លោកឧត្តមសេនីយ៍ត្រី តេង ច័ន្ទណាត ស្នងការនៃស្នងការដ្ឋាននគរបាលខេត្តសៀមរាប បានឲ្យដឹងថា ក្នុងរយៈពេលមួយឆ្នាំ២០២១នេះ នៅទូទាំងខេត្តសៀមរាប មានករណីគ្រោះថ្នាក់ចរាចរណ៍បានកើតមានឡើងចំនួន៧០លើក ប៉ុន្តែបានថយចុះចំនួន៤លើក បើប្រៀបធៀបទៅនឹងឆ្នាំ២០២០ ដែលកើតមានចំនួន៧៤លើក ក្នុងនោះបណ្តាលឱ្យមនុស្សស្លាប់ចំនួន៦៣នាក់ , របួសធ្ងន់ចំនួន៣២នាក់ និងរបួសស្រាលចំនួន៣០នាក់ បណ្ដាលឲ្យខូចម៉ូតូចំនួន៤៨គ្រឿង , រថយន្តចំនួន៣៧គ្រឿង , គោយន្តចំនួន៣គ្រឿង និង កង់ចំនួន៤គ្រឿង ព្រមទាំងបានកសាងសំណុំរឿងបញ្ជូនទៅសាលាដំបូងខេត្ត ចំនួន៧២ករណី និងមនុស្សចំនួន៥នាក់ ។
លោកឧត្តមសេនីយ៍ត្រី តេង ច័ន្ទណាត មានប្រសាសន៍យ៉ាងដូច្នេះក្នុងឱកាសចូលរួមកិច្ចប្រជុំគណ:បញ្ជការឯកភាពរដ្ឋបាលខេត្ត នៅសាលប្រជុំសាលាខេត្តសៀមរាប កាលព្រឹកថ្ងៃទី១៧ ខែមករា ឆ្នាំ២០២២ម្សិលមិញនេះ ។
លោកឧត្តមសេនីយ៍ត្រី តេង ច័ន្ទណាត បានឲ្យដឹងទៀតថា មូលហេតុដែលនាំឲ្យកើតមានករណីគ្រោះថ្នាក់ចរាចរណ៍ នេះ រួមមាន ៖ បើកបរក្នុងល្បឿនលឿន ចំនួន៣៣លើក , បើកបរមិនប្រកាន់ស្តាំចំនួន១១លើក , បើកជែងក្នុងស្ថានភាពគ្រោះថ្នាក់ចំនួន៦លើក , បែកកង់និងរេចង្កូតទៅបុកម៉ូតូចំនួន១លើក , បត់ខ្វះការប្រុងប្រយ័ត្នចំនួន២លើក , បើកបរឆ្លងផ្លូវខ្វះការប្រយ័ត្នចំនួន៧លើក , បើកបរគ្រោះថ្នាក់ដោយខ្លួនឯងចំនួន៣លើក , គោយន្តគ្មានភ្លើងបំភ្លឺចំនួន២លើក , បើកបរក្នុងស្ថានភាពស្រវឹងចំនួន១លើក , បើកក្នុងស្ថានភាពងងុយដេកចំនួន១លើក , ដើរឆ្លងផ្លូវខ្វះការប្រុងប្រយ័ត្នចំនួន២លើក និង ចតលើផ្លូវគ្មានស្លាកសញ្ញាចំនួន១លើក ហើយដោយឡែកសម្រាប់ការងារអនុវត្តច្បាប់ចរាចរណ៍ផ្លូវគោកវិញ នៅឆ្នាំ២០២១នេះ បានធ្វើការផាកពិន័យម៉ូតូល្មើសច្បាប់គ្រប់ប្រភេទ ចំនួន ៣.៩០២គ្រឿង និង ផាកពិន័យរថយន្តតូចធំល្មើសច្បាប់គ្រប់ប្រភេទចំនួន ១.៧៧៤គ្រឿង ។
លោកស្នងការនគរបាលខេត្តសៀមរាប បានបង្ហាញនូវក្តីបារម្ភថា មានកត្តាប្រឈមចំពោះឥរិយាបទរបស់បងប្អូនមួយចំនួនក្នុងការបើកបរលើទ្រូងផ្លូវ ដោយពួកគាត់ខ្លះបើកបរក្នុងស្ថានភាពស្រវឹង , ខ្វះការយោគយល់ , មិនគោរពស្លាកសញ្ញាចរាចរណ៍ និង ភ្លើងសញ្ញាចរាចរណ៍ជាដើម ដែលបញ្ហាទាំងអស់នេះ ជាហានិភ័យ និងជាហេតុដែលអាចបង្កឲ្យកើតមានគ្រោះថ្នាក់ចរាចរណ៍គ្រប់ពេលវេលា ៕
អត្ថបទ និង រូបថត ៖ លោក យូ វង្ស
កែសម្រួលអត្ថបទ ៖ លោក លីវ សាន្ត
