ស្ថិតក្រោមអធិបតីភាពឯកឧត្តម ឡៅ ឆន សមាជិកគណ:កម្មការទី៧ នៃព្រឹទ្ធសភា, ឯកឧត្តម អ៊ាន ឃុន ប្រធានក្រុមប្រឹក្សាខេត្តសៀមរាប, លោក ពិន ប្រាកដ អភិបាលរងខេត្ត តំណាងឯកឧត្តមអភិបាលខេត្តសៀមរាប ( ឯកឧត្តម ទៀ សីហា ) បានអញ្ជើញសម្ពោធអាគារសិក្សា១ខ្នង ២ជាន់ ស្មើនឹង១០បន្ទាប់ ស្ថិតក្នុងសាលាបឋមសិក្សា និងអនុវិទ្យាល័យក្របីរៀល ភូមិទទា សង្កាត់ក្របីរៀល ក្រុងសៀមរាប បានប្រារព្ធពិធីកាត់ខ្សែបូរ សម្ពោធដាក់ឲ្យប្រើប្រាស់ជាផ្លូវការ នាព្រឹកថ្ងៃទី១៦ ខែមករា ឆ្នាំ២០២២។ អ្វីដែលជាការចាប់អារម្មណ៍នោះ គឺរបាយការណ៍ដែលលើកបង្ហាញដោយលោក ផយ សារូ នាយកសាលាបឋមសិក្សាក្របីរៀល ថា កាលពីឆ្នាំ១៩៧៩ ទីនេះគឺជាមូលដ្ឋានដាច់ស្រយាល កូនចៅប្រជាពលរដ្ឋ លោកគ្រូ អ្នកគ្រូ ត្រូវបានរៀនសូត្រ និងបង្រៀនសិស្សនៅក្រោមផ្ទះប្រជាពលរដ្ឋប៉ុណ្ណោះ ។ ឆ្នាំ១៩៨២ ផ្តើមចេញពីព្រះសង្ឃវត្តព្រៃផ្តៅ ការចូលរួមពីសំណាក់ ឧបាសក ឧបាសិកា អាជ្ញាធរមូលដ្ឋាន អាណាព្យាបាល បាននាំគ្នារុះរើផ្ទះបាយនៅសល់ពីរបបប៉ុលពត កសាងបានសាលារៀន១ខ្នង ស្មើនឹង៣បន្ទប់។
ឆ្នាំ១៩៨៤ កសាងបាន១ខ្នងទៀត មាន២បន្ទប់ ដំបូលក្បឿង ជញ្ជាំងស្លឹកដូង។ ឆ្នាំ១៩៩២ អាគារ២ខ្នង ដែលកសាងនោះ ត្រូវបាក់រលំដោយខ្យល់ព្យុះ។ ឆ្នាំ១៩៩៣ ព្រះសង្ឃផ្តើមកសាងឡើងវិញ ក្រោមការជួយជ្រោមជ្រែងពីមន្ទីរអប់រំខេត្ត បន្ទាប់មកមានការចូលរួមពីអង្គការដៃគូអភិវឌ្ឍន៍។ ឆ្នាំ១៩៩៦ មូលនិធិសង្គម នៃព្រះរាជាណាចក្រកម្ពុជា បានផ្ដល់ឲ្យនូវអគារ១ខ្នង មាន៤បន្ទប់ និងបន្តមកទៀត មានការីកចំរើនជាលំដាប់ រហូតដល់បច្ចុប្បន្ន រួមទាំងបានតម្លើងកម្រឹតសិក្សាជាអនុវិទ្យាល័យផងផែរ។
អ្វីដែលរបាយណ៍សង្កត់ធ្ងន់នោះគឺថា សាលារៀនមួយនេះ មិនឃ្លាតឆ្ងាយពីទឹកព្រះទ័យ នៃព្រះសង្ឃនោះឡើយ។ អាគារសិក្សាថ្មី ដែលបានបើកសម្ពោធនេះ ដែរគឺផ្តើមចេញពីព្រះទ័យ ព្រះតេជគុណ ហ៊ន់ ចឹក ព្រះចៅអធិការបន្តវេនវត្តព្រៃផ្តៅ នៃសង្កាត់ក្របីរៀល អាជ្ញាធរមូលដ្ឋានភូមិ-សង្កាត់ ប្រជាសហគមន៍ សប្បបុរសជន និងក្រុមការងារសមាគមចលនាយុវជនកម្ពុជា ១៥៧ សាខាខេត្តសៀមរាប។ ការចំណាយសាងសង់មានទំហំទឹកប្រាក់សរុបជាង ១៤ម៉ឺនដុល្លាអាមេរិក។
លោក ពិន ប្រាកដ អភិបាលរងខេត្តសៀមរាប ថ្លែងថា៖ ក្នុងពេលមុននោះ សង្គមជាតិនៅមានការខ្វះខាតស្ទើរទាំងស្រុង ទាំងសាលារៀន ថ្នាក់រៀន គ្រូបង្រៀន សៀវភៅសិក្សា សម្ភារ:សិក្សាផ្សេងទៀត សម្រាប់បម្រើដល់ការសិក្សា។ ប៉ុន្ដែរហូតដល់ពេលបច្ចុប្បន្ន យើងកសាងប្រព័ន្ធអប់រំមួយមានលក្ខណ:ពេញលេញ ដែលអាចឆ្លើយតបបាននឹងតម្រូវការ នៃទីផ្សារពលកម្ម ដែលជាលទ្ធផលកើតចេញពីការគិតគូរត្រូវ លើគោលនយោបាយបើកទូលាយការស្វាគមន៍ចំពោះការវិនិយោគ នៃវិស័យឯកជន ដើម្បីបំពេញបន្ថែមក្នុងការអភិវឌ្ឍវិស័យអប់រំ សិក្សាធិការជាតិ ធ្វើឱ្យការអភិវឌ្ឍន៍ធនធានមនុស្សរីកចម្រើនយ៉ាងឆាប់រហ័ស៕
អត្ថបទ និងរូបភាព: លោកងិន គឹមឡេង
កែសម្រួលដោយ លីវ សុខុន!!!
