ធនាគារភ្នំពេញពាណិជ្ជ បានសហការជាមួយអង្គការកណ្ដុរហិតមីន APOPO ប្រគល់ដីចំការទំហំជិត ៣០ហិកតា ជូនប្រជាពលរដ្ឋចំនួន ១៦គ្រួសារនៅស្រុកវ៉ារិន ខេត្ដសៀមរាប ដើម្បីឱ្យពួកគាត់ប្រកបរបរកសិកម្មចិញ្ចឹមជីវិត ក្រោយពេលធនាគារនេះផ្ដល់ថវិកាដល់អង្គការអាប៉ូប៉ូធ្វើការសំអាតគ្រាប់មីន និងគ្រាប់យុទ្ធភ័ណ្ឌមិនទាន់ផ្ទុះរួចរាល់។ ពិធីប្រគល់នេះ ធ្វើឡើងនៅទីតាំងដីផ្ទាល់ ស្ថិតនៅភូមិខ្នារផ្ទោល ឃុំស្រែណូយ ស្រុកវ៉ារិន ខេត្ដសៀមរាប កាលពីរសៀលថ្ងៃទី១៤ ខែកុម្ភ: ឆ្នាំ២០២២នេះ ។
លោក ញ៉ក់ គឹមស្រូយ នាយករងប្រតិបត្តិជាន់ខ្ពស់ នៃធនាគារ ភីភីស៊ីប៊ែង បានមានប្រសាសន៍ថា ការប្រគល់ដីស្រែចំការនេះ ជាលើកទី២ហើយ ក្រោមគម្រោងថវិកាឧបត្ថម្ភប្រតិបត្តិការឆ្នាំ២០២១ ដោយមានការចូលរួមពីអតិថិជន និងក្រុមការរបស់ធនាគារ សប្បុរសជនទាំងអស់ បានធ្វើឲ្យមូលនិធិសរុបកើនឡើងដល់មួយម៉ឺនដុល្លារ ហើយបានជួយឧបត្ថម្ភថវិកា ដល់អង្គការអាប៉ូប៉ូដើម្បីសម្អាតគ្រាប់មីន និងគ្រាប់មិនទាន់ផ្ទុះលើដីចំការប្រជាពលរដ្ឋ នៅតំបន់នោះ។ លោក បាបន្ដថា ក្នុងនាមជាសប្បុរសជនពិតជាមានសេចក្ដីសោមនស្សក្រៃលែង ដែលបានឃើញការបរិច្ចាគរបស់យើងដល់អង្គការនេះ ដែលមានតម្លាភាពបំផុតក្នុងការជួយសង្គ្រោះជីវិតប្រជាជនកម្ពុជា។ ការបរិច្ចាកនេះ ទោះតិចតួចក្ដី ប៉ុន្តែក្នុងនាមជាក្រុមហ៊ុនឯកជនដំបូងគេនៅក្នុងប្រទេសកម្ពុជា ដែលផ្តួចផ្តើមគំនិតក្នុងការគាំទ្របេសកកម្មនេះ មានសេចក្តីសោមនស្សជាខ្លាំង ហើយធនាគារនេះនឹងធ្វើយុទ្ធនាការបង្កើនចំណាប់អារម្មណ៍ពីសាធារណ: និងមានក្រុមហ៊ុនផ្សេងៗទៀតចូលរួមបរិច្ចាគលើបេសកកម្មនេះផងដែរ។ លោកបានបញ្ជាក់ថា នៅក្នុងឆ្នាំ២០២២នេះ ធនាគារភីភីស៊ីប៊ែងនឹងព្យាយាមរិះរកមធ្យោបាយផ្សេងៗ ដើម្បីរួមចំណែកឧបត្ថម្ភដល់APOPO ក្នុងការបោសសម្អាតគ្រាប់មីន និងគ្រាប់យុទ្ធភ័ណ្ឌមិនទាន់ផ្ទុះ នៅក្នុងខេត្ដសៀមរាបបន្ដទៀត។
