ក្រុមប្រឹក្សាសន្តិសុខអង្គការសហប្រជាជាតិ (UNSC) បានបង្ហាញក្ដីព្រួយបារម្ភយ៉ាងខ្លាំង ចំពោះ អំពើហិង្សា រួមទាំងវិធានការដាក់ប្រទេសក្នុង ភាពអាសន្នរបស់យោធា នៅក្នុងប្រទេសមីយ៉ាន់ម៉ា ជាមួយការជំរុញឱ្យភាគីពាក់ព័ន្ធទាំងអស់ត្រឡប់មករកតុចរចាដើម្បីដោះស្រាយបញ្ហា ស្របទៅ តាមឆន្ទៈ និងផលប្រយោជន៍របស់ប្រជាជន។ នេះបើតាមការចេញផ្សាយដោយទីភ្នាក់ងារសារព័ត៌មាន Reuters នៅថ្ងៃព្រហស្បតិ៍ ទី០៣ ខែកុម្ភៈ ឆ្នាំ២០២២។
នៅក្នុងសេចក្ដីថ្លែងការណ៍រួមមួយដែលព្រមព្រៀងឡើងដោយឯកច្ឆន្ទ ចេញផ្សាយនៅថ្ងៃពុធ សប្ដាហ៍ នេះ (ម៉ោងនៅញូយ៉ក) ដើម្បីរំលឹកខួបមួយឆ្នាំនៃការធ្វើ រដ្ឋប្រហារថ្ងៃទី០១ ខែកុម្ភៈ ឆ្នាំ២០២១ សមាជិក UNSC ទាំង១៥ប្រទេសបានអំពាវនាវសាជាថ្មីឱ្យ យោធាមីយ៉ាន់ម៉ាដោះលែងអ្នក ដែលត្រូវ បានចាប់ខ្លួនដោយ អយុត្តិធម៌ ក្នុងនោះរួមមានលោកស្រី អោង សាន ស៊ូជី និងប្រធានាធិបតី លោក វីន មីយ៉ីង (Win Myint)។ បន្ថែមពីលើនេះ UNSC ក៏បានអំពាវនាវឱ្យបញ្ចប់ អំពើហិង្សាផងដែរ ហើយស្នើឱ្យភាគីពាក់ព័ន្ធទាំងអស់ ពិភាក្សាគ្នាដោយសន្តិវិធី ក្នុងការដោះស្រាយបញ្ហា និងផ្សះផ្សាជាតិ ស្របទៅតាមឆន្ទៈ និងផលប្រយោជន៍ របស់ប្រជាជនមីយ៉ាន់ម៉ា។
គួរបញ្ជាក់ថា បើតាមតួលេខរបស់ការិយាល័យសិទ្ធិមនុស្សអង្គការសហប្រជាជាតិ អំពើហិង្សាដែល កើតឡើងនៅក្រោយព្រឹត្តិការណ៍ថ្ងៃទី០១ ខែកុម្ភៈ ឆ្នាំ២០២១ ដែលអន្តរជាតិចាត់ទុកថា ជាការធ្វើរដ្ឋប្រហារយោធា បានបណ្ដាលឱ្យមនុស្សច្រើនជាង ១,៥០០នាក់ហើយបានស្លាប់ រីឯ ១១,៨០០នាក់ផ្សេងទៀត ត្រូវបានចាប់ខ្លួន៕
