នៅព្រឹកថ្ងៃទី២៨ ខែមករា ឆ្នាំ២០២២ នៅសាលាខេត្តសៀមរាប បានរៀបចំ កិច្ចប្រជុំស្តីពីកម្មវិធីជាតិកែទម្រង់រដ្ឋបាលសាធារណៈ២០២២-២០៣៥ ដើម្បីកសាងពង្រឹងនីតិរដ្ឋនៅកម្ពុជា កសាងអភិវឌ្ឍសមត្ថភាពស្ថាប័នរដ្ឋ និងធនធានមនុស្សក្នុងវិស័យសាធារណៈ ធ្វើជាបង្អែករឹងមាំដល់ផ្នែកឯកជន និងបង្កលក្ខណៈធានាដល់ប្រក្រតីភាពនៃជីវភាពរស់នៅរបស់ប្រជាជន រួមចំណែកយ៉ាងសំខាន់ដល់ការពង្រឹងបុព្វហេតុសុខសន្តិភាព វឌ្ឍនភាព សុខុមាលភាព និងវិបុលភាពរបស់សង្គមជាតិ។
លើកឡើងនាពេលនោះ លោក នាក់ ណេរ៉ុន អភិបាលរងខេត្តសៀមរាប មានប្រសាសន៍ថា កិច្ចការទាំងនេះ គឺត្រូវបានប្រកាន់ខ្ជាប់និងអនុវត្តផ្តើមចេញពីវិចារណវិទ្យា ភាពប្រាកដនិយម និងតថភាពសង្គម សេដ្ឋកិច្ច និង នយោបាយកម្ពុជា ឈរលើមូលដ្ឋាននៃសុខសន្តិភាព ដែលសម្រេចបានតាមរយៈគោលនយោបាយ ឈ្នះ ឈ្នះ របស់រាជរដ្ឋាភិបាលក្នុងនីតិកាលទី២នៃរដ្ឋសភា បានដាក់ចេញនូវយុទ្ធសាស្ត្រត្រីកោណហើយ អ្វីដែលនាំឱ្យមាននូវយុទ្ធសាស្ត្រចតុកោណដំណាក់កាលទី១ ទី២ ទី៣ និងទី៤ ក្នុងនីតិកាលបន្តបន្ទាប់នៃរដ្ឋសភានោះ គឺអភិបាលកិច្ចល្អ តែតែងត្រូវបានចាត់ទុកជាស្នូលដ៏សំខាន់នៃការងារកែទម្រង់ស៊ីជម្រៅរបស់រាជរដ្ឋាភិបាល។ ទន្ទឹមនឹងនេះ ខេត្តសៀមរាបក៏មានបញ្ហាប្រឈមមួយចំនួនផងដែរ ដែលទាមទារឲ្យយើងត្រូវតែមានសមត្ថភាពត្រៀមទុកជាមុននិងអាចឆ្លើយតបសមស្របណាមួយ ជាពិសេសការបន្តធានាឱ្យបាននូវស្ថិរភាពនិងសុខសន្តិភាព ការពង្រឹងអភិបាលកិច្ចក្នុងវិស័យសាធារណៈ ការលើកកម្ពស់គុណភាពធនធានមនុស្ស ព្រមទាំងការដោះស្រាយបញ្ហាប្រឈមដែលបណ្តាលពីការរីករាលដាលជាសាកលនៃជំងឺកូវីដ-១៩ ការបម្រែបម្រួលអាកាសធាតុ និងបញ្ហាផ្សេងៗ។
លោកអភិបាលរងខេត្ត បញ្ជាក់ថា ក្នុងន័យនេះ ការបង្កើនល្បឿនកែទម្រង់អភិបាលកិច្ច គឺជាលក្ខខណ្ឌចាំបាច់ ដែលត្រូវអនុវត្តន៍ តាមរយៈការកែទម្រង់របស់រាជរដ្ឋាភិបាល ជាពិសេសការកែទម្រង់រដ្ឋបាលសាធារណៈ ការកែទម្រង់ការគ្រប់គ្រងហិរញ្ញវត្ថុសាធារណៈ ការកែទម្រង់វិមជ្ឈការនិងវិសហមជ្ឈការ ការកែទម្រង់ច្បាប់និងប្រព័ន្ធយុត្តិធម៌ និងការប្រយុទ្ធប្រឆាំងអំពើពុករលួយ។
សូមជម្រាបផងដែរថា កិច្ចប្រជុំស្តីពីកម្មវិធីជាតិកែទម្រង់រដ្ឋបាលសាធារណៈ២០២២-២០៣៥នាពេលនេះ គឺដើម្បីប្រមូលធាតុផ្សំ ក៏ដូចជាបញ្ហាប្រឈម នៃបណ្ដាមន្ទីរ អង្គភាពពាក់ព័ន្ធ ស្ថាប័ននានា ថ្នាក់ខេត្ត ថ្នាក់ស្រុក សម្រាប់លើកជាសំនួរចម្លើយ នឹងសំណូមពរ ព្រមទាំងធ្វើការឆ្លើយតបទៅតាមសភាពការជាក់ស្តែងនៃអង្គប្រជុំ ហើយការលើកឡើងទាំងនោះ នឹងត្រូវវាយតម្លៃដាក់ជូនទៅថ្នាក់ជាតិសម្រេច៕
អត្ថបទ និង រូបភាព ៖ លោក ស៊ាន សុផាត
កែសម្រួលអត្ថបទ ៖ លោក សេង ផល្លី