សហព័ន្ធកីឡាវាយសីកម្ពុជា សម្រេចបានការបណ្តុះបណ្តាលអាជ្ញាកណ្តាល និងចៅក្រមជំនាញលើទីលានប្រកួត ក្រោមការអនុវត្តថវិកាគាំទ្ររបស់ក្រសួងអប់រំ យុវជន និងកីឡា បន្ទាប់ពីត្រូវបានអាក់ខានរយ:ពេល២ឆ្នាំជាប់ៗគ្នា ដោយសារវិបត្តិកូវិដ-១៩ !
ឆ្នាំ២០២៣ គឺជាឆ្នាំដែលព្រះរាជាណាចក្រកម្ពុជា មានកិត្តិយសធ្វើជាម្ចាស់ផ្ទះ ព្រឹត្តិការណ៍ប្រកួតកីឡាអាស៊ីអាគ្នេយ៍លើកទី២៣ ដែលកម្ពុជាធ្វើជាម្ចាស់ផ្ទះ។ ដើម្បីឆ្លើយតបទៅនឹងកិត្តិយសដ៏មហាឧត្តុងឧត្តមនេះ សហព័ន្ធកីឡាវាយសីកម្ពុជា បានត្រៀមលក្ខណ:សព្វបែបយ៉ាង ទាំងគ្រូបង្វឹក ទាំងកីឡាករ កីឡាការិនី ទាំងអាជ្ញាកណ្តាល និងចៅក្រម ឲ្យមានសមត្ថភាពក្នុងកម្រឹតអន្តរជាតិ។
ឯកឧត្តម លី កុសល ប្រធានសហព័ន្ធកីឡាវាយសីកម្ពុជា មានប្រសាសន៍យ៉ាងដូច្នេះ កាលពីរសៀលថ្ងៃទី២៩ ខែមករា ឆ្នាំ២០២២ នៅក្លឹបកីឡាវាយសីខេត្តសៀមរាប ក្នុងពិធីបិទវគ្គបណ្តុះបណ្តាល និងចែកវិញ្ញាបណ្ណបត្របញ្ជាក់ការសិក្សាដល់សិក្ខាកាមអាជ្ញាកណ្តាល-ចៅក្រមកម្រឹតថ្នាក់ជាតិឆ្នាំ២០២១ បន្ទាប់ពីវគ្គបណ្តុះបណ្តាលនេះ បានដំណើរការអស់រយ:ពេល២ថ្ងៃកន្លងមក។ សិក្ខាកាម មានចំនួន៣០នាក់ ក្នុងនេះស្រ្តី៣នាក់ ជាមន្រ្តីរបស់សហព័ន្ធកីឡាវាយសីកម្ពុជាចំនួន៣នាក់ មន្រ្តីសម្ព័ន្ធកីឡាវាយសីរបស់បណ្តាខេត្តចំនួន៨ ស្មើនឹង១៧នាក់ និងមន្រ្តីមកពីបណ្តាក្លឹបកីឡាវាយសីចំនួន៤ផ្សេងទៀត ស្មើនឹង១០នាក់។
ឯកឧត្តមបញ្ជាក់ថា៖ ជារៀងរាល់ឆ្នាំ សហព័ន្ធកីឡាវាយសីកម្ពុជា បានខិតខំទំនាក់ទំនងរកប្រភពធនធានពីក្រៅប្រទេស និងស្វែងការគាំទ្រពីសហព័ន្ធកីឡាវាយសីអាស៊ី ដើម្បីពង្រឹងថ្នាលបំពាក់បំប៉នដល់ក្រុមកីឡាករ ប៉ុន្តែ២ឆ្នាំកន្លងមកនេះ ការបណ្តុះបណ្តាលត្រូវបានអាក់ខានដោយសារវិបត្តិកូវីដ-១៩ ។ អ្វីជាការកត់សំគាល់ ថ្មីៗនេះ សហព័ន្ធកីឡាវាយសីកម្ពុជា បានតភ្ជាប់ប្រភពធនធានជំនួយមួយផ្នែកធំ ពីក្រសួងអបរំ យុវជន និងកីឡា ដើម្បីជួយឧបត្ថម្ភលើការងារហ្វឹកហ្វឺន រួមទាំងមានការជួយឧបត្ថមពីសប្បុរសជន ក្នុង និងក្រៅប្រទេសផងដែរ។
វគ្គបណ្តុះបណ្តាលនេះ មានគោលបំណងសំដៅពង្រីកសមត្ថភាពអាជ្ញាកណ្តាល និងចៅក្រមវាយសីកម្ពុជា ឲ្យកាន់តែរឹងមាំ មានបទពិសោធន៍ ប្រកបដោយគុណភាព ប្រសិទ្ធភាព និងក្រមសីលធម៌វិជ្ជាជីវ: ក្នុងការអភិវឌ្ឍសមត្តភាពជាអាជ្ញាកណ្តាល-ចៅក្រម កម្រឹតលំដាប់តំបន់ និងកម្រឹតអន្តរជាតិ នាថ្ងៃអនាគត៕
អត្ថបទ និងរូបភាព: លោកងិន គីមឡេង និងលោកយូ វង្ស កែសម្រួលដោយ លីវ សុខុន!!!
