ដើម្បីផ្គត់ផ្គង់ដល់សិស្សសាលានៅស្រុកគោលដៅក្នុងខេត្តសៀមរាប សរុបជាថវិកាចំនួនជិត ១២ម៉ឺនដុល្លារអាមេរិក កាលពីព្រឹកថ្ងៃទី២៦ ខែមករា ឆ្នាំ២០២២នេះថា មន្ទីរអប់រំយុវជន និងកីឡាខេត្ត បានទទួលសម្ភារៈអនាម័យសម្រាប់ការពារការឆ្លងរីករាលដាលជំងឺកូវីដ-១៩ និងសម្ភារៈសិក្សា ពីអង្គការភ្លែនអន្តរជាតិ ប្រចាំខេត្តសៀមរាប សម្រាប់ផ្ដល់ជូនដល់តំបន់ដែលជាគោលដៅសម្រាប់សាលាបឋមសិក្សាដែលកំពុងអនុវត្តកម្មវិធីអាហារពេលព្រឹកចំនួន ២២១សាលា ក្នុងស្រុកគោលដៅចំនួន ០៦ក្នុងខេត្តសៀមរាប រួមមាន ៖ ស្រុកអង្គរជុំ , បន្ទាយសី , សូទ្រនិគម , ជីក្រែង ,ក្រឡាញ់ និង ស្រុកស្រីស្នំ ព្រមទាំងសាលា បឋមសិក្សាចំនួន ១៩សាលាក្នុងស្រុកអង្គរធំ និងសាលាមធ្យមសិក្សាចំនួន ៨៨សាលា ក្នុងស្រុកចំនួន ១១ក្នុងខេត្តសៀមរាប លើកលែងតែក្រុងសៀមរាប សរុបចំនួន៣២៨សាលា ក្រោមអធិបតីភាពលោក ពៅ ពិសិដ្ឋ អភិបាលរង នៃគណៈអភិបាលខេត្តសៀមរាប។
លោក ហង់ បូណា នាយកប្រតិបត្តិអង្គការភ្លែនអន្តរជាតិប្រចាំខេត្តសៀមរាប បានលើកឡើងថា អ្វីៗដែលសម្រេចបាននៅពេលនេះ គឺដោយមានកិច្ចសហការយ៉ាងល្អ ពីអាជ្ញាធរគ្រប់លំដាប់ថ្នាក់ អង្គភាពជំនាញ លោកគ្រូអ្នកគ្រូតាមសាលាគោលដៅ ដែលជាសកម្មភាពសំខាន់ៗ ក្នុងនោះមានយុទ្ធនាការប្រមូលសិស្សឲ្យចូលរៀនឡើងវិញ។
មានប្រសាសន៍ក្នុងឱកាសនោះ លោក ពៅ ពិសិដ្ឋ អភិបាលរងខេត្តសៀមរាប ទទួលបន្ទុកការងារអប់រំ បានសម្តែងនូវការអរគុណចំពោះអង្គការភ្លែនអន្តរជាតិ ប្រចាំខេត្តសៀមរាប ដែលបានជួយឧបត្ថម្ភសម្ភារៈការពារការឆ្លងជំងឺកូវីដ-១៩ និងសម្ភារៈសិក្សាជូនដល់សាលាក្នុងស្រុកគោលដៅនាពេលនេះ ខណៈកន្លង មកអង្គការភ្លែនអន្តរជាតិប្រចាំខេត្ត តែតែងជួយអប់រំ និងផ្តល់សម្ភារ:ផ្សេងៗ នៅតាមបណ្ដាសាលារៀនជាច្រើន ក៏ដូចជាសិស្សានុសិស្សជាដើម ព្រមទាំងរួមចំណែកក្នុងការប្រមូលកូនសិស្សឲ្យចូលសាលារៀនវិញ លើកកម្ពស់ការយល់ដឹងរបស់មាតាបិតា និងអាណាព្យាបាលសិស្សក្នុងការផ្តល់តម្លៃដល់ការអប់រំ ផ្តល់ឱកាស ជំរុញ និងលើកទឹកចិត្តកូនៗរបស់ពួកគេ ជាពិសេស ក្មេងស្រីឱ្យទទួលបានសេវាអប់រំប្រកបដោយគុណភាព។
