កាលពីរសៀលថ្ងៃទី១៨ ខែមករាឆ្នាំ២០២២ បងប្អូនប្រជាពលរដ្ឋ ដែលជួបការខ្វះខាតក្នុងជីវភាពប្រចាំថ្ងៃចំនួន ៣៣គ្រួសារ ក្នុងភូមិគោកត្នោត សង្កាត់គោកចក ក្រុងសៀមរាប ខេត្តសៀមរាបបានទទួលការឧបត្ថម្ភស្បៀងអាហារពី លោក Andreas G. Flober និងភរិយា ដែលជាសប្បុរសជន ជនជាតិអាឡឺម៉ង់ដ៍ មករស់នៅប្រទេសខ្មែរជាង១០ឆ្នាំមកហើយ។ ក្រោមការជួយសម្របសម្រួលពីព្រះចៅអធិការវត្តមួយចំនួន ក្នុងក្រុងសៀមរាប សហការជាមួយអាជ្ញាធរមូលដ្ឋាន ដើម្បីកំណត់គ្រួសារដែលជួបភាពខ្វះខាតជាក់ស្តែង។ សម្ភារ:ផ្តល់ជូននោះក្នុងមួយគ្រួសារៗទទួលបាន អង្ករ ១៥គ.ក្រ, មី១កេស, ទឹកត្រី១ដប, ទឹកស៊ីអុីវ១ដប, សាប៊ូម្សៅ១កញ្ចប់ និងថវិការបស់ព្រះសង្ឃមួយគ្រួសារ១ម៉ឺនរៀលផងដែរ ។ លោក ណាំ នឿម មេភូមិគោកត្នោត បានសម្តែងក្តីត្រេកអរក្នុងនាមប្រជាពលរដ្ឋ ពីព្រោះពួកគាត់ទាំង ៣៣គ្រួសារពិតជាជួបការលំបាកក្នុងជីវភាពប្រចាំថ្ងៃពិតប្រាកដមែន ដោយសារអ្នកខ្លះបានបាត់បង់ការងារ និងរកការងារមិនបានធ្វើឡើងវិញ បាត់បង់អាជីវកម្ម ខ្វះមុខរបរជាដើម ចាប់តាំងពីក្នុងអំឡុងពេលជួបនូវវិបត្តិជំងឺឆ្លងកូវីដ-១៩ ជាង២ឆ្នាំមកម្ល៉េះ។
តំណាងម្ចាស់អំណោយ លោក Andreas G. Flober មានប្រសាសន៍ថា៖ សម្ភារ: អំណោយបន្តិចបន្តួចនេះមួយផ្នែកបានមកពីមិត្តភក្តិរបស់លោកនៅក្រៅប្រទេសផ្តល់មកតាមរយ:លោក និងមួយផ្នែកទៀតជាថវិកាផ្ទាល់ខ្លួនរបស់លោក និងភរិយា ដើម្បីជួយក្នុងសកម្មភាពមនុស្សធម៌ ចែករំលែកទៅដល់គ្រួសារដែលខ្វះខាតទៅតាមលទ្ឋភាពដែលមាន។ កន្លងមកក៏ធ្លាប់បានផ្តល់គ្រឿងឧបភោគបរិភោគតាមរយ:ការសម្របសម្រួលរបស់ព្រះចៅអធិការវត្តមួយចំនួនផងដែរ ដើម្បីនាំយកទៅចែកជូនដល់គ្រួសារខ្វះខាតជាច្រើនលើកមកហើយទាំងនៅក្នុងក្រុងនិងជនបទ។ លោក អានឌ្រៀស បានអំពាវនាវ និងសំណូមពរដល់អ្នកភូមិសូមកុំសម្លាប់សត្វ ព្រោះវានាំឱ្យមានពៀរវេរា និងសូមកុំកាប់ដើមឈើ ព្រោះដើមឈើផ្តល់នូវអត្ថប្រយោជន៍ច្រើនណាស់ក្នុងជីវភាពរស់នៅប្រចាំថ្ងៃរបស់មនុស្ស និងសត្វ។ ក្រៅពីផ្តល់ប្រយោជន៍សម្រាប់ប្រើប្រាស់ ដើមឈើជួយស្រូបឧស្ម័ន និងខ្យល់ពុលពីបរិយាកាស ជួយឱ្យភ្លៀងធ្លាក់ទៀងទាត់តាមរដូវ ជួយការពារខ្យល់ព្យុះ និងទឹកជំនន់ជាដើម យើងគួរនាំគ្នារក្សាឱ្យនៅគង់វង្សក្នុងភូមិស្រុកយើង ដើម្បីទុកជាប្រយោជន៍ដល់កូនចៅរបស់យើងទៅអនាគត ។
