នៅព្រឹកថ្ងៃទី៩ ខែមីនា ឆ្នាំ២០២២នេះ ក្រុមប្រឹក្សាខេត្តសៀមរាប បានរៀបចំកិច្ចប្រជុំសាមញ្ញលើកទី៣៤ អាណត្តិទី៣ តាមរយៈប្រព័ន្ធវីដេអូ ក្រោមអធិបតីភាពរបស់ឯកឧត្តម អ៊ាន ឃុន ប្រធានក្រុមប្រឹក្សាខេត្ត និង លោកស្រី យូ សុភា អភិបាលរងខេត្ត តំណាងឯកឧត្តម ទៀ សីហា អភិបាលខេត្តសៀមរាប និងមានការចូលរួមពីឯកឧត្តម លោកជំទាវជាសមាជិកសមាជិកា ក្រុមប្រឹក្សាខេត្ត មន្ត្រីរាជការចំណុះសាលាខេត្ត ព្រមទាំងមន្ទីរ អង្គភាព អាជ្ញាធរក្រុង ស្រុកជាច្រើនរូប។
កិច្ចប្រជុំក្នុងឱកាសនេះ បានផ្តោតសំខាន់ទៅលើខ្លឹមសាររបាយការណ៍ប្រចាំខែកុម្ភៈ ឆ្នាំ២០២២ ដែលបានលើកពីគម្រោងអភិវឌ្ឍន៍នៅតាមបណ្តាឃុំ សង្កាត់ក្នុងខេត្ត។ ទន្ទឹមនោះ លោកនាយក រដ្ឋបាលសាលាខេត្ត បានបញ្ជាក់ថា គម្រោង ដែលរដ្ឋបាលខេត្តបាននិងកំពុងអភិវឌ្ឍ រួមមានការកែលម្អសួនច្បារ ចំនួន៣កន្លែង ការស្ថាបនាផ្លូវ នៅសង្កាត់ សាលាកំរើក និង រង្វង់មូលចំណុចផ្សារស្វាយធំ ស្ថិតក្នុងឃុំកណ្តែក ស្រុកប្រាសាទបាគង។ ក្នុងនោះដែរ កិច្ចប្រជុំក៏បានធ្វើការអនុម័តផងដែរ លើផែនការស្នើក្របខណ្ឌរបស់មន្ទីរសុខាភិបាលខេត្ត សម្រាប់ឆ្នាំ២០២៣ផងដែរ ។
ថ្លែងក្នុងកិច្ចប្រជុំ ឯកឧត្តម អ៊ាន ឃុន បានធ្វើការ វាយតម្លៃខ្ពស់ និង កោតសរសើរពីការខិតខំប្រឹងប្រែងរបស់រដ្ឋបាលខេត្ត ក្នុងការចូលរួមថែរក្សាសន្តិសុខសណ្តាប់ធ្នាប់ សាធារណក្នុងខេត្ត ធានាបានសុវត្ថិភាពខ្ពស់ និង ចូលរួមប្រយុទ្ធប្រឆាំងទប់ស្កាត់ និង កាត់ផ្តាច់ខ្សែចំលងវីរុសកូវីដ-១៩ ជាមួយរាជរដ្ឋាភិបាល ព្រមទាំងបានធ្វើការផ្គត់ផ្គង់ស្បៀងអាហារ ថ្នាំព្យាបាលដល់ប្រពលរដ្ឋ ។ ទោះបីក្នុងបរិបទជំងឺកូវីដ-១៩ក៏ពិតមែន រដ្ឋបាលខេត្តនូវតែបន្តការអភិវឌ្ឍ លើគ្រប់វិស័យ ព្រមទាំងការអនុវត្តការងារសម្រេចបានជោគជ័យទៅតាមទិសដៅ ផែនការរបស់រដ្ឋបាលខេត្ត ដែលបានដាក់ចេញប្រចាំខែនីមួយៗ ។