លោក ពៅ ពិសិដ្ឋ បន្តថា សម្ភារ:អនាម័យសម្រាប់ ការពារការឆ្លងរីករាលដាលជំងឺកូវីដ-១៩ ដែលបានទទួលពីអង្គការភ្លែនអន្តរជាតិប្រចាំខេត្តសៀមរាបនាពេលនេះ ដើម្បីចូលរួមលើកកម្ពស់សុវត្ថិភាពរបស់សិស្សានុសិស្ស និងលោកគ្រូអ្នកគ្រូ ក្នុងការត្រឡប់ចូលសាលារៀនឡើងវិញ តាមរយៈការអនុវត្តវិធានការការពារជំងឺ កូវីដ- ១៩ ដូច្នេះក្នុងឱកាសនេះ តាមរយៈមន្ទីរអប់រំយុវជន និងកីឡាខេត្ត សូមណែនាំដល់លោកនាយក និង លោកស្រីនាយិកា គ្រប់សាលាក្នុងទូទាំងខេត្ត ត្រូវអប់រំ និង ផ្សព្វផ្សាយដល់សិស្សានុ សិស្សក្នុងសាលារបស់ខ្លួន ឲ្យបន្តការយកចិត្តទុកដាក់ខ្ពស់ លើវិធានការនានារបស់ក្រសួងសុខាភិបាលលើវិធានការការពារជំងឺកូវីដ-១៩ និង អនុវត្តនូវវិធានការរបស់រាជរដ្ឋាភិបាល គឺ ៣កុំ និង៣ការពារ ឲ្យបានខ្ជាប់ខ្ជួន ពិសេសសម្រាប់លោកគ្រូអ្នកគ្រូ និង សិស្សានុសិស្សដែលគ្រប់អាយុកំណត់ ត្រូវទៅចាក់វ៉ាក់សាំងការពារជំងឺកូវីដ-១៩ ឲ្យបានគ្រប់ៗគ្នា។
សូមបញ្ជាក់ថា សម្ភារ:អនាម័យទាំងអស់រួមមាន៖ ១. ម៉ាស់ពាក់ហើយចោលបាន សម្រាប់សិស្សសាលាបឋមសិក្សា និងសាលាមធ្យមសិក្សាចំនួន ៥.៤៦៤ ប្រអប់ ដល់សាលាចំនួន ៣២៨ , ២. ម៉ាស់ក្រណាត់សម្រាប់គ្រូមធ្យមសិក្សា ពាក់ហើយបោកប្រើឡើងវិញបានចំនួន ៤.៩២២ម៉ាស់ ដល់សាលាចំនួន ១០៧ , ៣. ម៉ាស់ក្រណាត់សម្រាប់សិស្សក្រីក្រ ចំនួន ៧.០០០ ម៉ាស់ ដល់សាលាចំនួន ២២១សាលា ក្នុងកម្មវិធីអាហារពេលព្រឹក , ៤. សាប៊ូទឹកសម្រាប់ សិស្សលាង សម្រាប់ដាក់នៅតាមបន្ទប់ទឹក និងកន្លែងលាងដៃចំនួន ៣២១កាន ដល់សាលាចំនួន ១០៧ , ៥. ដបជ័រដាក់សាប៊ូទឹកសម្រាប់លាងដៃចំនួន ១.០៧០ដប ដល់សាលាចំនួន ១០៧ , ៦. អាល់កុលសម្រាប់បាញ់លាងដៃ ចំនួន៤២៨កាន ក្នុង១កានមាន៣០លីត្រ ដល់សាលាចំនួន ១០៧សាល , ៧. ដបជ័រដាក់អាកុលសម្រាប់បាញ់លាងដៃចំនួន២.៧១០ដប ដល់សាលាចំនួន ៣២៨ , ៨. សាប៊ូដុំលាងដៃចំនួន ៩,០៦១ដុំ ដល់សាលាចំនួន ២២១ , ៩.ឧបករណ៍វាស់កម្ដៅបញ្ឈរ ដែលមានកន្លែងដាក់អាកុល និងបើភ្លើងអគ្គីសនីចំនួន៤១៣គ្រឿង ដល់សាលាចំនួន ៣០៦ , ១០. របាំងមុខជ័រពាក់ការពារសម្រាប់គ្រូបង្រៀនចំនួន៥,៥០៥របាំង ដល់សាលាចំនួន ៣២៨ , ១១. ផ្ទាំងបដាសម្រាប់កម្មវិធី បើកដំណើរការ សាលារៀនឡើងវិញចំនួន៣២៨ផ្ទាំង ដល់សាលាចំនួន ៣២៨ , ១២. ប៉ុស្តិ៍ស្ទ័រការពារ កូវីដ-១៩ « ៣កុំ ៣ការពារ » ចំនួន៧២៤ផ្ទាំង ដល់សាលាចំនួន ២២១ , ១៣. កញ្ចប់សម្ភារៈសិស្សាសម្រាប់សិស្សក្រីក្របំផុត ចំនួន២.២១០នាក់ ដល់សាលាចំនួន ២២១សាលា និង ១៤. គាំទ្រការថតចម្លងសន្លឹកកិច្ចការដល់ សិស្សដែលរៀនតាមផ្ទះ ពីចម្ងាយចំនួន៤ខែ ដល់សាលាចំនួន ១០៧ ដែលសរុបថវិកាចំនួន១១៧.៩២៥ ដុល្លារអាមេរិក៕
អត្ថបទ និង រូបភាព ៖ លោក ស៊ាន សុផាត
កែសម្រួលអត្ថបទ ៖ លោក លីវ សាន្ត
