ឯកឧត្តម ទៀ សីហា អភិបាល នៃគណ:អភិបាលខេត្តសៀមរាប បានមានប្រសាសន៍ថា គិតមកទល់ពេលនេះ ការស្ថាបនាហេដ្ឋារចនាសម្ព័ន្ធផ្លូវចំនួន ៣៨ខ្សែ នៅក្នុងក្រុងសៀមរាប ដែលជាអំណោយដ៏ថ្លៃថ្លារបស់សម្តេចតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា សម្រេចបាន ១០០ភាគរយ តាមផែនការដែលបានគ្រោងទុកហើយ នៅឡើយតែការងារបំពាក់កាមេរ៉ាសុវត្ថិភាព , ការងារដំឡើងបង្គោលភ្លើងបំភ្លឺផ្លូវ , ការងារដំឡើងភ្លើងសញ្ញាចរាចរណ៍ , ការងារដាំដើមឈើ និងការងារបំពាក់បរិក្ខារចរាចរណ៍តែប៉ុណ្ណោះ ប៉ុន្តែនៅក្នុងអំឡុងខែកុម្ភៈ ឬ ខែមីនា ខាងមុខនេះ ខេត្តសៀមរាបនឹងត្រូវប្រារព្ធពីធីកាត់ខ្សែបូរសម្ភោធដាក់ឲ្យប្រើប្រាស់ជាផ្លូវការហេដ្ឋារចនានាសម្ព័ន្ធផ្លូវ៣៨ខ្សែ ក្រោមអធិបតីភាពដ៏ខ្ពង់ខ្ពស់សម្តេចតេជោ ហ៊ុន សែន ដូច្នេះបញ្ហា សំខាន់ដែលត្រូវយកចិត្តទុកចំពោះមុខ គឺសណ្តាប់ធ្នាប់សាធារណៈ។
ឯកឧត្តម ទៀ សីហា មានប្រសាសន៍យ៉ាងដូច្នេះក្នុងឱកាសដឹកនាំកិច្ចប្រជុំគណ:បញ្ជការឯកភាពរដ្ឋបាលខេត្ត នៅសាលប្រជុំសាលាខេត្តសៀមរាប នាព្រឹកថ្ងៃទី១៧ ខែមករា ឆ្នាំ២០២២ម្សិលមិញនេះ ។
ឯកឧត្តមមានប្រសាសន៍បន្ថែមថា សណ្តាប់ធ្នាប់សាធារណៈ គឺជាផ្នែកមួយក្នុងការលើកកម្ពស់សោភ័ណភាពក្រុងសៀមរាប រួមជាមួយនឹងសម្រស់ថ្មីនៃផ្លូវ៣៨ខ្សែ ដូច្នេះក្នុងឱកាសនេះ សូមលោកអភិបាលក្រុងសៀមរាប បន្តសហការល្អជាមួយស្នងការដ្ឋាននគរបាលខេត្តនិងអង្គភាពស្ថាប័នពាក់ព័ន្ឋ បើកកិច្ចប្រជុំដើម្បីពិភាក្សាលើការរៀបចំសន្តិសុខ និង សណ្តាប់ធ្នាប់សាធារណៈ ឲ្យមានរបៀបរៀបរយ ដើម្បីឱ្យក្រុងសៀមរាបនៅតែរក្សាបានភាពស្រស់បៃតង និងមានបរិស្ថានល្អ សមជាទីក្រុងទេសចរណ៍វប្បធម៌ប្រវត្តិសាស្ត្រនិងជាប៉ូលទេសចរណ៍ដ៍សំខាន់របស់ព្រះរាជាណាចក្រកម្ពុជា ជាពិសេស អាជ្ញាធរក្រុង និងសមត្ថកិច្ច ត្រូវសហការគ្នារៀបចំ និងគ្រប់គ្រងអ្នកលក់ដូររទេះចល័តនៅតាមដងផ្លូវ តើផ្លូវណាដែលអាចអនុញ្ញាតឱ្យគាត់លក់ដូរបាន និងផ្លូវណាលក់ដូរមិនបាន។
