប តាមរយៈលោក ពិន ប្រាកដ អភិបាលរងខេត្តសៀមរាប តំណាងរដ្ឋបាលខេត្តសៀមរាប ដើម្បីជួយដល់ប្រជាពលរដ្ឋ និងប្រើប្រាស់ក្នុងបុព្វហេតុនានាក្នុងខេត្ត ខណៈវិបត្តិនៃជំងឺកូវីដ-១៩ នៅតែបន្តគំរាមកំហែងនៅក្នុងប្រទេសកម្ពុជា និងទូទាំងសកលលោក។
ឯកឧត្តម ឧត្តមសេនីយ៍ឯក គង់ ប៊ុនលី មានប្រសាសន៍ថា នៅក្នុងស្ថានភាពដ៏លំបាកនេះកងកម្លាំងកងយោធពលខេមរភូមិន្ទ និងបញ្ជាការដ្ឋានកងអង្គរក្ស តែងតែចូលរួម ប្រយុទ្ធប្រឆាំង ទប់ស្កាត់ការឆ្លងរីករាលដាលនៃជំងឺកូវីដ១៩ នៅក្នុងប្រទេស គ្រប់កាលៈទេសៈ ជាក់ស្តែង អំណោយដែលបាននាំយកមកប្រគល់នៅពេលនេះជាដើម។
ក្នុងឱកាសនោះដែរ លោក ពិន ប្រាកដ លើកឡើងថា ខណ:ការរីករាលដាលជំងឺកូវីដ-១៩ ប្រភេទថ្មីអូមីក្រុងនេះ រដ្ឋបាលខេត្ត បាននឹងកំពុងយកចិត្តទុកដាក់ខ្ពស់ ចំពោះការត្រួតពិនិត្យជើងហោះហើរ ក្នុងនិងក្រៅស្រុក មកកាន់ខេត្តសៀមរាប និងជាពិសេសការ ទប់ស្កាត់ការឆ្លងរីករាលដាលនៅក្នុងសហគមន៍។ ទន្ទឹមនោះ អភិបាលរងខេត្តក៏បានថ្លែងអំណរគុណដល់ងឯកឧត្តម នាយឧត្តមសេនីយ៍កិត្តិបណ្ឌិត ហ៊ីង ប៊ុនហៀង និងក្រុមការងារ ដែលតែងតែយកចិត្តទុកដាក់ និងជួយដល់ប្រជាពលរដ្ឋក្នុងខេត្តសៀមរាប។
គួរជម្រាបដែរថា កាលពីថ្ងៃទី១០ ខែមករា ឆ្នាំ២០២២នេះ ខេត្តសៀមរាប បានចាប់ផ្ដើមចាក់វ៉ាក់សាំងការពារជំងឺកូវីដ-១៩ លើកទីបី ដែលជាដូសជំរុញ ដែលមានរយៈពេល១៤ថ្ងៃ ជូនដល់ប្រជាពលរដ្ឋក្នុងខេត្តសៀមរាប ក្រោមការចុះពិនិត្យផ្ទាល់ របស់សម្ដេចពិជ័យសេនា ទៀ បាញ់។
អត្ថបទ និងរូបភាព : លោក សេង ផល្លី
កែសម្រួល : លោក លីវ សាន្ត
