អាជ្ញាធរជាតិអប្សរា បាននឹងកំពុងរៀបចំវង់ទស្សនាថ្មី នៅលើប្រាសាទភ្នំក្រោម ដើម្បីសម្រួលការដើរទស្សនាទិដ្ឋភាពថ្ងៃលិច និងថ្ងៃរះនៅលើ ផ្ទៃបឹងទន្លេសាបដ៏ស្រស់ស្អាតពីលើឮកំពូលភ្នំ។
លោក សេង សុធារ៉ា អនុប្រធានអភិវឌ្ឍន៍ទេសចរណ៍អង្គរ នៃអាជ្ញាធរជាតិអប្សរាបានឱ្យដឹងនៅថ្ងៃទី០១ ខែកុម្ភ: ឆ្នាំ២០២២នេះថា ដើម្បីបញ្ជៀសការកកស្ទះ ការទស្សនាថ្ងៃលិច នៅលើប្រាសាទភ្នំបាខែង នាពេលបច្ចុប្បន្ននេះ អាជ្ញាធរជាតិអប្សរា បានកំពុងរៀបចំវង់ទស្សនាថ្មីមួយទៀតនៅលើប្រាសាទភ្នំក្រោម ដើម្បីសម្រួលការដើរទស្សនារបស់ភ្ញៀវទេសចរ ខណ:ដែលការទស្សនានៅលលើប្រាសាទភ្នំបាខែងមានការកកស្ទះភ្ញៀវទេសចរ ។ លោកបន្តទៀតថា នៅលើប្រាសាទភ្នំក្រោម មានទីកន្លែងកម្សាន្ត និងទេសភាពដ៏ស្រស់ស្អាត ដែលអាចឱ្យភ្ញៀវទេសចរ មកទស្សនាទិដ្ឋភាពទាំងមូលរបស់ក្រុងសៀមរាប ការទស្សនាថ្ងៃរៀបលិច និងថ្ងៃរះ និងផ្ទៃបឹងទន្លេសាបដ៏ស្រស់ស្អាត។ លោកបានបន្ដទៀតថា រមណីយដ្ឋានអង្គរ មានប្រាង្គប្រាសាទបុរាណ និងទេសភាពធម្មជាតិដ៏ស្រស់ស្អាតជាច្រើនកន្លែង ប៉ុន្តែនៅពេលភ្ញៀវទេសចរ មកទស្សនាថ្ងៃលិចពួកគាត់ ពិតជានឹកឃើញដល់ប្រាសាទភ្នំបាខែង ដែលជាកន្លែងគយគន់ថ្ងៃលិចដ៏ល្បីល្បាញផងដែរ។
សូមជម្រាបផងដែរថា ភ្នំក្រោមជាកូនភ្នំមួយមានកំពស់ប្រមាណ១៤០ម៉ែត្រ មានចំងាយប្រហែល១២គីឡូម៉ែត្រ ពីក្រុងសៀមរាប នៅជាប់បឹងទន្លេសាប។ នៅលើភ្នំនេះ មានប្រាសាទមួយឈ្មោះថា ប្រាសាទភ្នំក្រោម ត្រូវបានស្ថាបនាឡើងនៅចុងសតវត្សទី៩ និងដើមសតវត្សទី១០ ដោយព្រះបាទយសោវរ្ម័នទី១ (ចន្លោះឆ្នាំ៨៨៩-៩១៥) ឧទ្ទិសដល់អាទិទេពទាំងបីក្នុងព្រហ្មញ្ញសាសនាគឺ ព្រះឥសូរ ព្រះវិស្ណុ និងព្រះព្រហ្ម។ សូមរំលឹកថា តំបន់ទេសចរណ៍អង្គរ មានកន្លែងទស្សនាថ្ងៃរះ និងថ្ងៃលិចជាច្រើនកន្លែង រួមមានប្រាសាទអង្គរវត្ដ និងប្រាសាទភ្នំបាខែងជាដើម ដែលជាកន្លែងគយគន់ថ្ងៃលិចដ៏ល្បីល្បាញ៕
អត្ថបទ និងរូបភាព: លោកបូ សាវី កែសម្រួលដោយ លីវ សុខុន!!!
