នៅព្រឹកថ្ងៃទី២ ខែកុម្ភៈ ឆ្នាំ២០២២នេះ ក្រុមការងារ នៃអនុគណៈកម្មការក្រុមការងារបច្ចេកទេស នៃរដ្ឋបាលខេត្តសៀមរាប បានចុះពិនិត្យ និងសិក្សានៅតាមបណ្ដាមួយចំនួន ក្នុងគម្រោងហេដ្ឋារចនាសម្ព័ន្ឋផ្លូវ៣៨ខែ្ស ក្នុងក្រុងសៀមរាប បន្ទាប់ពីបានបើកកិច្ចប្រជុំ ស្ដីពីការរៀបចំកំណត់ផ្លូវឯកទិស ដាក់ស្លាកសញ្ញាចរាចរណ៍ និងសណ្តាប់ធ្នាប់ក្នុងក្រុងសៀមរាប កាលម្សិលមិញនេះ។
តាមការចុះសិក្សាបឋម ក្រុមការងារពិនិត្យឃើញបញ្ហាប្រឈមមួយចំនួន ដូចជា អាជីវករមួយចំនួនតូច បានយកចិញ្ចើមផ្លូវ ក៏ដូចជាខឿនកម្រាលថ្ម ទៅដាក់តាំងលក់ទំនិញរបស់ខ្លួន ហើយមួយចំនួនទៀត បានឈប់ និងចតយានយន្តរបស់ខ្លួន គ្មានសណ្ដាប់ធ្នាប់ ដែលបំពាននឹងបម្រាមរបស់រដ្ឋបាលខេត្ត ធ្វើការផ្សព្វផ្សាយតាំងពីពាក់កណ្ដាលខែកញ្ញា ឆ្នាំ២០២១មក។ ចំពោះការចុះសិក្សានេះ ក្រុមការងារនឹងធ្វើកំណត់ហេតុ ដើម្បីដាក់ជូនអង្គប្រជុំ ធ្វើការពិភាក្សាបន្តនាពេលក្រោយ។
គួរជម្រាបថា តាមរយៈខ្លឹមសារនៃកិច្ចប្រជុំ ស្ដីពីការរៀបចំកំណត់ផ្លូវឯកទិស ដាក់ស្លាកសញ្ញាចរាចរណ៍ និងសណ្តាប់ធ្នាប់ក្នុងក្រុងសៀមរាប ធ្វើឡើងក្នុងបំណងជជែកពិភាក្សា ពិនិត្យផ្តល់គំនិតយោបល់ដើម្បីប្រមូលធាតុចូល ដើម្បីជាគន្លឺះសម្រាប់កិច្ចប្រជុំលើកក្រោយ បន្ទាប់ពីប្រមូលបាននូវគំនិតយោបល់ឯកភាពគ្នា ដើម្បីរៀបចំធ្វើរបាយការណ៍ដាក់ជូនទៅអភិបាលនៃគណៈអភិបាលខេត្តពិនិត្យនិងសម្រេច ពាក់ព័ន្ឋទៅនឹងហេដ្ឋារចនាសម្ព័ន្ឋផ្លូវទាំង៣៨ខែ្សដែលទើបតែសាងសង់រួច នៅក្នុងក្រុងសៀមរាប។ អង្គប្រជុំ ក៏បានសង្កត់ធ្ងន់ ទៅលើការហាមមិនឱ្យមានការដាក់តាំងលក់ទំនិញ និងចំណីអាហារនៅតាមចិញ្ចើមផ្លូវ ដែលបង្កឱ្យបាត់សណ្តាប់ធ្នាប់របៀបរៀបរយ និងសោភណ្ឌភាពក្នុងក្រុង។ លោក ពិន ប្រាកដ អភិបាលរងខេត្ត តំណាងដ៏ខ្ពស់ខ្ពស់ឯកឧត្តម ទៀ សីហា អភិបាលនៃគណៈអភិបាលខេត្ត បានបញ្ចាក់ថា ប្រសិនបើ នៅតែមានករណី បំពានទៅនឹងសេចក្តីជូនដំណឺងស្ដីពី ការចាត់វិធានការចំពោះយានជំនិះគ្រប់ប្រភេទ ដែលឈប់ ឬចត និងការដាក់តាំងសម្ភារៈផ្សេងៗ ការលក់ដូរនៅលើទ្រូងផ្លូវ ចិញ្ចើមផ្លូវ ក្នុងក្រុងសៀមរាប ខេត្តសៀមរាប ដែលបានចេញជាធរមានកាលពីថ្ងៃទី១៧ ខែកញ្ញា ឆ្នាំ២០២១ អាជ្ញាធរមានសមត្ថកិច្ចត្រូវប្រើវិធានការរដ្ឋបាល ណែនាំបុគ្គលនោះធ្វើកិច្ចសន្យា ហើយបើនៅតែបន្តបំពានទៀត នឹងឈានទៅរឹបអូសប្រមូលសម្ភារៈរក្សាទុកមួយកន្លែង និងឱ្យបុគ្គលនោះធ្វើកិច្ចសន្យា ព្រមទាំងចេញសងថ្លៃសេវាដឹកជញ្ជូនសម្ភារៈទាំងនោះបន្ថែមទៀត។
អត្ថបទ និង រូបភាព៖ លោក យូ វង្ស
កែសម្រួល៖ សេង ផល្លី
