ការប្រកួតកីឡាវាយសីដណ្តើមពានរង្វាន់៧មករា លើកទី២១ ក្នុងឆ្នាំ២០២២ ខេត្តសៀមរាប បានទទួលធ្វើជាម្ចាស់ជាលើកដំបូងរបស់ខ្លួន ដែលមានកីឡាករ កីឡាការិនីមកពីទូទាំងប្រទេសចំនួន១៨ក្លឹប ស្មើនឹង ១៥៤រូប ព្រមទាំងមានការចូលរួមពីកីឡាកិត្តិយស និងក្រុមប្រតិភូមកពីសហព័ន្ឋកីឡាវាយសីកម្ពុជាផងដែរ សរុបជាង២០០រូប។
ការប្រកួតដែលមានរយៈពេល ២ថ្ងៃ គឺចាប់ពីថ្ងៃទី២៨ ដល់ថ្ងៃទី២៩ ខែមករា ឆ្នាំ២០២២នេះ នឹងធ្វើការប្រកួតចំនួន ៧វិញ្ញាសារ និងមាន៩១ប្រកួត បែងចែកទៅតាមកម្រិតអាយុ។ លោក ជាម សុភា អគ្គលេខាធិការសហព័ន្ឋកីឡាវាយសីកម្ពុជា បានពិនិត្យឃើញថា ការរៀបចំព្រឹត្តិការណ៍នាពេលនេះ មានអ្នកចូលរួមប្រកួតច្រើនជាងបណ្តាឆ្នាំមុនៗ ជាពិសេសខេត្តសៀមរាបមានកីឡាករជាប់ក្នុងក្រុមជំរើសជាតិចំនួន៧រូប សម្រាប់ត្រៀមទៅចូលរួមការប្រកួតជាលក្ខណៈអន្តរជាតិនៅប្រទេសវៀតណាម នាខែមេសាខាងមុខ ខណៈដែលកីឡាជំរើសជាតិទូទាំងប្រទេសមានចំនួន១៦រូប។
លោក អគ្គលេខាធិការ បញ្ជាក់ថា ទោះបីនេះជាការប្រកួតលក្ខណៈមិត្តភាព ប៉ុន្តែវាជាការស្ទាបស្ទង់សមត្ថភាពរបស់កីឡាករមកពីបណ្ដារាជធានីខេត្តនានា សម្រាប់ឈានទៅប្រកួតសម្រាប់ជ្រើសរើសកីឡាជំរើសជាតិ។
តាមការលើកឡើងរបស់ លោក សោម សមសក្តិ ប្រធានសម្ព័ន្ឋកីឡាវាយសីខេត្តសៀមរាប បង្ហាញថា ដោយមានការយកចិត្តទុកដាក់ខ្ពស់របស់ឯកឧត្តម ទៀ សីហា អភិបាលនៃគណៈអភិបាលខេត្តសៀមរាប លើវិស័យកីឡាក្នុងខេត្ត ក្លឹបសម្ព័ន្ឋកីឡាវាយសីខេត្តសៀមរាប ស្ថិតនៅក្នុងសង្កាត់ស្លក្រាម ក្រុងសៀមរាប មានការរៀបចំប្រកដោយផាសុខភាព មានលក្ខណៈធំទូលាយ ស្របតាមស្តង់ដារបច្ចេកទេសអន្តរជាតិ។
លោកប្រធានសម្ព័ន្ឋខេត្ត បញ្ជាក់ថា៖ ពានរង្វាន់៧មករាលើកទី២១ ក្នុងក្របខណ្ឌទូទាំងប្រទេសនេះ បានឆ្លុះបញ្ចាំងពីការអភិវឌ្ឍលើគ្រប់វិស័យ ក្រោយថ្ងៃរំដោះ៧មករា ឆ្នាំ១៩៧៩ ព្រមទាំងនាំមកនូវសន្តិភាពជូនប្រជាពលរដ្ឋ ទទួលបានការអប់រំ មានសមភាពយេនឌ័រ សុខភាពអនាម័យសាធារណៈ បង្កើតការងារជូនប្រជាពលរដ្ឋនៅទីក្រុង និងតាមសហគមន៍។ល។
អត្ថបទ និង រូបភាព ៖ លោក យូវង្ស
កែសម្រួលអត្ថបទ ៖ លោក សេង ផល្លី
