នៅព្រឹកថ្ងៃទី១៩ ខែមករា ឆ្នាំ២០២២ ឯកឧត្តម ខៀវ កាញារីទ្ធ រដ្ឋមន្រ្ដីក្រសួងព័ត៌មាន បានជួបសំដែងការគួរសម និងពិភាក្សាការងារ ជាមួយ កញ្ញា ស្រី សុធាវី នាយិកាឣង្គការក្រុមការងារ ដើម្បីដោះស្រាយទំនាស់ ដើម្បីស្នើសុំកិច្ចសហការជាមួយក្រសួងព័ត៌មាន ពាក់ព័ន្ធទៅនឹងវិស័យការកសាង សន្តិភាពផ្សារភ្ជាប់ជាមួយនឹងសារព័ត៌មាន ដើម្បីជាចំណេះដឹងបន្ថែមសម្រាប់អ្នកសារព័ត៌មាន។
ក្នុងឱកាសនោះកញ្ញា ស្រី សុធាវី បានម្រាបជូនថា អង្គការក្រុមការងារដើម្បីដោះស្រាយទំនាស់ ជាអង្គការមិនមែនរដ្ឋាភិបាលក្នុងស្រុក ដែលធ្វើការងារលើការអភិវឌ្ឍ និងពង្រឹងសមត្ថភាព ស្តីអំពីការកសាងសន្តិភាព និងការបំប្លែងទំនាស់។ កញ្ញា បានរំលឹកឡើងវិញដែរថា មានសកម្មភាពដូចកាលគម្រោងឆ្នាំ២០១៩-២០២១ ដែរ ដោយឡែកសម្រាប់គម្រោងថ្មីនេះ គឺបន្តអនុវត្តនៅខេត្តគោលដៅ ដូចជា៖ ភ្នំពេញ កំពង់ឆ្នាំង បាត់ដំបង សៀមរាប មណ្ឌលគិរី កែប និងព្រះសីហនុ។ សម្រាប់គម្រោងបណ្តុះបណ្តាលអ្នកសារព័ត៌មានសន្តិភាព នឹងជ្រើសអ្នកចូលរួមជាមន្ត្រីមន្ទីរព័ត៌មាន អ្នកសារព័ត៌មានប្រជាពលរដ្ឋ TV online និងសហគមន៍ ក្នុងខេត្តគោលដៅ ដើម្បីឱ្យអ្នកសារព័ត៌មានដែលសកម្មនៅក្នុងប្រព័ន្ធផ្សព្វផ្សាយ បានយល់ពីការប្រើប្រាស់សារនៅក្នុងសង្គមដែលជាការចូលរួមចំណែក នៅក្នុងការកសាងសន្តិភាព កាត់បន្ថយនូវហិង្សា និងការប្រើប្រាស់ហិង្សាជាពាក្យសំដីតាមប្រព័ន្ធផ្សព្វផ្សាយ។
ឯកឧត្តម រដ្ឋមន្រ្ដី ខៀវ កាញារីទ្ធ គាំទ្រគម្រោង សារព័ត៌មានសន្តិភាព ឬប្រព័ន្ធផ្សព្វផ្សាយសន្តិភាព ឆ្នាំ២០២២ ដល់ ២០២៤ របស់អង្គការក្រុមការងារ ដើម្បីដោះស្រាយទំនាស់ដើម្បីពង្រឹងសមត្ថភាពដល់អ្នកសារព័ត៌មាន បានកាន់តែល្អប្រសើរបន្ថែមទៀតក្នុងពេលបំពេញការងារ។ «វគ្គបណ្ដុះបណ្ដាល ពង្រឹងសមត្ថភាពដល់អ្នកសារព័ត៌មាន នៅក្នុងការយល់ដឹងពីវិស័យការកសាងសន្តិភាព បញ្ជ្រាបចូលទៅក្នុងសារដែលអ្នកសារព័ត៌មានបានធ្វើកិច្ចការងារប្រចាំថ្ងៃ ក៏ដូចជាគិតគូរទៅក្នុងការលើកកម្ពស់សារព័ត៌មានសន្តិភាព ជៀសឆ្ងាយពីសារព័ត៌មានបែបហិង្សា នៅក្នុងការប្រើប្រាស់តាមបណ្ដាញសង្គមក្នុងសង្គមជាតិ និងពិនិត្យមើលទៅលើអត្ថបទផ្សេងៗ ដែលចុះផ្សាយហើយ ធ្វើការឆ្លុះបញ្ចាំងទៅលើអ្វីដែលបានអនុវត្ត សម្រាប់ការកែលម្អទៅលើប្រព័ន្ធផ្សព្វផ្សាយរបស់នោះ»៕
អត្តបទនិងរូបភាព៖ទូរទស្សន៍ជាតិកម្ពុជា