ឯកឧត្តមអភិបាលខេត្តសៀមរាប បន្តថា ថ្វីត្បិតតែពួកគាត់បង្កភាពឥតសណ្តាប់ធ្នាប់តាមដងផ្លូវក៍ពិតមែន ប៉ុន្តែក៍មានផ្តល់ផលតម្លៃវិជ្ជមានសម្រាប់ប្រជាពលរដ្ឋ ដែលមានជីវភាពមធ្យម និងខ្សោយផងដែរ និងជួយទាក់ទាញអ្នកទេសចរមួយផ្នែកទៀតផង ហេតុនេះគួរពិនិត្យរៀបចំតំបន់ចំណុចគោលដៅណាសមរម្យឱ្យគាត់បានលក់ដូរ ដើម្បីងាយស្រួលក្នុងការគ្រប់គ្រងនិងរក្សាបាននូវសណ្តាប់ធ្នាប់របៀបរៀបរយមិនមានការកកស្ទះចរាចរណ៍តាមដងផ្លូវ ដើម្បីសុខុមាលភាពសង្គម និងថែរក្សាបានអនាម័យ បរិស្ថានក្នុងក្រុងផងដែរ ជាពិសេសការលើកកម្ពស់សោភ័ណភាពក្រុងសៀមរាបរបស់យើង ឲ្យកាន់តែមានភាពស្រស់ស្អាតជានិច្ចនិរន្តន៍ ។
ពាក់ព័ន្ធនឹងបញ្ហានេះ លោក សោម វិរ: នាយការិយាល័យចរាចរណ៍ផ្លូវគោក នៃស្នងការដ្ឋាននគរបាលខេត្តសៀមរាប បានឲ្យដឹងថា ឆ្លើយតបទៅនឹងសមិទ្ធផលថ្មី គឺហេដ្ឋារចនាសម្ព័ន្ធផ្លូវ៣៨ខែ្ស ក្នុងក្រុងសៀមរាប ដែលជាចំណងដៃដ៏ថ្លៃថ្លារបស់សម្តេចតេជោ ហ៊ុន សែន ប្រមុខនៃរាជរដ្ឋាភិបាលកម្ពុជា និង ទទួលបានការចង្អុលបង្ហាញ និងណែនាំពីលោកស្នងការនគរបាលខេត្ត លោកបានបែងចែកកម្លាំងចុះតាមគោលដៅ ដើម្បីធ្វើការណែនាំ និង ផ្សព្វផ្សាយដល់បងប្អូនប្រជាពលរដ្ឋ ជាពិសេស បងប្អូនអ្នកលក់ដូររទេះចល័តនៅតាមដងផ្លូវ ឲ្យពួកគាត់បានយល់ដឹងច្បាស់ពីសារៈសំខាន់នៃសណ្តាប់ធ្នាប់សាធារណៈ ការចូលរួមរបស់ពួកគាត់ពិតជាមិនអាចខ្វះបានឡើយ ដូច្នេះ ដើម្បីបរិស្ថានស្អាត អនាម័យស្អាត និងសណ្តាប់ធ្នាប់សាធារណៈល្អ គឺត្រូវទាមទារឲ្យមានការចូលរួមពីសំណាក់អ្នកពាក់ព័ន្ធ និងបងប្អូនប្រជាពលរដ្ឋទាំងអស់គ្នា ។
លោក សោម វិរ: បន្តថា ក្រៅពីនេះ ការគោរពច្បាប់ចរាចរណ៍ គឺរឿងមួយផ្សេងទៀតដែលមានសារៈសំខាន់ផងដែរ ដែលក្នុងនោះក៏ជាផ្នែកមួយក្នុងរក្សាបានល្អនូវសណ្តាប់ធ្នាប់សាធារណៈ ខណៈបច្ចុប្បន្ននេះ នៅក្នុងបណ្ដាហេដ្ឋារចនាសម្ព័ន្ធផ្លូវទាំង៣៨ខែ្សនេះ មន្ត្រីជំនាញកំពុងបំពេញការងារយ៉ាងសស្រាក់សស្រាំ លើការគូសគំនូសចរាចរណ៍ , បំពាក់ ផ្លាកសញ្ញាចរាចរណ៍ ភ្លើងស្តុបនានា និងការបំពាក់បរិក្ខារចរាចរណ៍ផ្សេងៗទឿត ដូច្នេះដើម្បីកាត់បន្ថយករណីគ្រោះថ្នាក់ចរាចរណ៍ ករណីកកស្ទះចរាចរណ៍ និង រក្សាបាននូវសណ្តាប់ធ្នាប់សាធារណៈល្អ ចូរយើងត្រូវចូលរួមអនុវត្តច្បាប់ និង គោរពច្បាប់ចរាចរណ៍ទាំងអស់គ្នា៕
អត្ថបទ និង រូបថត ៖ លោក យូ វង្ស និង លោក ស៊ាន សុផាត
កែសម្រួលអត្ថបទ ៖ លោក លីវ សាន្ត