ព្រះសច្ចានុបាល នឿម វុទ្ធី ព្រះរាជាគណ:ថ្នាក់កិត្តិយស និងជាចៅអធិការវត្តបារាយមហានទីរតនារាម(ស្វាយរមៀត)បានគាំទ្រចំពោះការសំណូមពរខាងលើ ព្រោះដើមឈើផ្តល់នូវសារ:សំខាន់ដល់មនុស្សសត្វរាប់មិនបានប្រមាណមិនកើត តួយ៉ាង កាលពីព្រះសម្មាសម្ពុទ្ឋបរមគ្រូនៃយើង ទ្រង់ប្រសូត្រនៅក្រោមដើមឈើ ទ្រង់ត្រាស់ដឹងក៏នៅក្រោមដើមឈើ និងទ្រង់បរិនិព្វានក៏នៅក្រោមដើមឈើដែរ នេះជាឧទាហរណ៍ជាក់ស្តែងត្រួសៗ បើកាលណាយើងនាំគ្នាចេះតែកាប់ឈើដើម្បីបំពេញតែតម្រូវការហួសហេតុពេកក៏នាំមកនូវការបាត់បង់ មិនមានសល់អ្វីសម្រាប់កូនចៅយើងនោះទេ ។ ចំណែកការហាមមិនឱ្យសម្លាប់សត្វ ក៏មាននៅក្នុងសិក្ខាបទឬសីល៥ដែលព្រះពុទ្ឋបរមគ្រូនៃយើងបានបញ្ញតិឱ្យប្រជាពុទ្ធបរិស័ទ វៀរចាកការសម្លាប់សត្វ បំបាត់ជីវិតគេ។ព្រះពុទ្ធទ្រង់ចង្អុលបង្ហាញហេតុ និងផលគ្រប់សកម្មភាពប្រចាំថ្ងៃទាំងអស់កុំឱ្យយើងមានសេចក្តីប្រមាថ និងចៀសវាងនូវការសម្លាប់សត្វបំបាត់ជីវិតអ្នកដទៃគឺនាំឱ្យបុគ្គលអ្នកប្រព្រឹត្តិនោះមានកម្មពៀរ និងបាត់បង់នូវធនធានធម្មជាតិជាដើមផង។
ព្រះសច្ចានុបាល នឿម វុទ្ធី បានចាត់ទុកការផ្តល់អំណោយនេះ គឺបង្ហាញនូវការផ្តល់ឱ្យគ្នា នូវក្តីស្រឡាញ់រាប់អាន និង មេត្តាករុណា ដល់គ្នាទៅវិញទៅមកក្នុងកាល:ទេស: ដែលយើងទាំងអស់គ្នាកំពុងជួបនូវបញ្ហាប្រឈមនឹងជំងឺកូវីដ-១៩។ កាយវិការដ៏មនុស្សធម៌នេះ ក៏ជាចូលរួមដោះស្រាយទុកលំបាកជាមួយរាជរដ្ឋាភិបាល និងអាជ្ញាធរខេត្តផងដែរ ។ព្រះអង្គមានសង្ឃដីកាថា៖ សូមបងប្អូនញាតិញោមទំាងអស់កុំមានសេចក្តីប្រមាថឡើយ ជាពិសេសកុំប្រមាថជាមួយជំងឺកូវីដ-១៩ ចូរកុំធ្វេសប្រហែស ត្រូវប្រុងប្រយ័ត្នបង្ការ ការពារទប់ស្កាត់ទាំងអស់គ្នា និងណែនាំដល់កូនចៅ ឱ្យអនុវត្តបានត្រឹមត្រូវតាមការណែនាំរបស់ក្រសួងសុខាភិបាល និងវិធានការ ៣កុំ និង៣ការពាររបស់រាជរដ្ឋាភិបាលដើម្បីការពារ ទប់ស្កាត់ និង បង្ការការចម្លងជំងឺកូវីដ-១៩៕
អត្ថបទ និងរូបភាព: លោកយូ វង្ស កែសម្រួលដោយ លីវ សុខុន!!!
