ប្រជាពលរដ្ឋរស់នៅក្នុងឃុំពាក់ស្នែង ស្រុកអង្គរធំ ខេត្តសៀមរាប បានសម្ដែងការសប្បាយចិត្ដ និងថ្លែងអំណរគុណដល់ក្រុមការងាររាជរដ្ឋាភិបាលចុះជួយឃុំពាក់ស្នែង និងសប្បុរសជន ដែលបានផ្ដល់ថវិកាជួយជួសជុលផ្លូវមួយខ្សែ ចេញពីស្រុកអង្គរធំ ទៅឃុំពាក់ស្នែង ខេត្ដសៀមរាប ដែលមានប្រវែងជិត១០គីឡូម៉ែត្រ។
ប្រជាពលរដ្ឋរស់នៅក្នុងមូលដ្ឋានខាងលើ ពួកគាត់បានឲ្យដឹងថា កន្លងមកផ្លូវមួយខ្សែនេះ បានខូចខាតស្ទើរទាំងស្រុង ដោយសាររថយន្ដធំៗដឹកថ្ម ដឹកដីចេញពីតំបន់ភ្នំនៅស្រុកអង្គរធំ ឆ្លងកាត់តាមផ្លូនោះ បណ្ដាលឱ្យផ្លូវមានជង្ហុកធំៗ ព្រមទាំងមានដីហុយ ធ្វើឱ្យពួកគាត់មានការលំបាកធ្វើដំណើរ ជាពិសេសសិស្សានុសិស្សទៅសាលារៀន ការដឹកជញ្ជូនដំណាំកសិកម្ម និងដឹកទំនិញផ្សេងទៀតផងដែរ។ សម្រាបពេលធ្វើដំណើរឆ្លងកាត់ផ្លូវនេះម្ដងៗ ពួកគាត់ត្រូវចំណាយពេលយូរ ដូចជាបញ្ជូនអ្នកជំងឺទៅមន្ទីរពេទ្យ ស្ដ្រីឆ្លងទន្លេជាដើម ប៉ុន្ដែនៅពេលនេះ ក្រុមការងាររាជរដ្ឋាភិបាលចុះជួយឃុំពាក់ស្នែង ស្រុកអង្គរធំ របស់ក្រសួងការពារជាតិ និងសប្បុរសជន បានផ្ដល់ថវិកាជួសជុលឡើងវិញ ដែលធ្វើឱ្យពួកគាត់មានការសប្បាយចិត្ដ ព្រោះពួកគេធ្វើដំណើរបានស្រួល និងលឿនរហ័ស។
ពួកគាត់បានបន្ដថា ផ្លូវនេះមានសារៈសំខាន់ណាស់សម្រាប់ប្រជាពលរដ្ឋដែលរស់នៅតាមដងផ្លូវចេញពីក្រុងសៀមរាប ឆ្លងកាត់ទៅឃុំពាក់ស្នែង។ ពួកគាត់បានថ្លែងអំណរដល់ក្រុមការងាររាជរដ្ឋាភិបាលរបស់ក្រសួងការពារជាតិ និងសប្បុរសជនដែលបានរ៉ៃអង្គាសប្រាក់ជួសជូលផ្លូវនេះបាលល្អស្អាតឡើងវិញ សម្រាប់ប្រជាពលរដ្ឋធ្វើដំណើរ។
បើតាមលោក ឡុង រដ្ឋារក្ស អភិបាលស្រុកអង្គរធំ បានឲ្យដឹងថា ផ្លូវមួយខ្សែនេះមានប្រវែងជិត ៨,៥គីឡូម៉ែត្រ ចេញពីឃុំលាងដៃ ដល់ឃុំពាក់ស្នែង ស្រុកអង្គរធំ ដោយជួសជុលឡើងវិញជាផ្លូវកៅស៊ូ 2SR2 ដែលបានថវិកាក្រុមការងារចុះជួយមូលដ្ឋានឃុំពាក់ស្នែង និងសប្បុរសជនមួយចំនួនជួយចេញថ្លៃជួសជុលឡើងវិញ។ លោកថា ផ្លូវមួយខ្សែនេះកន្លងមក បានសាងសង់រួចរាល់ម្ដងមកហើយកាលពីឆ្នាំ២០១៤ ប៉ុន្ដែក្រោយមកបានរងការខូចខាតរិចរិលជាច្រើនឆ្នាំមកហើយ ដោយសាររថយន្ដធន់ធំដឹកធ្ងន់ឆ្លងកាត់។ ផ្លូវនោះចេញពីទីរួមស្រុកអង្គរធំ ទៅកាន់ស្រុកអង្គរជុំមានសារៈសំខាន់ណាស់ក្នុងការដឹកជញ្ជូនទំនិញកសិផលកសិកម្ម ជាពិសេសដំឡូងមី ស្រូវជាដើម ប៉ុន្ដែទើបបើកការដ្ឋានជួលជុលឡើងវិញ ទើបតែជាង ៨គីឡូម៉ែត្រនោះទេ ដោយលោកបានអំពាវដល់សប្បុរសជនជួយថវិកាបន្ថែមទៀត ដើម្បីជួសជុលចេញពីឃុំពាក់ស្នែង ដល់ស្រុកអង្គរជុំ ព្រោះផ្លូវនោះនៅមានការខូចខាត និងពិបាកធ្វើដំណើរផងដែរ៕
អត្ថបទ និង រូបភាព៖ លោក ឈិត សាវី
កែសម្រួល៖ អ៊ុន ណារាជ្យ