ឯកឧត្តមប្រធានក្រុមប្រឹក្សាខេត្ត ក៏បានលើកឡើងផងដែរថា ដោយបច្ចុប្បន្ន នេះខេត្តទេសចរណ៍មួយនេះ បានកំពុងធ្វើការអភិវឌ្ឍន៍លើហេដ្ឋារចនាសម្ព័ន្ធគ្រប់វិស័យ សំខាន់លើការស្ថាបនាផ្លូវថ្នល់ ចំនួន ៣៨ខ្សែក្នុងក្រុងសៀមរាប ដែលជាអំណោយដ៏ថ្លៃថ្លារបស់សម្តេចតេជោ ហ៊ុន សែន នាយករដ្ឋមន្ត្រី ផ្តល់ជូនដល់ខេត្ត ទេសចរណ៍វប្បធម៌ធម្មជាតិប្រវត្តិសាស្ត្រមួយនេះបានរួចរាល់ នឹងនៅរងចាំធ្វើការបើកសម្ពោធដាក់ឲ្យប្រើប្រាស់ជាផ្លូវការ នៅថ្ងៃខាងមុខនេះ ។ ក្នុងនោះដែរឯកឧត្តម អ៊ាន ឃុន ក៏បានស្នើសុំដល់អាជ្ញាធរ និង មន្ទីរ ជំនាញពាក់ព័ន្ធ និង អាជ្ញាធរក្រុង ស្រុក ត្រូវអនុវត្តឲ្យខាងតែបាន នូវគោលនយោបាយរបស់រាជរដ្ឋាភិបាល និង ផែនការ ទិសដៅ ដែលរដ្ឋបាលខេត្តបានដាក់ចេញប្រចាំខែនីមួយៗ ។ ម៉្យាងទៀតក៏ត្រូវបង្កើនការផ្សព្វផ្សាយនៅតាមមូលដ្ឋាន អំពីវិធានការការពារជម្ងឺ កូវិដ១៩ កាន់តែចូលជ្រៅស្រទាប់មហាជន ។ ឯកឧត្តមបានបន្តទៀតថា បច្ចុប្បន្នខេត្តសៀមរាប បានកំពុងតែធ្វើការអភិវឌ្ឍន៍លើវិស័យទេសចរណ៍ ដោយមានការកែលម្អរសោភណ្ឌភាពក្នុងក្រុង ក៏ដូចនៅតាមតំបន់ រមណីយដ្ឋានប្រាសាទអង្គរ សំដៅធ្វើឲ្យខេត្តប្រវត្តិសាស្ត្រមួយនេះ ធ្វើការទាក់ទាញភ្ញៀវទេសចរណ៍ជាតិ អន្តរជាតឡើងវិញ ក្រោយពេលបញ្ចប់កូវិដ១៩ ចូលមកទស្សនាកម្សាន្ត ។
មានប្រសាសន៍នោះដែរ លោកជំទាវ យូ សុភា ក៏បានសំណូមពរដល់ ថ្នាក់ដឹកនាំមន្ទីរ អាជ្ញាធរក្រុង ស្រុក គ្រប់លំដាប់ថ្នាក់ ត្រូវបន្តអនុត្តនូវគោលនយោបាយរបស់រាជរដ្ឋាភិបាល និង ទិសដៅរបស់រដ្ឋបាលខេត្ត សម្រេចឲ្យបានជោគជ័យ ។ កត្តាសំខាន់ដែលត្រូវអនុវត្តជាប្រចាំនោះ គឺការប្រយុទ្ធប្រឆាំងទប់ស្កាត់ និង កាត់ផ្តាច់ខ្សែចម្លងវីរុសកូវីដ-១៩ ត្រូវអនុវត្តនូវវិធានការ ៣កុំ ៣ការពារ និង ការណែនាំរបស់ក្រសួងសុខាភិបាល ព្រមទាំងធ្វើការជំរុញបងប្អូនប្រជាពលរដ្ឋ ត្រូវរៀនរស់នៅតាមគន្លងប្រក្រតីថ្មី នៃកូវិដ-១៩៕
អត្ថបទ និង រូបភាព ៖ លោក ម៉ី សុខារិទ្ធ
កែសម្រួលអត្ថបទ ៖ លោក សេង ផល្លី
