មន្ដ្រីជាន់ខ្ពស់ក្រសួងសេដ្ឋកិច្ច និងហិរញ្ញវត្ថុ បានចុះសង្កេត និងពិនិត្យវាយតម្លៃការផ្តល់ប័ណ្ណសមធម៌ និងការអនុវត្តកម្មវិធីឧបត្ថម្ភសាច់ប្រាក់ជូនគ្រួសារក្រីក្រ និងងាយរងគ្រោះ ក្នុងអំឡុងពេលប្រយុទ្ធនឹងជំងឺកូវីដ-១៩។ ករណីនេះ ធ្វើឡើង នៅឃុំរុនតាឯក ស្រុកបន្ទាយស្រី កាលពីរសៀលថ្ងៃទី២៥ ខែមករានេះ ដោយមានការចូលរួមពីឯកឧត្តម ថេង បញ្ញាថុន ប្រតិភូរាជរដ្ឋាភិបាលទទួលបន្ទុកជាអគ្គនាយកផែនការនៃក្រសួងផែនការ និងលោក ឃឹម ហ្វីណង់ អភិបាលស្រុកបន្ទាយស្រី ខេត្តសៀមរាបផងដែរ ។
ឯកឧត្តម ចន ណារិទ្ធ អនុរដ្ឋលេខាធិការក្រសួងសេដ្ឋកិច្ច និងហិរញ្ញវត្ថុ និងជាអគ្គ-លេខាធិការក្រុមប្រឹក្សាជាតិគាំពារសង្គម មានប្រសាសន៍ថា ការចុះសង្កេត និងពិនិត្យវាយតម្លៃនេះ ជាសកម្មភាពជាប្រចាំរបស់អគ្គលេខាធិការដ្ឋានក្រុមប្រឹក្សាជាតិគាំពារសង្គម និងក្រសួង-ស្ថាប័នពាក់ព័ន្ធ នៅតាមមូលដ្ឋាន ទាំងនៅទីក្រុង ទីប្រជុំជន និងទីជនបទ ដើម្បីធានាបាននូវប្រសិទ្ធភាព តម្លាភាព និងគណនេយ្យភាព ក្នុងការកំណត់គ្រួសារគោលដៅ និងការអនុវត្តកម្មវិធិជំនួយសង្គមរបស់រាជរដ្ឋាភិបាល ដែលកំពុងអនុវត្តក្រោមការដឹកនាំ និងសម្របសម្រួលរបស់ក្រុមប្រឹក្សាជាតិគាំពារសង្គម។ឯកឧត្តម បានលើកឡើងថា ប័ណ្ណសមធម៌ ឬអាចហៅថាបណ្ណក្រីក្រនេះ ត្រូវបានផ្ដល់ជូនគ្រួសារដែលមានភាពខ្វះខាតក្នុងជីវភាព និងងាយរងគ្រោះបានរយៈពេលជាង១៣ឆ្នាំមកហើយ សម្រាប់កំណត់គោលដៅនៃការផ្ដល់ការគាំពារពលរដ្ឋដែលខ្វះខាត ជាពិសេសផ្ដោតលើសេវាសុខាភិបាលដោយរដ្ឋជាអ្នកចេញថ្លៃព្យាបាល និងចំណាយពាក់ព័ន្ធផ្សេងជំនួស ក្នុងបរិបទនៃការអភិវឌ្ឍប្រព័ន្ធគាំពារសង្គម ជាពិសេស នៅក្នុងអំឡុងពេលនៃការរីករាលដាលនៃកូវីដ-១៩។ គ្រួសារក្រីក្រ និងងាយរងគ្រោះ ដែលត្រូវបានកំណត់អត្តសញ្ញាណ និងមានបណ្ណសមធម៌ បាននិងកំពុងទទួលការគាំពារ និងការផ្ដល់ប្រាក់ឧបត្ថម្ភពីរដ្ឋ ។ឯកឧត្ដមបញ្ជាក់ថា ប្រព័ន្ធកំណត់អត្តសញ្ញាណនេះ ត្រូវបានកែលម្អជាបន្តបន្ទាប់ និងដាក់ឱ្យអនុវត្តនូវយន្តការតាមការស្នើសុំផងដែរ។
ឆ្លៀតក្នុងឱកាសនោះ ឯកឧត្តម ក៏បានដឹកនាំក្រុមការងារចុះសួរសុខទុក្ខកុមារា គង់ សីហា ដែលត្រូវបានមហាជនចាប់អារម្មណ៍ខ្លាំង បន្ទាប់ពីសម្តេចអគ្គមហាសេនាបតីតេជោ ហ៊ុន សែន នាយករដ្ឋមន្រ្តីនៃព្រះរាជាណាចក្រកម្ពុជា បានបង្ហោះលើបណ្តាញសង្គម កាលពីពេលកន្លងទៅនេះ។ឯកឧត្ដមបន្ថែមថា ដោយមានការយកចិត្តទុកដាក់ពីអាជ្ញាធរមូលដ្ឋាន និងសប្បុរសជននានា ស្ថានភាពគ្រួសារកុមារ គង់ សីហា មានភាពល្អប្រសើរច្រើនជាងមុន ហើយបច្ចុប្បន្នកុមាររូបនេះ កំពុងតែទទួលបានការរៀនសូត្រយ៉ាងពេញលេញ នៅក្នុងសាលាបឋមសិក្សាជ័យ នៃឃុំរុនតាឯក ស្រុកបន្ទាយស្រី ខេត្តសៀមរាប ។ បន្ថែមពីនេះ គ្រួសារ កុមារ គង់ សីហា ក៏ជាគ្រួសារក្រីក្រមួយក្នុងចំណោមគ្រួសារក្រីក្រដទៃទៀត ដែលមានបណ្ណសមធម៌ និងកំពុងទទួលបានប្រាក់ឧបត្ថម្ភជាទៀងទាត់ពីរាជរដ្ឋាភិបាលកម្ពុជា ក្នុងអំឡុងពេលប្រយុទ្ធនឹងជំងឺកូវីដ-១៩ និងការទទួលបានអត្ថប្រយោជន៍ជាច្រើនផ្សេងទៀត ពីបណ្ណសមធម៌នេះ។ ជាមួយគ្នានោះ ក្រុមការងារក៍បានទៅពិនិត្យមើលជីវភាព និងការរស់នៅរបស់ប្រជាពលរដ្ឋដែលបានផ្លាស់ទីលំនៅពីតំបន់មាត់ស្ទឹងក្រុងសៀមរាប ទៅរស់នៅដីដែលរដ្ឋផ្ដល់ឱ្យនៅភូមិរុនតាឯកផងដែរ៕
អត្ថបទ និង រូបភាព៖ លោក ឈិត សាវី
