លោក ពៅ ពិសិដ្ឋ អភិបាលរងខេត្តសៀមរាប មានប្រសាសន៍ថា អាជ្ញាធរខេត្តក្រោមការដឹកនាំរបស់ឯកឧត្តម ទៀ សីហា អភិបាលនៃគណៈអភិបាលខេត្ត កំពុងយកចិត្តទុកដាក់និងខិតខំដោះស្រាយជាបន្តបន្ទាប់ បញ្ហាសំរាម និងសំណល់ផ្សេងៗទៀត ដើម្បីធ្វើឱ្យទីក្រុងសៀមរាបនៅតែបន្តរក្សាបាននូវសោភ័ណបៃតងស្រស់ និងគ្មានក្លិនអាក្រក់ ដែលជាឆន្ទៈគិតគូរខ្ពស់អំពីអនាម័យ និងបរិស្ថាន ធ្វើយ៉ាងណាឱ្យសក្តិសមជាខេត្តនៃប៉ូលទេសចរណ៍ដ៍សំខាន់របស់ជាតិ ដើម្បីត្រៀមចាំទទួលលំហូរភ្ញៀវទេសចរ ខណៈក្រុងសៀមរាបបានជាប់ជ័យលាភីជាទីក្រុងទេសចរណ៍ស្អាតអាស៊ានលើកទី៣ ស្របពេលដែលរាជរដ្ឋាភិបាលបានបើកដំណើរការប្រទេសឡើងវិញនោះ ព្រមទាំងបាននឹងកំពុងយកចិត្តទុកដាក់ ស្វែងរកដៃគូនិងកិច្ចសហការពីវិស័យឯកជន ប្រមូលនាំយកសំរាមនិងកាកសំណល់រឹងរាវផ្សេងៗ យកទៅទុកដាក់នៅទីលានចាក់សំរាម ។
លោក ពៅ ពិសិដ្ឋ មានប្រសាសន៍យ៉ាងដូច្នេះ ក្នុងឱកាសជាតំណាងដ៍ខ្ពង់ខ្ពស់ឯកឧត្តម ទៀ សីហា អភិបាលនៃគណៈអភិបាលខេត្តសៀមរាប អញ្ជើញជាអធិបតីក្នុងពិធីកាត់ខ្សែបូរដាក់ឱ្យប្រើប្រាស់អគារសាកលវិទ្យាល័យ ឥន្ទ្រវិជ្ជា ស្ថិតក្នុងក្រុងសៀមរាប កាលពីពេលថ្មីៗនេះ។
លោក ពៅ ពិសិដ្ឋ មានប្រសាសន៍ទៀតថា ដើម្បីធានានូវការគ្រប់គ្រង អាជ្ញាធរខេត្តនឹងយកក្រុមហ៊ុនចំនួនបីសម្រាប់បម្រើសេវាប្រមូលនិងទុកដាក់សំរាម ដូចជា ក្រុមហ៊ុនវីហ្គ្រីន ជាក្រុមហ៊ុនមានភារកិច្ចប្រមូល ទុកដាក់សំរាមនៅក្នុងតំបន់អង្គរដែលគ្រប់គ្រងដោយអាជ្ញាធរជាតិអប្សរា , ក្រុមហ៊ុហ្គាអ៊ែរនិងក្រុមហ៊ុនអាកហ្សិនហ្គ្រីន ទទួលភារកិច្ចមួយផ្នែកខាងលិចស្ទឹង និងមួយផ្នែកខាងកើតស្ទឹង ហើយបន្ទាប់ពីរៀបចំឱ្យមានទីលានសំរាមកម្រិតស្តង់ដារ និងបែងចែកការងារដល់ក្រុមហ៊ុនប្រមូលសំរាមហើយនោះ រដ្ឋបាលខេត្តនឹងដាក់ចេញនូវបទបញ្ជាផាកពិន័យ ព្រោះវាដល់វេលាហើយដែលអាជ្ញាធរខេត្ត នឹងរៀបចំបង្កើតយន្តការរឹតបន្តឹងឬផាកពិន័យចំពោះបុគ្គលដែលយកសំរាមទៅចោលខុសធុងសំរាម ឬបោះចោលតែផ្តេសតែផ្តាលមិនមានការវេចខ្ចប់ត្រឹមត្រូវ ខុសគោលដៅប្រមូលផ្តុំទុកសំរាម ខណៈពេលដែលក្នុងមួយថ្ងៃជាមធ្យម ក្នុងក្រុងសៀមរាបមានសំរាមនិងសំណល់ប្រហែលជា៥០៦តោន ។
លោកអភិបាលរងខេត្តសៀមរាប បន្តថា ក្នុងឆ្នាំ២០២២នេះ អាជ្ញាធរខេត្តបានចាត់ក្រុមការងារបច្ចេកទេសសហការជាមួយជាមួយទីភ្នាក់ងារសហប្រតិបត្តិការអន្តរជាតិជប៉ុន(JICA)សិក្សានិងកំណត់គោលដៅសម្រាប់ទីលានចាក់សំរាមថ្មីមួយទៀត ដែលមានផ្ទៃដីប្រមាណជា១០ហិកតាស្ថិតក្នុងភូមិអន្លង់ពីរ ឃុំត្រពាំងធំ ស្រុកប្រាសាទបាគង ដើម្បីរៀបចំជាទីលាន ចាក់សំរាមដែលមានលក្ខណៈបច្ចេកទេសត្រឹមត្រូវមានកម្រិតស្តង់ដារ ដែលអាចបញ្ចៀសបានពីបញ្ហាបរិស្ថាននិងប៉ះពាល់ដល់សុខុមាលភាព របស់បងប្អូនប្រជាពលរដ្ឋដែលរស់នៅក្បែរៗនោះផងដែរ ដូច្នេះបញ្ហាសំខាន់គឺត្រូវតែមានការចូលរួមយ៉ាងមោះមុតពីគ្រប់មជ្ឈដ្ឋានដោយអស់ពីចិត្តពីថ្លើមមក្នុងការជួយសំអាតឱ្យបានជាប្រចាំ និងជួយពន្យល់អប់រំណែនាំដល់កូនចៅយើងអំពីរបៀបសុខុមាលភាពនៃការរស់នៅដោយគ្មានសំរាម ឱ្យពួកគាត់ចេះវេចខ្ចប់ទុកដាក់សំរាមឱ្យបានត្រឹមត្រូវចៀសវាងការបោះចោលផ្តេសផ្តាសតាមទីសាធារណៈទីប្រជុំជន ជាដើម ៕
អត្ថបទ និង រូបថត ៖ លោក យូ វង្ស
កែសម្រួលអត្ថបទ ៖ លោក លីវ សាន្ត
