ក្រសួងការពារជាតិអាមេរិក បានឱ្យដឹងថា ទីក្រុងវ៉ាស៊ីនតោន នឹងបញ្ជូនកងទ័ពបន្ថែម ទៅកាន់តំបន់ អឺរ៉ុប ឆ្លើយតបទៅនឹងភាពតានតឹងនៅឯតំបន់ព្រំដែនអ៊ុយក្រែន។ នេះបើតាមការចេញផ្សាយដោយទីភ្នាក់ងារសារព័ត៌មានចិនស៊ីនហួរ នៅថ្ងៃព្រហស្បតិ៍ ទី០៣ ខែកុម្ភៈ ឆ្នាំ២០២២។
ថ្លែងនៅក្នុងសន្និសីទសារព័ត៌មានមួយនៅថ្ងៃពុធសប្ដាហ៍នេះ អ្នកនាំពាក្យក្រសួងការពារជាតិអាមេរិក លោក John Kirby បានបញ្ជាក់ថា ការដាក់ពង្រាយកងទ័ពខាងលើ ក្នុងនោះរួមមានកងទ័ពអាមេរិក ១,០០០នាក់ ដែលបច្ចុប្បន្នកំពុងឈរជើងនៅអាល្លឺម៉ង់ នឹងត្រូវបញ្ជូនទៅកាន់ប្រទេសរ៉ូម៉ានី ខណៈកងទ័ព ២,០០០នាក់ផ្សេងទៀត នឹងត្រូវដាក់ពង្រាយពីសហរដ្ឋអាមេរិក ទៅកាន់ប្រទេស អាល្លឺម៉ង់ និងប៉ូឡូញ។
ប៉ុន្តែ ព្រមពេលជាមួយគ្នា លោក John Kirby ក៏បានអះអាងដែរថា កងទ័ពទាំងនេះ នឹងមិនឈរជើង ជាអចិន្ត្រៃយ៍ឡើយ ហើយពួកគេក៏នឹងមិនទៅចូលរួមប្រយុទ្ធ នៅក្នុងសមរភូមិណាមួយ នៅអ៊ុយក្រែន នោះដែរ។
គួរបញ្ជាក់ថា សហរដ្ឋអាមេរិក បានដាក់ឱ្យកងទ័ពរបស់ខ្លួន ៨,៥០០នាក់ ស្ថិតនៅក្នុងលក្ខណៈ ប្រុងជើងការខ្ពស់រួចរាល់ហើយដើម្បីត្រៀមខ្លួន សម្រាប់ការដាក់ពង្រាយទៅកាន់តំបន់អឺរ៉ុប នៅចំពោះមុខការបារម្ភថា រុស្ស៊ីអាចនឹងលើកទ័ពសម្រុកចូលអ៊ុយក្រែន៕
