កាលពីថ្ងៃទី២៥ ខែមករា ឆ្នាំ២០២២នេះ នៅសាលប្រជុំសាលាខេត្តសៀមរាប មានបើកកិច្ចប្រជុំពិភាក្សាការងារមួយជាមួយក្រុមហ៊ុនអង្ករអ៊ិនធើណេសិនណល អ៊ែរផត អ៊ិនវេសម៉ិន ( ខេមបូឌា ) ឯ.ក ស្ដីពីវឌ្ឍនភាពនៃដំណើរការសាងសង់ព្រលានយន្តហោះអន្តរជាតិសៀមរាបថ្មី ក្រោមអធិបតីភាពឯកឧត្ដម តឹករ៉េត សំរេច រដ្ឋមន្ត្រីប្រតិភូអមនាយករដ្ឋមន្ត្រី រដ្ឋលេខាធិការទីស្ដីការគណៈរដ្ឋមន្ត្រី និង ជាប្រធានតម្រង់ទិស , ឯកឧត្តម ទៀ សីហា អភិបាលនៃគណៈអភិបាលខេត្តសៀមរាប និង លោក LU WEI ប្រធានក្រុមប្រឹក្សាភិបាលនៃក្រុមហ៊ុន ដោយមានការអញ្ជើញចូលរួមពីសំណាក់ឯកឧត្ដម លោកជំទាវ លោកលោកស្រី ជាអនុរដ្ឋលេខាធិការ អគ្គលេខាធិការរង អភិបាលរងខេត្ត ថ្នាក់ដឹកនាំមន្ទីរ អង្គភាពពាក់ព័ន្ធនានាក្នុងខេត្ត និង មន្ត្រីអ្នកមុខអ្នកការ ជាច្រើនរូបទៀត ។
មានប្រសាសន៍បើកកិច្ចប្រជុំនេះ ឯកឧត្ដម តឹករ៉េត សំរេច បង្ហាញថានៅឆ្នាំ២០២១កន្លងទៅ ដំណើរការសាងសង់អាកាសយានដ្ឋានអន្តរជាតិសៀមរាប-អង្គរ ដែលអនុវត្តន៍ដោយក្រុមហ៊ុនអង្ករអ៊ិនធើណេសិនណល អ៊ែរផត អ៊ិនវេសម៉ិន ( ខេមបូឌា ) មានការវិវត្តទៅមុខគួរឱ្យកត់សម្គាល់ បើទោះបីជាប្រឈមមុខជាមួយការរាតត្បាតជាសកលនៃជំងឺកូវីដ-១៩ ក្នុងឆ្នាំ២០២១ក្ដី។
ឯកឧត្ដម រដ្ឋមន្ត្រីប្រតិភូ បានវាយតម្លៃជារួមថា ក្នុងឆ្នាំ២០២២ ខាងមុខ តាមការវាយតម្លៃ លើការងារសាងសង់ជារួមរបស់អាកាសយានដ្ឋានអន្តរជាតិថ្មីនេះ នឹងសម្រេចបានរហូតដល់៧០ភាគរយ ទន្ទឹមនោះក្រុមការងារ ក៏នឹងត្រៀមក្រុមប្រតិបត្តិមួយ ដើម្បីត្រៀមផ្ទេរសកម្មភាពការងារទាំងអស់មកកាន់អាកាសយានដ្ឋានអន្តរជាតិសៀមរាប-អង្គរនេះ។ ឯកឧត្តម ក៏បានថ្លែងអំណរគុណដល់ ក្រសួង-ស្ថាប័នពាក់ព័ន្ធទាំងអស់ ជាពិសេសថ្នាក់ដឹកនាំខេត្តសៀមរាប ដែលបានចូលរួមយ៉ាងសកម្ម ដើម្បីសម្រេចលទ្ធផលនៅពេលនេះ។
