លោក ជា វ៉េង ជាម្ចាស់អាជីវកម្មទឹកស្អាតស្រុកសូទ្រនិគម មានប្រសាសន៍ថា ថ្វីត្បិតតែទឹកស្អាត ដែលផលិតចេញពីស្ថានីយទឹកស្អាតរបស់លោកធំក្លិនបន្តិចក៏ពិតមែន ប៉ុន្ដែក្លិននៅក្នុងទឹកនោះ មិនមានផលប៉ះពាល់ដល់សុខភាពអ្នកប្រើប្រាស់ឡើយ ព្រោះក្លិននោះ គឺក្លិនជាតិក្ល័រកំចាត់មេរោគ សម្រាប់ធ្វើឱ្យទឹកមានគុណភាពល្អ និងជួយសម្រួលដល់សុខភាពអ្នកប្រើប្រាស់ផងដែរ ពិសេសទឹកស្អាតនេះ ក្រៅពីការប្រើប្រាស់ជាប្រចាំថ្ងៃ មនុស្សក៏អាចទទួលទានបានដែរ។
លោកបន្ដថា អាជីវកម្មរបស់លោកបានអនុវត្តតាមបច្ចេកទេសត្រឹមត្រូវ ពីក្រសួងឧស្សាហកម្ម វិទ្យាសាស្ដ្រ បច្ចេកវិទ្យា និងនវានុវត្ដន៍ និងបានធ្វើការពិសោធន៍ជាប្រចាំ ដើម្បីធ្វើឱ្យទឹកមានគុណភាពល្អ ខណៈដែលស្ថានីយ៍ទឹកស្អាតនេះ មានរយៈពេលជាង៥ឆ្នាំហើយ ដោយចាប់តាំងពីឆ្នាំ២០១៤មក ប៉ុន្តែកន្លងមកមានទឹកដែលកករនោះ គឺដោយសារគ្រឿងចក្រកាយដីពង្រីកផ្លូវ និង ប្រជាពលរដ្ឋធ្វើកសិកម្មប៉ះពាល់ដល់ទុយោទឹក ធ្វើឱ្យដីចូលក្នុងទីយោខ្លះៗ ឃណៈបច្ចុប្បន្ននេះ យើងបានដោះស្រាយរួចរាល់ហើយ។
លោក ម៉ក់ ប្រុស អភិបាលស្រុកសូទ្រនិគម មានប្រសាសន៍ថា លោក ជា វ៉េង ជាម្ចាស់ក្រុមហ៊ុនផ្គត់ផ្គង់ទឹកស្អាតសូទ្រនិគម និងជាប្រធានសមាគមទឹកស្អាតទូទាំងប្រទេស ហើយក្រុមហ៊ុនទឹកស្អាតនោះ បានអនុវត្ត និង ពិនិត្យយ៉ាងត្រឹមត្រូវតាមបច្ចេកទេសនិងទទួលស្គាល់ពីអាជ្ញាធរ ហេតុនេះក្នុងនាមអាជ្ញាធស្រុក លោកបានគិតគូរដល់សុខភាពប្រជាពលរដ្ឋ ដោយមិនឱ្យមានបញ្ហាមិនប្រក្រតីពីទឹកស្អាតកើតឡើងនោះទេ។
ប្រជាពលរដ្ឋដែលបានប្រើប្រាស់ទឹកស្អាត នៅឃុំដានរុន និងឃុំដំដែក ស្រុកសូទ្រនិគម ខេត្ដសៀមរាប បានលើកឡើងស្រដៀងគ្នាថា ពួកគាត់បានប្រើប្រាស់អាជីវកម្មផ្គត់ផ្គង់ទឹកស្អាតសូទ្រនិគមនេះ ជាច្រើនឆ្នាំមកហើយ មិនដែលមានផលប៉ះពាល់ដល់សុខភាពនោះទេ ហើយបណ្ដាញទឹកស្អាតនៅស្រុកសូទ្រនិគមននេះ អាចប្រើបានទាំងមនុស្សសត្វ និងដំណាំ ហើយអាចជួយសម្រួលដល់ជីវភាពគ្រួសារ ខុសពីការទិញទឹកពីឈ្មួញដឹកលក់តាមផ្លូវ និងប្រើទឹកអណ្ដូង៕
អត្ថបទ និង រូបភាព ៖ លោក ឈិត សាវី
កែសម្រួលអត្ថបទ ៖ លោក លីវ សាន្ត