អ្នកភូមិខ្នារផ្ទោលចំនួនពីរនាក់ក្នុងចំណោម១៦គ្រួសារ ដែលទទួលបានដីធ្លីដោយផ្ទាល់ បានសម្តែងការសប្បាយចិត្ដ ក្នុងការទទួលបានដីដែលបានសម្អាតគ្រប់មីនបញ្ចប់រួចរាល់ដោយសុវត្ថិភាព។ គាត់បានលើកឡើងថា កន្លងមកការរស់នៅក៏ដូចប្រកបរបរចិញ្ចឹមជីវិត ជួបការភ័យខ្លាច ដោយសារមានគ្រាប់មីន និងគ្រាប់យុទ្ធភ័ណ្ឌមិនទាន់ផ្ទុះបង្កប់នៅក្នុងដីធ្លី។ ប៉ុន្ដែនាពេលនេះពួកគាត់បានធូរស្រាលក្នុងចិត្តណាស់ ហើយអាចរស់នៅក្នុងការប្រកបជីវិតធម្មតា និងមានសុវត្ថិភាពគ្រប់គ្នាជារៀងរាល់ថ្ងៃ។ ពួកគេក៏បានថ្លែងអំណរគុណដល់ធនាគារ PPCBank និងអង្គការAPOPO ដែលបានសហការគ្នា ដើម្បីធ្វើឱ្យជីវិតពួកគេកាន់តែមានភាពកក់ក្តៅ និងធានាដល់អនាគតរបស់យើងផងដែរ។
ព័ត៌មានជាតិ ថ្មីៗ
លោក ហ៊ាន សាវី អ្នកសម្របសម្រួលអង្គការអាប៉ូប៉ូ និងអង្គការស៊ីម៉ាក់ នៅខេត្ដសៀមរាប លោកធ្វើបទបង្ហាញថា ក្រុមការងារអង្គការAPOPO បានបោសសម្អាតផ្ទៃដីសរុបជិត ៣០ហិកតា (២៩,០៣៨៥ហិកតា) ស្ថិតនៅភូមិខ្នារផ្ទោលដែលមានចំង៉ាយជាង ៧០Km ពីទីរួមខេត្តសៀមរាប។ ក្នុងប្រតិបត្តិការសម្អាតគ្រាប់មីនប្រឆាំងមនុស្ស មានចំនួន ៤០គ្រាប់ និងគ្រាប់យុទ្ធភណ្ឌមិនទាន់ផ្ទុះផ្សេងទៀតចំនួន ៣១គ្រាប់ ត្រូវបានរកឃើញ និងបំផ្លាញដោយសុវត្ថិភាព។ ប្រតិបត្ដិការរុករកគ្រាប់មីន និងគ្រាប់យុទ្ធភ័ណ្ឌមិនទាន់ផ្ទុះនេះ ដោយប្រើសត្វកណ្ដុរហិតមីន និងម៉ាស៊ីនរាវក្នុងជម្រៅជ្រៅក្នុងរយ:ពេល ២ខែ ដោយចាប់ផ្ដើមអនុវត្ដន៍ពីដើមខែកញ្ញាដល់ខែវិច្ឆិកាឆ្នាំ២០២១កន្លងមក។ ក្រោយបេសកកម្មនេះបានបញ្ចប់លើដីចំការនោះ បានផ្តល់ផលប្រយោជន៍ផ្ទាល់ដល់ប្រជាពលរដ្ឋចំនួន ៧១នាក់មកពី១៦គ្រួសារ ដែលទទួលផលផ្ទាល់ និងមាន៣៥០គ្រួសារ ជាអ្នកទទួលផលដោយប្រយោលជារួមសហគមន៍ ក្នុងតំបន់នេះនឹងក្លាយជាកន្លែងដែលមានសុវត្ថិភាពជាងមុនសម្រាប់ពួកគាត់ទាំងអស់គ្នា៕
អត្ថបទ និងរូបភាព: លោកបូ សាវី កែសម្រួលដោយ លីវ សុខុន!!!