ឯកឧត្តម ទៀ សីហា អភិបាលខេត្តសៀមរាប មានប្រសាសន៍ថា ការសាងសង់អាកាសយានដ្ឋាននេះ គឺជាការរួមចំណែកសម្រាប់អនាគតថ្មីនៃព្រះរាជាណាចក្រកម្ពុជា ដែលមានសម្តេចតេជោ ហ៊ុន សែន ជាប្រមុខដឹកនាំដ៏ឈ្លាសវៃនិងជាសមិទ្ធផលនៃកិច្ចសហប្រតិបត្តិការដ៏សំខាន់ រវាងកម្ពុជានិងចិន ហើយក៏ជាសក្ខីភាពមួយដែរ បញ្ជាក់អំពីការខិតខំប្រឹងប្រែងយ៉ាងសកម្មនៃប្រទេសទាំងពីរ ជំរុញកិច្ចដំណើរការគម្រោង ខ្សែក្រវ៉ាត់ំមួយ ផ្លូវមួយ ជាមួយនឹងយុទ្ធសាស្រ្តចតុកោណរបស់រាជរដ្ឋាភិបាលកម្ពុជា ជាពិសេសេការសាងសង់អាកាសយានដ្ឋានអន្តរជាតិសៀមរាប-អង្គរ នេះ ត្រូវបានចាត់ទុកជានិមិត្តរូបនៃចំណងមិត្តភាពកម្ពុជានិងចិន ។
ឯកឧត្តម ទៀ សីហា មានប្រសាសន៍បន្ថែមថា ប្រទេសកម្ពុជាបានដាក់ឲ្យដំណើរការជាប្រក្រតីឡើងវិញ បន្ទាប់ពីសម្ដេចតេជោសម្រេចឲ្យបើកយុទ្ធនាការចាក់វ៉ាក់សាំងក្នុងក្របខណ្ឌទូទាំងប្រទេសដល់មនុស្សដែលមានអាយុចាប់ពី៥ឆ្នាំឡើង បានធ្វើឲ្យស្ថានភាពជំងឺកូវីដ -១៩ មានធូរស្រាលជាងមុន ព្រមទាំងមានជើងហោះហើរពីសាំងហ្គាពួរអ៊ែរឡាញ បានចុះចត ខេត្តសៀមរាបយើង បានដំណើរការឲ្យវិស័យទេសចរណ៍អន្តរជាតិឡើងវិញ ជាពិសេសក្នុងវេទិកាទេសចរណ៍អាស៊ានលើកទី៤០ ឆ្នាំ២០២២ ដែលរៀបចំនៅខេត្តព្រះសីហនុ កាលពីពេលថ្មីៗនេះ ប្រទេសសមាជិកអាស៊ានបានឯកភាពលើការប្រកាសបើកដំណើរការទេសចរណ៍អាស៊ានឡើងវិញជាជំហានៗ ដូច្នេះសង្ឃឹមថា វិស័យទេសចរណ៍ក្នុងខេត្តសៀមរាប កាន់តែប្រសើរឡើង ក្នុងនោះការបើកព្រលានយន្ដហោះអន្តរជាតិថ្មី និងបង្កភាពងាយស្រួល និងប្រសើរឡើង ហេតុនេះ ក្នុងនាមអាជ្ញាធរខេត្ត សូមសម្ដែងនូវការសប្បាយរីករាយក្នុងការទទួលយកគម្រោងនេះ ដែលធ្វើឲ្យវិស័យទេសចរណ៍នេះ បង្កើតនូវការងារថ្មីនៅក្នុងតំបន់ ដែលជាការចំរួមចំណែកបង្កើនជីវភាពរស់នៅរបស់ប្រជាពលរដ្ឋ ។
