នាល្ងាចថ្ងៃទី១៩ ខែមករា ឆ្នាំ២០២២ ក្រុងចំនួន៣របស់ព្រះរាជាណាចក្រកម្ពុជា ក្នុងចំណោម២១ប្រទេសនៃសមាជិកអាស៊ាន បានទទួលជ័យលាភីទីក្រុងទេសចរណ៍ស្អាតអាស៊ានលើកទី៣ ឆ្នាំ២០២២-២០២៤ ដែលបានរៀបចំនៅខេត្តព្រះសីហនុ និងជាទីកន្លែងរៀបចំវេទិកាទេសចរណ៍អាស៊ាន ឆ្នាំ២០២២។ ក្នុងនោះ ក៏មានក្រុងសៀមរាបផងដែរ ដែលអញ្ជើញទទួលជ័យលាភី ដោយឯកឧត្តម ទៀ សីហា អភិបាលខេត្តសៀមរាប និងក្រុង២ផ្សេងទៀត គឺក្រុងបាត់ដំបង និងក្រុងព្រះសីហនុ។
គួររំលឹកថា កាលពីឆ្នាំ២០២០ ខណ្ឌដូនពេញ (រាជធានីភ្នំពេញ) ក្រុងកំពត និងក្រុងតាខ្មៅ បានទទួលជ័យលាភីជាក្រុងទេសចរណ៍ស្អាតអាស៊ាន ដែលបានរៀបចំនៅក្រុងបានដាស៊េរីបេហ្គាវ៉ាន់ ប្រទេសព្រុយណេ។
ឯកឧត្តមបណ្ឌិត ថោង ខុន រដ្ឋមន្ត្រីក្រសួងទេសចរណ៍បានបញ្ជាក់ថា ការប្រគល់រង្វាន់នេះធ្វើឡើង ដើម្បីពង្រឹងភាពទាក់ទាញ និងបង្កើនភាពប្រកួតប្រជែងរបស់ក្រុងទេសចរណ៍អាស៊ាន ក៏ដូចជាពង្រឹងគុណភាពផលិតផល និងសេវាកម្មទេសចរណ៍នៅតាមបណ្តាក្រុងរបស់អាស៊ាន ស្របតាមផែនការយុទ្ធសាស្រ្តទេសចរណ៍អាស៊ាន ២០១៦-២០២៥ សំដៅធ្វើឱ្យអាស៊ានក្លាយជាគោលដៅទេសចរណ៍ប្រកបដោយគុណភាព និងភាពទាក់ទាញ ផ្តល់ភាពកក់ក្តៅដល់ភ្ញៀវទេសចរ។
យោងតាមគណៈកម្មាធិការជាតិវាយតម្លៃក្រុងស្អាត និងក្រសួងទេសចរណ៍ កម្ពុជាបាននិងកំពុងជំរុញចលនាប្រឡងប្រណាំងក្រុងស្អាត ទាំងនៅកម្រិតថ្នាក់ជាតិ និងកម្រិតតំបន់អាស៊ាន សំដៅចូលរួមដល់ការជំរុញការកសាងក្រុងឆ្លាតវៃ (Smart City) នៅក្នុងតំបន់អាស៊ាន។ នេះបានឆ្លុះបញ្ចាំងពីតួនាទី និងការចូលរួមរបស់កម្ពុជាក្នុងតំបន់ ក្រោមការដឹកនាំរបស់សម្តេចតេជោ ហ៊ុន សែន នាយករដ្ឋមន្ត្រីនៃកម្ពុជា។
គួរបញ្ជាក់ថា ស្តង់ដារក្រុងទេសចរណ៍ស្អាតអាស៊ាន ត្រូវបានដឹកនាំរៀបចំដោយក្រសួងទេសចរណ៍កម្ពុជា និងគណៈកម្មាធិការជាតិវាយតម្លៃក្រុងស្អាត តាំងពីឆ្នាំ២០១១ ដោយមានការគាំទ្រពីរដ្ឋមន្ត្រីទេសចរណ៍អាស៊ាន ហើយស្តង់ដារនេះត្រូវបានអនុម័ត និងដាក់ឱ្យអនុវត្តន៍ជាផ្លូវការ កាលពីវេទិកាទេសចរណ៍អាស៊ាន ឆ្នាំ២០១៥។
ក្រុងទាំង២១ ដែលទទួលបានជ័យលាភីទីក្រុងទេសចរណ៍ស្អាតអាស៊ានលើកទី៣ (២០២២-២០២៤) រួមមាន៖
– ប្រទេសព្រុយណេ មានក្រុងទូតុង (Tutong)។
– ប្រទេសកម្ពុជា ក្រុងបាត់ដំបង (Battambang) ក្រុងព្រះសីហនុ (Preah Sihanouvill) និង ក្រុងសៀមរាប (Siem Reap)។
– ប្រទេសឡាវ មានក្រុងហ្លួងព្រះបាង (Luang Prabang) ក្រុងប៉ាកសេ (Pakse) និងក្រុងវៀងជ័យ (Viengxay)។
– ប្រទេសម៉ាឡេស៉ី មានក្រុងចច (George Town) កោះលង្កាវី (Langkawi) និងក្រុងម័រ (Muar)។
– ប្រទេសមីយ៉ាន់ម៉ា មានក្រុងមណ្ឌាល័យ (Mandalay) ក្រុងណៃពិដោរ (Nay Pyitaw) និងក្រុងមីយិក (Myeik)។
– ប្រទេសថៃ មានក្រុងខនកេន (Khon Kaen) ក្រុងប៉ាតាយ៉ា (Pataya) និងកោះម៉ាក (Koh Mak)។
– ប្រទេសវៀតណាម មានក្រុងហាឡុង (Ha Long) ក្រុងដាឡាត់ (Da Lat) និងក្រុងវ័ងតាវ (Vung Tau)។
អត្ថបទ៖ លោក សេង ផល្លី