លោក LU WEI ប្រធានក្រុមប្រឹក្សាភិបាល នៃក្រុមហ៊ុនអាកាសយានដ្ឋានសៀមរាប-អង្គរ បានឲ្យដឹងថា ក្នុងអំឡុងឆ្នាំ២០២១កន្លងមកនេះបើទោះបីជាប្រឈមជាមួយការរាតត្បាតជំងឺកូវីដ-១៩ និងការបង្កភាពមិនអំណោយផលពីមជ្ឈដ្ឋានខាងក្រៅយ៉ាងណាក៏ដោយ ប៉ុន្តែក្រោមការគាំទ្រនិងការជួយចង្អុលបង្ហាញរបស់គណៈកម្មការតម្រង់ទិសសម្រាប់ ការសាងសង់អាកាសយានដ្ឋានអន្តរជាតិសៀមរាបអង្គរ និងក្រសួងស្ថាប័នពាក់ព័ន្ធជាមួយ របស់រាជរដ្ឋាភិបាលកម្ពុជា បានធ្វើឲ្យក្រុមហ៊ុនអាចជម្នះបាននូវភាពដ៏លំបាកនេះ ពន្លឿនការជំរុញអភិវឌ្ឍន៍កិច្ចការចម្បងចំនួន៣ រួមមាន ៖ កិច្ចការងារសាងសង់ , កិច្ចត្រៀមសម្រាប់ដំណើរការប្រតិបត្តិការ និងកិច្ចការសហប្រតិបត្តិការវិនិយោគ ។
លោក LU WEI បន្តថា សម្រាប់ឆ្នាំ២០២២ គឺជាឆ្នាំសាងសង់យ៉ាងមមាញឹក និងឆ្នាំចាប់ផ្តើមការត្រៀមដាក់ឲ្យដំណើរការប្រតិបត្តិរបស់គម្រោង ក្រោមការយកចិត្តទុកដាក់ និងគាំទ្រពីសំណាក់រដ្ឋាភិបាលចិននិងរាជរដ្ឋាភិបាលកម្ពុជាក្រោមការសម្របសម្រួលនិងការណែនាំពីក្រសួងស្ថាប័នពាក់ព័ន្ធ ក្រុមហ៊ុននឹងជម្នះរាល់ឧបសគ្គនិងការលំបាក ដើម្បីគោលដៅសាងសង់ព្រលានយន្ដហោះអន្តរជាតិសៀមរាប-អង្គរ ដាក់ឲ្យដំណើរការអាកាសយានដ្ឋានក្នុងឆ្នាំ២០២៣ខាងមុខនេះ ។
សូមបញ្ជាក់ថា ទីតាំងអាកាសយានដ្ឋានអន្តរជាតិសៀមរាប-អង្គរនេះ ស្ថិតនៅក្នុងឃុំតាយ៉ែក ស្រុកសូទ្រនិគម មានចម្ងាយប្រមាណជា៥១គីឡូមែត្រពីក្រុងសៀមរាប និងប្រហែលជា៤០គីឡូម៉ែត្រពីប្រាសាទអង្គវត្ត ដែលធានាបានថា ការហោះហើរនិងចុះចត មិនមានផលអវិជ្ជមាននៃប្រតិបត្តិការរបស់អាកាសយានដ្ឋានចំពោះប្រាសាទអង្គវត្ត និងសំណង់ស្ថាបត្យកម្មជុំវិញនោះឡើយ។
អាកាសយានដ្ឋានថ្មីនេះ ស្ថិតក្នុងលំដាប់ 4E មានផ្លូវរត់ប្រវែង៣.៦០០ម៉ែត្រ និង ទទឹងប្រវែង ៤៥ម៉ែត្រ មាន៣៨ចំណតយន្តហោះ និងមានក្រឡាផ្ទៃស្ថានីយ៍អ្នកដំណើរជាង៨ម៉ឺនម៉ែត្រក្រឡា ដែលអាចទទួលអ្នកដំណើរជាប្រចាំឆ្នាំប្រមាណជា៧លាននាក់ ស្ថិតក្រោកកិច្ចព្រមព្រៀង BOT រយៈពេល៥៥ឆ្នាំ ដែលក្រោយពេលប្រតិបត្តិការត្រូវបានបញ្ចប់ គម្រោងនេះនឹងត្រូវប្រគល់ជូនរាជរដ្ឋាភិបាលកម្ពុជា ៕
អត្ថបទ៖ លោក លីវ សាន្ត
រូបភាព៖ សេង ផល្លី
